Tafrent n APN n 12/06 tefka-d abazin ur igguni yiwen, maca adabu yessen-as amek ad t-irwi akken ad iseddu tikerkas simmal. 

Maca tella yiwet : yiwen ur yumin s wayen d-iffɣen seg uqelmun n système, am akken yiwen ur yumin ad d-yas azekka wayen ilhan sɣur yecriken n FLN-RND-MSP-Bina… 

Ansi tufeg i ters (no comment).

Ass-a, uraren n udabu mačči d aɣbel n wegdud. 

Ayen d-ibanen si tafrent-a (neɣ si war tafrent), yugar akk ayen nniḍen : ildi-d ubrid d ahrawan i tegrawla n talwit, hirak-tanekra ! 

Nnig 80 % n Izzayriyen ur kcimen di tḥila n tafrent n usekkak, acku sarmen ayen nniḍen, d abeddel n udabu ɣef uẓar, ad d-ikkes si tuccar n wid t-iṭṭfen si 1962, ad tebnu tugdut am di tmura yezwaren. 

Ɣas tanekra n furar 2019 ur tessaweḍ, ur tekkis adabu-nni, ass-a terẓa asalu ur izmir ad issinef yiwen. Awal iffeɣ di tmurt, iffeɣ berra n tmurt deg umaḍal. Ayen d-irnan d tikerkas n udabu, d asemɣer kan n udar n wid ur nteddu azekka deg ubrid-is.

Uguren i d-ifersen seg ubrid n tnekra :

• Wid yuzzlen ‘’ad aɣen amkan deg udabu’’ (les indépendants) (ɣas llan gar-asen wid yumnen zemren ad tt-id-beddlen seg ugensu/si daxel), azekka ad ilin kan d iqeffafen n udabu, ad kerzen yis-sen di APN, taggara ur d-ttebdaden d ixsimen n tegrawla.

• Imeṭṭurfan-inselmen (MSP, Binaa, Adala, …) tban-d tezmert-nsen (ɣas adabu yewwet ad tt-issemẓi) ; nwan tewweḍ-d tegnitt-nsen, ad kecmen agraw n APN d tirni, ad sersen iḍarren-nsen, syen d acrured, ad sbedden ‘’tagduda tinneslemt’’ (république islamique).   

• Imeṭṭurfan-inselmen i yudsen/iqerben FIS-Rachad, iffeɣ ubarud-nsen ; ur zmiren ad d-bedden deg ubrid,

• Imeɣnasen n ikabaren n FLN, RND…, ass-a ur llin d imeɣnasen n tidett ; yal yiwen ikkat ad d-yawi amkan, ad igzer di tmurt am akken uɣen tanamit. Ansi d-ikka waḍu ad ddun… ma tella tgella, les affaires.

Uguren imeqqranen, d wid illan di tama n tegrawla. I wakken ad d-ilal ugraw n Hirak-tanekra  izemren ad isdukkel ayen ilhan si yal tama, ad iddu deg ubrid d-ibanen : 

• Ad ikkes ukukru, ad ikkes wurar n ‘’yal yiwen i yiman-is’’, ad ikkes ‘’zaïmisme’’ i d-ikkan si PPA akked FLN. 

• Imeɣnasen i d-yufraren si yal tiɣremt n tmurt, wid d-iffɣen si leḥbas, ad gren afus ; 

• Ikabaren illan (FFS, RCD, PST, UDS, …) ad rnun tazmert-nsen ɣer wennar, ad ttun tasertit-nsen, acku mačči d timsizzelt, d bennu n tugdut i tifranin d-iteddun,

• Ad taru temsirt n tgejda n Lezzayer tamagdayt (charte républicaine et démocratique) ; illa wayen yuran yakan,

• Yal ameɣnas ad yili d afrag zdat wurar n uselqeḍ n udabu (srabes n DGSI,…) akken ad d-issekcem tuccar-is, ma yufa ad issexreb.

Di tegnitt deg nella, qbel ad icudd tamurt udabu n ‘’Lezzayer taqburt’’, Tamurt n Leqbayel tezmer ad tili d tigemmi/foyer, d amkan anda zemren ad mlilen imeɣnasenn n yal tama. Mačči d ayen iffren ma yella d timlilit n wid d-ikkren s tiɣri n nnig 80 % n Izzayriyen. Di ɣect 1956, di tnemmast n times n ṭṭrad, usan-d si yal tama n tmurt ɣer uswir n Ifri-Uzellagen/congrès de la Soummam !  

Abrid n tegrawla yeldi, ɣas yessawen, akken ad d-ilal ugraw ara ibeddlen udem n tmurt n Lezzayer.