D alɣu n ukabar PT (Akabar n ixeddamen) anida yeffeɣ si temsizzelt n tafrent taselwit n 7 ctamber 2024, i d-issawḍen ɣer tira n uḍris-a (1).
Neẓra timura taârabin akken llant, sbeddent tamsalt n temhersa n Palestine zun d tagejdit n yal adabu akken ad ibedd, ad isserwet, ad irnu ad isserkec aɣref n tmurt-is mgal tamurt n Israël, d acengu n berra.
Ulac tin izeglen tiyita-nni : « tamsalt n Palestine / « qadiyya Falasṭin » gan-tt d ddwa i wuguren n tmurt, d buberrak ɣef izerfan.
Amur ameqqran deg-sen iduba-nni, mačči d izerfan n imezdaɣ aâraben n Palestine i d iswi-nsen, d nnger n Israël.
Tasertit-nni d-ilulen si 1947 (talalit n Israël) si yal tama, armi tessaweḍ Ifalastinen umnen, s tezmert n ‘’watmaten-nsen aâraben’’, zemren azekka ad snegren Israël ! D tasertit n Gamal Abdel Naser, d tin n Hamas akked ikabaren nniḍen i iteddun si 1947.
Ma d awal-nni « Awanak/Etat n Palestine idis n Israël », iqqim d tiḥila kan… zun ar d-yaweḍ wass-is !
Tanmegla/opposition di tmura taârabin tedda deg usalu-nni :
Ayen illan d ugur ameqqran, di tmura n waâraben, akked tmura yeddan deg umussu n tmura taârabin, icban timura n Tamazɣa, n Iran, n Sudan, d tasertit n ikabaren illan di tanmegla/opposition, mgal yal adabu ibedden di tmura-nni.
Di tsertit-nsen akked tikli-nsen zun leqqmen tamsalt-nni n Palestine deg wahil-nsen, armi ur illi umgared gar-asen d udabu ibedden di tmurt-nsen.
Tidderɣelt-nni (neɣ tikerkas-nni) iban ubrid-is : yal akabar ikkat ad isseqdec tamsalt n Palestine (« fond de commerce ») akken azekka ad ibedd d adabu, ad iwwet at tmurt-is s tsertit-nni.
Di yal tamurt taârabt, neɣ tineslemt akkin, nezmer ad d-naf udmawen n ikabaren yesseqdacen tamsalt n Palestine s ubrid-a neɣ s ubrid-n, zun teqqen ɣer tfekka-nsen. Ad d-nefk sin kan imedyaten :
- Di Merruk, deg iseggasen-nni n 1970 deg ibedd udabu n ugellid Hassan II ayaâlawi, iqqen tamurt, amur ameqqran n ikabaren illan mgal agellid, nutni llan dduklen ɣef tsertit n Palestine akked ugellid. Ulac amgared.
Yiwen umeɣnas n tizzelmeṭ (n USFP, Ila-el amam, UNEM ?, …) n Merruk, inna-yas : « Tifrat n wuguren n Merruk, tasarut-is tella di Palestine » (2).
D ayen issewhamen, amek i qqnen tamsalt illan akkin i 4000 km, zun d tasarut n wuguren-nsen, zun asmi ara tefru temsalt-nni, ad frun akk wuguren n Imerrukiyen, ad ikkes laẓ, ad tbedd tlelli akked izerfan… - Amedya wis sin d win n tsertit n ukabar PT di tmurt n Lezzayer (ẓer alɣu n PT akken illa) (1) : PT isbedd tamsalt n Palestine zun d tagejdit, irna tardast ɣer sdat issekcem Palestine deg ADN n tmurt n Lezzayer, d yiwet gar « les constantes nationales », akkin i 4000 km i tmurt n Lezzayer. Akabar n FLN ur issaweḍ ɣer tmuɣli-nni, d tin « Jillul ar Millul » !
D tadyant-nni n « memmi-s irnan asurif akkin, sdat baba-s », izzwer tifrat di Palestine sdat ferru n wuguren n tmurt n Lezzayer !
Tifrat n wugur n Palestine :
Ugur illan di Palestine d ugur illan gar sin iɣerfan n tmurt-nni, Aâraben akked Wudayen i yesddukel wakal si leqren du leqrun. D tamsalt n temhersa, d nutni ara tt-ifrun gar-asen.
Ur illi d ugur n waẓar aârab mgal aẓar uday, neɣ tinneslemt mgal tudayt.
Tikerkas d-ikkan si yal tama simal rennunt ugar aɣilif, tamettant akked war asirem i nẓerr ass-a deg wakal-nni. D taɣennant i yeṭṭfen tasawent.
Tamsalt n Palestine ur issefk ad tbedd d alqaf deg wurar aberkan gar ifassen n ibandiyen n yal tamurt.
Aumer U Lamara
Timerna / Notes :
- Alɣu n ukabar PT (tukkist) : « 1. Assumer, comme question centrale, notre responsabilité face au génocide sioniste perpétré depuis 10 mois continus à Ghaza en particulier en Cisjordanie / et El Qods occupé en général, faire entendre la voix du peuple algérien, étouffée par l’interdiction de manifester […] Question centrale pour le peuple algérien qui l’a adoptée dès 1947, l’a intégrée dans son ADN national, ses constantes nationales depuis l’indépendance en 1962, comme composante de son identité, comme condition majeure pour la plénitude de son émancipation nationale propre…. »
source : https://lematindalgerie.com/louisa-hanoune-se-retire-de-la-presidentielle/
Maca yella wayen ilhan deg wahil n ukabar PT :
« …. Impulser la promotion effective de notre langue amazigh, son enseignement obligatoire à l’échelle nationale.
… nous retirer de la Ligue des Etats arabes, repaire des valets de l’impérialisme US et de l’entité sioniste. » - « La solution des problèmes du Maroc est en Palestine », D tanagit n Saïd Boudaoud, Paris 1978.