Tamawt : « Ayen akk yuran d asugen/imagination, zun ur illi. Ma yefka anza ɣer wayen illan di tmurt n Lezzayer, ɣer yemdanen iddren neɣ immuten, d ayen ur nelli, d ayen ur d-igir ufus ». (1)
Aḍu n tegrawla n taggara n 2024 yusa-d si Surya :
Kra wussan kan deffir trewla n « ugellid » Bachar Al-Assad ɣer tmurt n Russia, Isuriyen ṭṭfen-d « Rebb Surya » deg wass n 26/12 ; d win ibedden d agellid deffir ugellid Bachar, d jiniral Mohammed Kanjo Hassan, d win inɣan imeyyaten d imeyyaten n Isuriyen di yal anekraf n tmurt, ameqqran deg-sen d win n Saydnaya, idis n Damas.
Ass-a yenser Bachar Al-assad s trewla-s ɣer Russia, irwel d amakar acku yezzwer sdat-s agerruj n Surya akked twacult-is, maca azekka ad d-iɣli gar ifassen n teɣdemt n tmurt-is, ad iqabel ɣef wayen akk issenger di tmurt-is.
Asirem, ma yella usirem di temsal n tsertit akked tjiupulitik n tsertit tagraɣlant, tarewla n Bachar ad d-teglu diɣ s nnger n « Rebb Russia », Vladimir Poutine, s ufus n Irusiyen ara d-ikkren azekka !
D asirem, d asfillet, ulac awezɣi !
Tadyant n Surya n taggara n 2024, d tamsirt izemren ad teddu di yal tamurt : ulac adabu izemren ad ibedd lebda mgal aɣref n tmurt-is.
Izmer ad ibedd tallit, ad ineɣ, ad isserwet, maca yiwen wass, ad tbeddel tegnawt, ad ibeddel waḍu idis, adabu ad igrurej wakali.
D tamsirt n umezruy, tin iwumi ur izmir ad as-innser yiwen.
Mačči deg yiwen uɣmis kan i yuran : « Poutine issenser Bachar Al-Assad ɣer Russia, isserwel-it ɣer akken ur tḍerru yid-s am akken teḍra d Mouammar el-Khaddafi » di tmurt n Libya di 2011 ».
Maca, tuttra n wass-a : « Anida i yezmer ad irwel Poutine ma tekker fell-as di Russia, kkren-d Irusiyen ad hudden adabu-s ? ».
ɣas ur illi wawal deg wawal, d tifrat-nni i ssarment uget n tmura i yellan idis n tmurt n Ukrainia, deg umennuɣ mgal adabu n Poutine.
Tamsirt n Libya, tin n Surya akked tmura nniḍen, issefk ad ilint d igli/horizon i yal adabu yeqqnen tamurt-is, akken ad d-yuɣal ɣer ubrid n tugdut akked izerfan.
D win kan i d abrid iddren akken tamurt ad terfed iman-is, akken tarwa n tmurt ad tessirem ad tidir di tmurt-is, ad tesnerni, ad teg iseɣ i tmurt-is, ad tili d agadir ɣef tmurt-is.
Ɣas d asfillet kan, Nessaram i 2025, ad yili d win n taggara n « irebbuben », d « Rebb Dzair » neɣ d wayeḍ, di tmura nniḍen.
D awal i yenna yakan Kateb Yacine, s tiɣri-nni n wurfan zun d abaṛud…
Aumer U Lamara
Timerna / Notes :
1. Plusieurs versions de l’avertissement existent, au cinéma comme en littérature romanesque :
a) « Il s’agit d’une œuvre de fiction. Toute ressemblance avec des personnes vivantes ou décédées est purement fortuite ».
b) « Les noms et les personnages sont le fruit de l’imagination de l’auteur et toute ressemblance avec des personnes, vivantes ou mortes, serait pure coïncidence.
c) « Toute ressemblance avec des personnes vivantes ou ayant existé ne serait que pure coïncidence ».
2. « L’ONG syrienne OSDH a fait savoir que l’homme recherché, un ex-directeur de la justice militaire identifié comme le général Mohammed Kanjo Hassan, est accusé d’être « un des responsables des crimes à la prison de Saydnaya », tristement célèbre pour ses conditions de détention inhumaines et son rôle central dans la répression violente exercée par le clan Al-Assad.
L’ex-officier avait « prononcé des condamnations à mort et des jugements arbitraires à l’encontre de milliers de prisonniers », a ajouté l’OSDH ». Il a été arrếté à Khirbet-el Maɛza dans la province de Tartous, fief de la famille Al Assad.
Le Monde 26 décembre 024