Da Vesεi, iḥarek, yedda ddeqs di laεmar, yeţaggwad lmut. Waεmara, mmi-s n mmi-s, deg-mi i iwalla Jeddi-s akken, dɣa ssya ɣer da a t-isexxwleε.
Ad yeqim di vaṛa ur d-ikeccem ara zik, mi d-yekccem Da Vesεi a t-isteqsi :
– D acu i k-yeṭṭfen alarmi ţura Waεmara a mmi?
– D yiwen wemɣaṛ di taddart leflan-tega i g-bbwḍen laεfu Ṛebbi.
– Ad fell-as yaεfu Ṛebbi. D acu i t-yenɣan?
-Iruḥ ad yalli ɣer premyiṛ iṭaj, yaεfes tacḍaṭ uvarnus-is yeggrarved di tkkeddaṛin, dɣa yemmut!
– Teẓẓṛam tura ɣef wacu i ţaggwiɣ ad alliɣ ɣer premyiṛ iṭaj!
Yibbwas diɣ ur d-yekccim ara zik. Mi d-yekccem, yenna-yas
– Acuɣef akka i netεeṭṭleḍ a Waεmara a mmi?
– D yiwen wemɣaṛ di taddart leflan-tega i g-bbweḍen laεfu Ṛebbi, ruḥeɣ wujḥeɣ.
– Ad fell-as yaεfu Ṛebbi. D acu i d-sebba n tmeţţant-is ?
– Yefeɣ ad imarreḥ cwiṭ, yezgger avrid tewt-it ṭumubil yemmut!
– Ad fell-as yaεfu Ṛebbi. Tigad agi jammi ad ṭṭfent Jedd-ik, nek tilist-iw d amnnaṛ bbwaxam.
Yibbwas diɣ ur d-yekccim ara.
Am zik, yesteqsat Da Vesεi :
– Yak d lxir kan imi nteqimeḍ alarmi ţura a Waεmara mmi?
– A d Da Welḥaǧ n taddart n Iɣil Uzekḍuf i g-bbweḍen laεfu Ṛebbi, ruḥeɣ εezaɣ.
– Ad fell-as yaεfu Ṛebbi. Snneɣ-t, d arggaz lεali nemmyuzga-d nekk-yid-s, d acu i t-yenɣan a Waεmara a mmi ?
– Yeṭṭes, azekka-nni ṣveḥ ur d-yukki-ara am zik, dɣa dllan fell-as, ufant yemmut!
– Ţiggad-agi i g-ţaggwed Jedd-ik a Waεmara a mmi.
Ahmed Aït Bachir