D amezwaru n unebdu. Lamaâna, aseggas-a zik ayagi yebda weẓɣal. Yagi bdan rɣan wussan. Akken kan ifuk ugeffur d ubruri, ad as-tiniḍ nekcem talemmast n ɣect. Sebḥan sidi Rebbi : iḍelli kan i d tafsut… ass-agi yebda ubẓiẓ.
Dɣa wissen ma armi d ass-agi kan i yebda aâggeḍ, neɣ zik i d-yusa nek ur as-d-rriɣ ara kan tamawt ? Lḥasun, armi d ass-agi i yas-sliɣ. Laâslama-k ay abẓiẓ. Ad t-ig Rebbi d win ɣef nerbeḥ ncallah.
Ahat tura ad yili inessef wass. Iṭij di tlemmast n igenni neɣ wissen anida, deg wakken yuɣ mkul amkan. Alamma d deqqal, mi ttqarib ad yeɣli, ara yenǧem bnadem ad t-iwali, wamma tura ddunit d netta.
Ddunit tessusem, tamurt irkel ad as-tiniḍ temmut. Imeksawen zik ayagi deg d-rran azal, tura ma yefka Rebbi ṭsen. Tabaɛ, taddart d iḍes ayen teṭṭes, neɣ d ddunit ayen inegren, qqimeɣ-d nek weḥd-i ? Armi tameɣrust-agi n waklan i d-ifkan ifurkan-is ɣer lḥara-nneɣ ad as-tiniḍ teṭṭes : yiwen yifer deg-s mačči la yettembiwil. I yefrax, anida llan ? Aâni ula d nutni rewlen, subben s iɣezran, ɣer yemdunen, ad sbuḥrun cwiṭ ? Lḥasun, ddunit texla, ddunit teṭṭes, ama d ṭejra, ama d taḥcict, d laâbd, tamurt, teggugem.
Abẓiẓ ? Ula d netta ad iniɣ ur yettwaḥsab ara ssut-is, imi lukan d ara yessusem ara d-issaki win iṭṭsen, imi s ssut-nni dɣa i t-tewwi tnafa. Illa ssut ittwaḥesben di tsusmi, deg akken t-innum umeẓẓuɣ.
Dɣa, am teswiɛt-agi deg lliɣ. Segllin qqareɣ-as taddart s lekmal-is teṭṭes, a yuɣ lḥal llant lxersun snat tlawin yukin am nek : yiwet di lǧiran-agi nneɣ ufella, si sbeḥ ala teẓẓad s tessirt n uxxam. Tis snat, n lḥara-yagi sdat-nneɣ. Tagi aâqleɣ taɣect-is, ssneɣ-tt : d Zayna at Ḥemmu i la yettdekkiren, tetthuzzu wissen d mmi-s neɣ d yell-is. Welleh ma ẓriɣ. Dɣa d lewhayem di Zayna yagi. Deg wasmi tt-ssneɣ, acḥal n laâwam ayagi, illa nettat dayem tettdekkir, dayem tetthuzzu, dayem tesaâ llufan di dduḥ. Deg wasmi yas-d-cfiɣ, ama deg iḍ ama deg wass, deg umezwaru ar uneggaru useggas, dayem tesaâ di dduḥ iwumi ara tettɣenni : « ay aneznez ay iḍes… ». Wissen ma d yiwen llufan kan i yugin ad yimɣur, neɣ tettarew mkul aggur, neɣ amek. Lḥasun, armi ula d leɣna-s yuɣal yettwaḥsab di tsusmi, am tessirt la yeẓẓaden, am ubẓiẓ la yeẓẓenẓinen, am taggent-agi neɣ arẓaẓ i la izehhren nnig uqerruy-iw, cɣel n ṭumubil-nni n igenni. D ayen isi yas-nniɣ tamurt s lekmal terɣa, tessusem, teṭṭes.
Yemma, ula d nettat, tečča kan cwiṭ n lqut segllin, terra tabburt n uxxam ɣef yiman-is, teṭṭes. Tettarra tabburt mara teṭṭes deg uzal i wakken ad as-iḍul lḥal, irna ɣef yizan ur tt-ttmeḥḥinen ara (a Rebbi ay ttagadeɣ ides-agi n yemma deg uzal ! Aâlaxater, mara d-taki, a d-tekker s wurfan. Lamaâna, sya ar imir-nni, ad yeg Rebbi ttawil).
Ma d nek, aâniɣ-d asqif, ssiɣ-d agertil, nniɣ-as ad ṭṭseɣ cwiṭ, lamaâna tugi ad iyi-tawi tnafa. Asqif-agi nneɣ acek-it deg unebdu : mara s-teldiɣ i sin lelwaḥ d-ifkan ɣer uzniq, isaâɛu cwiṭ n ubeḥri. Aârḍeɣ ad ɣreɣ cwiṭ i wakken ad iyi-d-yers nadam, ulac. Aâyiɣ di leqraya, iḍaq cwiṭ lxaṭer-iw, serseɣ taktabt, sakin, akken d tinnegnit, allen-iw di sqef, rriɣ-tt i umekti.
Mara d-mmektiɣ…
Sebḥan-k a sidi Rebbi, ayen i yaɣ-txelqeḍ ! Di teswiɛt am tagi n tsusmi d yiḍes, dacu ara d-mmektiɣ? Dɣa di laâwam-nni, d ussan-nni deg yella wexxam-agi nneɣ izehher di lɣaci, s uaâggeḍ, s teḍsa d imeṭṭawen n warrac, d tullas. Axxam iččur, lḥara teččur, asqif-agi yeččur. Wa ur isel i wa !
Nanna Faṭima d urgaz-is (tura ha-ten di Fransa) zedɣen dɣa ɣur-nneɣ, ṭṭfen ‘’taɣurfet tajdiṭ’’. Faḍma, nettat d urgaz-is aâzlen ɣer ‘’texxamt’’. Axxam gganen deg-s. : yemma d watmaten-iw, Mbarek (ad as-yaâfu Rebbi, immut di Fransa) akked Tayeb (atan tura di Fransa), d yessetma n Lqern : Wezna, Tasaâdit d Mesaâd, mara d-rezfent nutenti akked uqḍar n warraw-nsent. (cfiɣ neṭṭes deg yiwen wusu di aâcra ar tnac yid-nneɣ. Imir-nni i nettemseččaw anwa ara yeṭṭsen d alemmas, deg wakken yettagad uqerni ad t-yečč ‘’lweḥc’’. Sakin lmeḥna tameqqrant ɣef yemma, di sbeḥ mar as-d-iḥder ad tesserbi lqahwa !
Teggra-d tɣurfet taqdimt, dɣa d tagi nnig uqerruy-iw, tuɣal ula d nettat tettwazdeɣ. Wi tt-izedɣen ? D nek ! Anaâm. Imir-nni i yi-d-zewǧen. Tameṭṭut-iw tamezwarut : Faḍma at Saâdi, si Teskenfut. Meskint ! Mara d-mmektiɣ… Meskint, aâlaxaṭer tura, mara tt-id-smektiɣ, tettɣiḍ-iyi. Am akken yettaker-iyi wul ɣef wayen i yas-xedmeɣ, deg wass-nni ara ass-a (aâcrin n sna ayagi deg i tt-uɣeɣ, briɣ-as), ula d nek jerbeɣ, yettwajreḥ wul-iw si zwaǧ. Daɣ netta, lemmer ttafeɣ ad as-ḍelbeɣ smaḥ. Irna, tabaɛ, sdat Rebbi, lbaṭel i yas-xedmeɣ, tugin i tt-ugiɣ. Sɣur Rebbi : yug-itt wul-iw, yugi-tt lxaṭer-iw,lemmer ttafeɣ ur tt-ttwaliɣ ara.
D yemma i tt-id-ixeḍben, i yi-tt-id-yuɣen, i yi-tt-id-iwwin. Ur tt-ssineɣ ara armi d asmi d-tedda d tislit. Iḍḥu-d teɣleb-iyi di laâmer aṭas, tameṭṭut talemmast, wama nek ad iliɣ di laâmer-iw xemseṭṭac ar seṭṭac n sna. Irna, ma yehwa-yak, mačči d ayen i d-iwwin madakci. Wissen ma imi tesxerxur, neɣ d ssifa-s, neɣ dacu. Wḍeɣ armi tt-ttagadeɣ ! Sakin, akken d imi aâddan wussan-nni n teslit, nniɣ-asen : a win i yas-iqqaren ‘’d nek ay d nek’’, ad d-iruḥ ad iyi-isgen yid-s !
Mara d-mmektiɣ…
Am ass-a… d lemtel mara d-iḥder lawan n yiḍ-s. Dadda Lewnis d tmeṭṭut-is ad alin ɣer tɣurfet tajḍit, xal-i Aâli d tmeṭṭut-is ad alin ɣer texxamt, yemma akked lwacul nniḍen deg uxxam, ad d-rren akk tibbura ɣef yiman-nsen. Faḍma at Saâdi meskint ad tali ɣer tɣurfet-agi taqdimt, ad iyi-tettraǧu. Nek, mi yi-d-suffɣen seg uxxam, ad rreɣ dɣa ɣer tdukkant-agi n usqif, ad ṭṭseɣ.
Nejbed akken aṭas, armi d yiwen wass, tuki-yi yemma. Teffeɣ-d aâni deg iḍ, taf-iyi-d ṭṭseɣ dagi, tayeḍ la tesxerxur iwsawen. Tessusem kan, aâni testḥa neɣ amek. Teḥku-yas azekka-nni i Nanna Faṭima (ladɣa teẓra yemma nettagad Nanna Faṭima akter-is. Aâlaxater d nettat i d tameqqrant deg-nneɣ ; deg wasmi d-nekker i yaɣ-tebda s teɣrit. Seg-s ɣer da, mi nmed meqqrit, tuɣal-aɣ ɣur-s d rehba, d leḥya. Irna, lḥasun, tettawi-tt-id yid-nneɣ cɣel Irumyen : mara tebɣu aɣ-tini kra, teqqar-aɣ-t, ur tt-ittaṭṭaf ara lxuf-nni, neɣ d leḥya-nni saâunt teqbayliyin ɣer gmat-sent ɣas meẓẓi).
Ass-nni ihi, akken ṭṭsen at wexxam, tsubb-d Nanna Ṭiṭi, akken i yas-neqqar, xmat xmat druǧ n tɣurfet, taf-iyi-d ṭṭseɣ dagi deg usqif. Thucc-iyi : « Dacu txeddmeḍ dagi ? I wakken ur aɣ-d-tfehhem ara Faḍma at Saâdi nnig-nneɣ, aâlaxaṭer ittban ur tt-tettawi ara tnafa, thedder-iyi-d s trumit)
– Ali ad teṭṭseḍ !
– Eh !
– Ali ad teṭṭseḍ a gma, ttxil-k !
Awaah ! Akken tebɣu tḥellel-iyi, akken tebɣu tehder, ulac. Tiɣrit, ulama neqqar, ur yi-tekkat ara, aâlaxateṛ ruḥeɣ mdeɣ, ur ttagadeɣ ara tiyita-s, ur yi-tqarreḥ ara. Ula d nettat teẓra. Daɣ netta, tehder armi taâya, ulac, tuli ɣer ‘’tejdiṭ’’, tuɣal-d, tsubb-d, tkems-d deg ufus-is tawriqt n rebaâ duru. Nek, di lweqt-nni, ulamma ur bdiɣ ara tissit n crab, lamaâna tteḥwiǧiɣ idrimen, ttxalaḍeɣ ilmeẓyen, keccmeɣ leqhawi, ttaɣeɣ-d tiktabin, dayem ilaq-iyi cwiṭ umesruf. Nanna Ṭiṭi tewwi-yi-d s lexbar. Dɣa seg wass-nni, tefra rray gar-anneɣ, ur nemcawar. Mi ḥwaǧeɣ kan ɣef yiḍes n tɣurfet taqdimt, ad iyi-d-tɣit s ama d snat, ama d rebaâ duru. Ufiɣ-tt d tarbiḥt. Ala Rebbi ma isemmeḥ-iyi, wissen. Ulamma… aṭas n lecɣal ideg ad iyi-isemmeḥ.
Mara d-mmektiɣ…
Ula d akken, ufiɣ-d ddwa i yiḍes-iw akked Faṭima at Saâdi. Ittaɣ lḥal dagi ɣur-nneɣ i tella Newwara at Ḥemmudi, yell-is n Faḍma-nneɣ, n urgaz amezwaru. Newwara, imir-nni di laâmer-is aâmayen neɣ telt snin. Nettat tḥemmel-iyi d ayen kan. Sakin, ass kamel ad tt-ttwessiɣ, ad as-ttakeɣ leḥlawat. Mi d lawan n yiḍes, ad tebdu ad tettru, ad tettaâggiḍ : « Iḥrem fell-i ma ṭṭseɣ ala ɣur xal-i Belaïd… ! », dɣa nek ad tt-id-refdeɣ ɣer ‘’teqdimt’’, ad tt-id-segneɣ gar-anneɣ nek akked Faḍma at Saâdi. Sakin tagi ad tt-terr i yimeṭṭawen, tefhem id-nni yettruḥu-yas baṭel. D Rebbi ara yi-isemmḥen !
Mara s-neqqar « d ayen tzeraâḍ ara tmegreḍ ». Seg wass-nni ar ass-a, aâcrin n sna ayagi. Ur iwwiḍ ara useggas ideg tt-uɣeɣ, briɣ-as i Faḍma at Saâdi. Di syen xedmeɣ laâsker, ruḥeɣ ɣer Fransa acḥal, uɣaleɣ-d, aâwdeɣ zwaǧ. Yini-yak sidi Rebbi : « ar akken tessruḍ tameṭṭut ara k-tessru tmeṭṭut nniḍen ». Daɣ netta, yeẓra Rebbi ma xellseɣ !
Ddurt-agi yaâddan, kkiɣ-d si Lǧemaâ, anida xeddmeɣ, tedduɣ-d s axxam, armi d lfiraq n Cemmax, issemlil-iyi-d Rebbi akked Faḍma at Saâdi, teteddu ɣer at Mangellat, tewwi-d taqcict ad tili di laâmer-is aâcra neɣ ḥḍac n sna. Yuɣ lḥal aṭas-aya deg sliɣ taâwed zwaǧ, dɣa ɣer at Mangellat, irna tesaâ yell-is. Aâqleɣ-tent i snat, ula d nettat taâqel-iyi-d. Wamma yell-is ur yi-tessin ara. Akken d imi nemlal, tesked-iyi-d, tebra i wallen-is. Wamma nek ur s-hdireɣ ara, muqleɣ-tt mliḥ, nuḍreɣ-tt akken ilaq, aâlaxaṭer, tidet i Rebbi, welleh ar tt-cedhaɣ. Lemmer ufiɣ ad tt-laâiɣ, ad as-hedreɣ, ad tt-seqsiɣ amek tella, dacu tesaâdda ; ad ṭṭfeɣ taqcict-nni, taâǧeb-iyi d ayen kan ! Ad as-ḥkuɣ ɣef yiman-iw. Lamaâna… d laâib ameqqran ɣur Leqbayel. Daɣ netta, nettat d yell-is wtent aâddant, nek wteɣ aâddaɣ. Akken nembaâdad cwiṭ, qelbeɣ ɣer deffir, walaɣ-tent ula d nutenti qelbent-d ɣur-i. Wissen ma tenna-yas i yell-is neɣ ala…
– Tu veux un café ?
Llah ! Llah ! A ziɣ-nni ar yaâdda uzizwu, a ziɣ-nni ay abẓiẓ ar yessusem, a tissirt ar teḥbes, a Zayna ar tessusem, iṭṭes mm-is, neɣ truḥ s isɣaren, ziɣ-nni ar bezgent wallen-iw seg iḍes, a yemma ar zik ay d-tekker, ar tessew lqahwa, teswa armi terwa, ata tewwi-yi-d afenǧal.
Wissen kan tura ma d amekti i d-mmektiɣ, neɣ d targit kan ay urgaɣ tigi ?
Belaïd At Ali,
Yulyu 1946
Timerna/notes :
1. Ṭumubil n igenni : tamesrafegt (fr. avion)
2. Madakci : ugur, uguren…
3. Cemmax : tala yellan idis n taddart Lqern
