Tamsalt n Israyil d Falastin d taqdimt, d lehlak aqdim. Ma ur s d- ufin ara ddwa tezmer ad teglu merra yes-neɣ. Ih merra yes-neɣ, ɣas akken ur nelli d Uwdayen neɣ d Aɛraben.
Tamsalt-a temɣuɣed, qrib ad tebḍu talsa ɣef sin imuren, wa yedda d wuwday akken yebɣu yexdem i cenna wayeḍ d waɛrab akken yebɣu yili lḥal, am wakken i tt-yettcewwiq udabu azzayri “ Falasṭin teḍlem neɣ tettwaḍlem!” Fhem tura kečč! Ma d imawlan n lxir ur ugiten ara.
Ulac wid ara tt-yefrun, ulac wid ara sen-d yefken neɣ ara ten-iɛiwnen ad d afen tifrat s wawal azerfan. Wissen anda llan wuḥdiqen ara-d yeglun s talwit i yal tama! Gran-d ala wid yeqqaren: aḥeq nekk.
Wid akka yettnaɣen, deg uSammer aLemmas, ur shilen ara. Yeddubbez wallaɣ-nsen. Ttmeslayen ala ɣef nnger. Yal wa yekkat amek ara yessenger wayeḍ ɣef uẓar; ɣas akken aẓar-nsen d yiwen. Yerna mi ara twaliḍ amek mmugen, ad d tafeḍ ayen i ten-yesdukklen yugar ayen i ten-iferqen. Maca, ɣas akken ttejra yiwet, lḥebb yemxalaf. Hattan yiwet seg lɣella-s i tesnem merra, d taẓallit, wa yekkat aqerruy-is ar lqaɛa wayeḍ yekkat-it ar lḥiḍ! Tinna n ikerri, yal wa yeqqar d tamacahut-nneɣ, d nekni ara t-ixerfen.
Ma deg ubagus d aksar msefhamen, lextana d yiwet, seg zik uzik mi ssazzalen idammen. Mazal tiyaḍ… Acḥal-aya i yettɛennin ar Rebbi, yiwen ur s-yenni: ay Agellid Ameqqran, efk-aɣ-d axsim d lfahem, neɣ ahat ɛennan yegguma a sen-d isel. Yeẓra d lehlak aqdim.
Tifrat tettas-d ma yella myal axsim yettaǧǧa cwiṭ si lḥeq-is. Ɛyu lhem a k-yeɛyu. Deg uSammer aLemmas mačči akka, ixsimen qqaren-as i lhem: ers-d neɣ ad d nali. Tufa tqabact afus-is. Netanyahu acḥal iseggasen-aya tazɣent tegra-d gar ifassen-is.
Tifrat i d yufa ikemmel-as i ucerrig! Yessawal ala i usenger n Waɛraben Ifalasṭiniyen, ma d Aɛraben yellan yid-s di Isṛayil iwwi-d ad fken mayna, ad knun zzat n ddel. Yebɣa yal ass Ifalasṭiniyen ad ssuturen taleqqimt amzun akken d aklan. Ma nnan-d uhu ad ttwiwten, ad mmten, ma d win yesɛan ẓher ad yerku di leḥbus. Di tama nniḍen imeɣnasen n Ḥamas d wid akk yeddan di laɛnaya-nsen, ur xuṣṣen ara. Myeṭṭafen afus deg ufus ar lgirra. Lmut ɣur-sen d asqecmeɛ. Frurin-d deg umussu agraɣlan n “atmaten inselmen”, tazzla idammen ɣur-sen tecba turat n warrac. Yal tikkelt i sen-tettunefk tegnit, qqaren-d acu iran. Yettwassen wahil-nsen, yerna ugin ad beddlen abrid.
Ayen bɣan mačči d izerfan-nsen kan, d asenger n Wuwdayen anda ma llan, amzun yeǧǧa-yasen-tt-id d lewṣaya Hitler. Rran Ɣazza d timeqbert. D tawaɣit, yal wa yebɣa ad yessenger wayeḍ! Netanyahu d Ḥamas ur ugaden ara, d nekni i yugaden! Ugaɣ asenger ɣef i ttmeddiḥen ad yeglu yes-neɣ. Ɣas akken nezga-d i mebɛid, taluft ur telli-nneɣ, maca amaḍal tura amzun d taxlict, yal wa a t-id taweḍ tunett-is.
Iwunak iḥeqqaren, ilaq ad ḥsun d akken agdud yettwaḥeqqren am UFalasṭini, neɣ ATibi, AKurdi, AQbayli… i ɣef yettwakkas fell-as sser, kra n wass kan ad yezdi lqedd-is. Ad yagi tamuḥqranit. Ur iqebbel ara a s-tettwakkes tutlayt, idles, akal d tmagit-is… ad d yaweḍ wass ara d-yerr ṣṣerf mi s-teqwa tayett? Ɣas terriḍ-as tadimt i wemdan i wegdud, terriḍ-t yiwen ur yesli yes-s, ad yaweḍ wass ideg ara-d yebbeɛzeq ɣef uwanek i t-yerran d akli, d ulac, yettwasfeḍ di ddunit. Iwunak iḥeqqaren ilaq ad ẓren tiririt n ttar tuɛer, tesderɣil amdan, tettarra-t d arebrab, d waɣzen. Ixeddem tixessarin ur iqebbel laɛqel, igellu s uzegzaw d uquran, am tinna yeḍran akka deg Isṛayil ass n 7 di tuber yezrin. Alama teṭṭerḍeq ara-d ttnadin medden d acu i d sebba n waya !
Tadyant-a taneggarut, nnan-tt-id akk wid yesnen akken iwata tamsalt n uSammer aLemmas. Netanyahu d tarbaɛt-is fkan-as taɛekkazt i Ḥamas, netta d Ifaṛsiyen… rnan-as azeḥlelli. Yeḍra ubaxix! Netanyahu d yimeṭṭurfa i t-yecban nwan ad rekḍen akken bɣan Ifalasṭiniyen yerna a sen-d ttawin ijeǧǧigen si Ɣazza! Wissen ma ndemmen deg wayen xedmen.
Lḥasun i yettɣiden ala wid yemmuten d tuǧǧal d yigujilen i d yeqqimen. Ass-a di tama n Ɣezza ttmettaten daɣen d ilulufen, lmut ur tezgil yiwen, lṭufan, amɣar, taqcict… imḍebbren n Ḥamas a k-qqaren, ulac ticraḍ mebla idammen! Akabar-a anselman Ḥamas d wid i sen-d yefkan afus nwan ad xedmen ayen werǧin ixdem-it urebrab di ddunit, yerna a sen-teffeɣ bxir! Ilaq umeyyez uqbel aneggez.
Tifrat tezmer ad d tas ala seg Isṛayiliyen yebɣan talwit, d tmura i sen-yettaken tayett akked Ifalasṭiniyen n tissas yeẓran d akken Uwdayen llan, ad ilin, yerna yewwi-d ad sɛun tamurt dinna deg uSammer aLemmas. Wid i tt-id yeṭṭfen di cedda ur bɣin ara talwit am Wuwdayen yekkin di tidyulujit taṣehyunit, tinna akken i sen-d yewwin talalit tis snat i wegdud Uwday, terra-ten-id bedden zdin lqedd, sɛan tamurt yifen timura, ahat iwweḍ-d lawan anda ara beddlen tikti, tasertit.
Acku ma terna tkemmel akka taɣert uqerruy, ur ḥsiben yiwen, nwan wwḍen, tfuk trusi, ur sen-yezmir yiwen… ar ɣur-i ɣelḍen, tiṣṣehyunit-a ma tkemmel akka deg webrid-a tezmer ad tawi Isṛayil d Wuwdayen merra ar nnger, ad frunin, wid ara d yeqqimen ad idiren nnig n miḥyaf ideg llan send 1948. Taswiɛt tbeddel, mačči deg yiseggasen n settin alama d tesɛin i tella ddunit.
Isṛayiliyen iwwi-d ad fken amur n wakal i Ifalaṣtiniyen, ula d nutnii d agdud, d azref ad sɛun tamurt, ɣas d at icumar, neɣ d akken bɣun ilin, d ccɣel-nsen. Tamurt d azref i yal agdud. Amur n wakal yeshel a t-id fken, ɣas akken ar kra iṣelḍanen tuɛer tifrat neɣ d awzɣi merra.
A k-qqaren tuɣalin ar tilisa n 1967, amek ? Ad snulfun tilisa nniden… Anda yella umtawa yeshel akkya, akken i t-wwin wakal-nni i zemren a t-id rren. Ma ur d slulen ara snat n tmura, d awezɣi ad tili tifrat, abaxix ad yettarew wayeḍ. Tamurt ara ixesren azekka d Isṛayil, acengu-ines yuɛer, mi tneṭleḍ qejjir ad yali fettus. Isṛayiliyen ma ur sen-d fkin ara amur i Ifalasṭiniyen i wakken ad slalen tamurt yezmer ad yaweḍ wass ideg ara sen-iruḥ ula d amur i yesɛan ass-a. Lḥasun win izerɛen kra a t-yaf.
Farid Benmokhtar
Aselmad di tesdawit Paris VIII.