Settin iseggasen d timmunent. D timmunent ur nemmid! D timmunent n wakal kan. Azzayri mazal yettraju timmunent-is n tidett, tinna ara s-yezdin lqedd, tinna ara t-yessemgirden d temhersa i t-yerẓan d leqrun.
Settin iseggasen-a n timmunent nezmer a ten-nernu ar talliyin tubrikin, tiḥeqqarin, timhersanin. Yella kra i ibeddlen anager nezmer a nɣenni, nezmer a necḍeḥ? Tineggura-ayi ula d tukksa n lxiq teqqel ɛzizet!
Mi d tewweḍ timmunent di 1962 yal wa amek i tt-id tufa, wa am sskeṛ wa am ilili. Widen terza tiẓeṭ ffɣen-d di 5 yulyu jeddben, ttaḍsan, ddan s wannay n neǧma wehlal deg ufus, lbaruḍ yekkat, aslewlew yerra tili. Am rzeg-nsen, ufan-tt akken i tt-bɣan. Tekfa-yasen-d Lezzayer, yerna cwiṭ kan tili tekfa-d ula i lǧiran! Ferḥen, sfuglen settin iseggasen n timmunent n Lezzayer. Lezzayer-nni-nsen! Tinna akken i d xaḍen. Tinna i ten-yerran akken bɣan: xeddmen cwiṭ idrimen aṭas, zedɣen, ttaɣen znuzun, sɛan ula d iqeddacen, mi ten-uḥwajen a sen-d ssiwlen ad ffɣen ad difilin, akken ad cebbḥen izenqan, a sen-d ɣennin qassaman. Ferḥen wwin-d timmunent i ten-issenden anda bɣan: d Aɛraben d Inselmen u Rebbi kbir. Ččan-tt tuččit ijudar. Yuɛer umectaq mi ara yerwu! Awer t- tesɛuḍ d lǧar, awer t-id temlileḍ!
Timura tiberraniyin ḥemmlent Lezzayer, tuɣal-asen d tasraft n lwiz, awi-d anwa ara yeččen, lxir yella, d tafunast ẓẓeg ternuḍ, teẓẓgen almi i sent-teqqel d taḍsa. Amek ihi! Sɛant lḥeq, yak qqaren: win yufan dderya n taḍsa ur yeḍsi-wara a t-ilum Rebbi.
Settin iseggasen n tuzert n wudem! Ur ssinen aḥezzeb! Ttɣiḍen Imeɣrasen i iruḥen d ilulufen. Nwan ad kksen ddel, ad rren azal d wezref i yal Azzayri. Qlilit yergazen d tlawin i ten-yecban di ddunit. Qlilit yergazen ara yeǧǧen arraw-nsen di dduḥ, d cci i ikesben, ad ruḥen ad ṭṭfen amadaɣ, i wakken ad awin Tilelli! Lxir-nsen d ameqqran. Isem-nsen ur ifennu. Awah kan teffeɣ-asen ar tafat! Bnaqes, tirga mxalfa! Teḍra-yasen am temẓin-nni yekrez wezger taggara iɛlef-itent weɣyul. Maɛna akka i tḍerru d win yettnaɣen ur yeẓri d wanwa yesdukkel iɣallen.
Akka i tḍerru d win ur nesɛi tadyulujit! Qqaren imezwura : tin yefran leɛmer tennuɣ. Lemmer ṭṭfen deg waya, ahat ass-a tuǧǧal d igujilen d wegdud s umata ad idiren s tidett di tlelli deg timmunent. Lḥasun di ddunit ulac lukan, yella kan wayen tzerɛeḍ d wayen i d tmegreḍ.
Ḥseb, si 1962 ar ass-a, settin iseggasen-aya ɣef tlalit n Lezzayer tunsibt! Settin iseggasen n ilili, n miḥyaf, n laẓ, n tukksa n sser, n tukksa n izerfan. D ajrir! Amek ara yefreḥ yiwen di tmurt am ta? Settin iseggasen segmi teffeɣ Fransa, mazal deg yiwen webrid amharsan i nettidir! Anda i tufeg i tres! Amek settin iseggasen-aya jnan-aɣ-d ala lmut, ala lmizirya! ččuren-aɣ leḥbusat s yergazen d tlawin n yiseɣ, ulac tilelli n tɣamsa, ulac tasertit, ulac taɣdemt, ulac tadamsa…!
Nekni s Leqbayel d YImaziɣen anda ma llan, ur yelli wezref i nesɛa neɣ drus akkya, ur nettwaḥseb d aɣref. Tamagit, tutlayt d yedles aqbayli, amaziɣ, kkan-asen-d s wadda, gezzmen-asen iẓuran, ttleqqimen-ten s taɛrabt, ass-a tuɣ teǧǧuǧeg. Settin iseggasen-aya mi neqqel d Aɛraben s wudem unsib, a nekni yellan seg wazermezruy d Imaziɣen!
Ass-a nekni s Imaziɣen s umata teḍra-yaɣ am WUwdayen deg 1870, xelqen-asen-d tanaṭ (décret) iwumi semman (décret Crémieux) i ten-yerran d iɣarimen. Ad xedmen anda zemren neɣ anda bɣan akked izerfan-nniḍen, maɛna s ddaw n tecḍaṭ n Fransa. Ihi nekni s Imaziɣen almi d 1962 i ɣ-d wwḍen kra deg yizerfan-a d acu kan s ddaw n Lezzayer i yerra Ben Bella d Bumedyan d taɛrabt d tineslemt. Nezmer ad nini mačči tanaṭ-nni merra i ɣ-d budden, maɛna aqel-aɣ deg tinna n “deuxième collège”. Cukkeɣ inuggura-ayi zemren ad d sbedden l’apartheid akkya! Lḥasun, nerwel-d deg bu yedɣaɣen neḥṣel-d deg bu yeslaḍen.
Settin iseggasen-aya d askeɛrer, bnan tamurt ɣef tkerkas, bnan-tt ɣef rrmel. Tamurt n lxir ur neṭṭixir rran-tt d aqeḥqaḥ! Tamurt yellan tesseččay Luṛup, tuɣal tettaǧew-d irden n Tchernobyl! Lemmer lbaburat ad qqimen ayyur ur d-ssawaḍen ara uččiyat ad yeqqel laẓ-nni n iseggasen n rebɛin. Settin iseggasen-aya n leḥkem ukaskiḍ ur yesserwa ula d tacekkart uyefki i wegdud-is! Ma tkemmel akka, settin neɣ miya u settin iseggasen kifkif, skud mazal-iten yemcumen-a, mazal s taɛrabt d tneslemt i tebna tmurt, ur yelli ara ibeddlen. Gar-aneɣ d ɛecrin iseggasen akka a nessutur lviza ar Afɣanistan.
Awer d nuɣal deg wasulali n sebɛin iseggasenn n timmunent ad nemmeslay daɣen ɣef nnger, ɣef yemcumen-a i d yemmaren si tlisa ɣelten ayen ur d ḥerren. Rran aqelmun s iḍarren. Akka ar yimiren a neẓẓu asirem. Ahat ad nuɣal ad nawi awal ɣef ubeddel yessufuɣen, ɣef lecɣal igerzen, wama ass-a nnuda ulac. Wissen kunwi?
Farid Benmokhtar
D aselmad di tesdawit Paris VIII.