28 mars 2024
spot_img
AccueilPolitiqueDi lezzayer, les startups d awal, tella kan luzin n imeḥbas, n...

Di lezzayer, les startups d awal, tella kan luzin n imeḥbas, n imenfan akked iḥerragen !

Détenus d'opinion
300 n imeḥbas n tektiwin di Lezzayer;

-Allo ! D kem a yell-i ? ad d-taseḍ aseggas-a ?

-Bɣiɣ ad n-aseɣ a yemma, maca ugadeɣ ad iyi-ṭtfen di l’aéroport asmi ad d-uɣaleɣ, ad sfungeɣ leqraya n warra-iw… !

Awal-a, d amedya i yellan yal ass gar Izzayriyen i yeddren di « Lezzayer tamaynut », akked wid illan d iɣriben… zun d imenfan.

Tamurt tedwel d amerdax : wid illan deg-s ur zmiren ad ffɣen ɣer berra, neɣ ma neṭtqen-d ad ten-awin ger lehbas ; wid illan d iɣriben ur zmiren ad kecmen mar ad ttwacudden deg unafag, taggara uɣalen d imenfan ;

Ma d wid iffeɣ laaqel, uysen, sɣersen icuddan di teflukin n usɣar, gezmen aman, d imezgaren n tmara, neɣ… !

Tadyant n trewla ɣer Frans a n Amira Bouraoui, akked wegdal n LADDH, tessuffeɣ-d laar iffren i wid iqqnen allen-nsen s ifassen-nsen.

- Advertisement -

Iḍelli, di ddewla n Bumedyen, tella ’’l’autorisation de sortie du territoire national’’, tin i yeqqnen imdanen zun d imeḥbas, ass-a tennulfa-d’’l’interdiction de sortie du territoire national (ISTN)’’, i igan afrag i yemdanen.  Acu ibeddlen ?

Illa ɣur-nnaɣ wawal n zik : « simmal nteddu nettimɣur, simmal nettissin ». Yal tamurt n umaḍal tga-yas azal i tmuɣli-nni, ala tamurt n Lezzayer, neqqim ntezzi ntenneḍ.

Di tallit deg tasertit iteddun di tmurt n Lezzayer d tin kan n tekriṭ/violence n yal afus n udabu (tamsulta, taɣdemt, wid n war udem d war isem…) mgal imeɣnasen n tugdut di yal tama, adabu si tama nniḍen ittberriḥ s tsertit n tneflit/développement akked tigemmi n tmurt s… les startups !

Aberraḥ-nni ittban-d zun d asfillet n yimzuren di tzawiyin (incantation irrationnelle).

Timura irefden iman-nsent s yal abrid n startups akked yal tsertit yullen taneflit, zwarent seg ubrid n tugdut akked izerfan. D wid i d lsas n tmurt.

Deg umaḍal, ass-a, ala tamurt n China (Ccinwa) i yesduklen taneflit akked tsertit n wuzzal n ukabar kuminist. Aḍu n tlelli ad d-yaweḍ aɣref n Ccinwa, ass-a ne^g azekka.

Ijenyuren i d-isnulfuyen d imdanen, ddren di tmurt, ẓerren ayen ilhan d wayen ur nelhi, llan am nitni am imezdaɣ n tmurt. Ma ur ufin iman-nsen di tmurt-nsen, ur zmiren ad d-afen ayen ur nelli di yal annar n tiknuluji i lfayda n tmurt.

Aberraḥ n wass-a s’’les startups’’ ur nelli, akked tifin n yinan/lebyur n pétrole, ad teffeɣ am yal tasertit n iseggasen izrin :

Tasertit n ANSEJ i yeldin tabburt i takerḍa n tmurt,

Tinzin n wakal n tfellaḥt i yibandiyen n’’ugraw’’ itezzin idis n udabu

Asnulfu n lbanka ‘’union méditerranéenne de banque’’ i yeldin tabburt i tuffɣa n  tedrimt tameqqrant n tmurt, ilmend deg ad d-tessekcem tadrimt n yeɣriben (akka i nnan mi ssulin lbanka-nni)….

Akken ara as-teffeɣ azekka i ‘’tsertit n startups’’. Ad čcen idrimen n tmurt gar-asen s yal taḥilet, syin ad rewlen ɣer tmura nniḍen n umaḍal, ad aɣen ixxamen din, akken ad snetlen din tarwa-nsen. Ad afen din imeddukal-nsen i yezwaren, Chakib Khellil, Farid akked Mohamed Bejaoui, Amar Saidani, jiniral flan…

Ulac ISTN, ulac afrag zdat ‘’At ugraw’’.

Aumer U Lamara