Ass-a, adabu ibedden di tmurt n Lezzayer ‘’iffeɣ-as urekti tarbut’’.

Si tḥila n 1962, ar ass-a yedda deg yiwen ubrid : ad yečč tamurt akked wayen illan ddaw tmurt. Izerfan akked tmenḍawt gan-ten d acebbeḥ kan, i tiṭ n tmura tiberraniyin. 

Ɣas ur illi d ayen yuran, adabu isnulfa-d ‘’apartheid’’ (1) amaynut s wudem nniḍen ; ilmend d amgared gar uberkan d umellal, am Tferka n Wanẓul, di Lezzayer d win illan ‘’gar wid illan deg udabu’’ akked ‘’wid illan berra udabu’’. Di tmura n URSS (Union Soviétique) n zik, gan-as isem ‘’nomenklatura’’. Taggara tegrurej tsertit-nni di 1989.

Maca, ass-a, akken tt-icudd udabu, ad ternu ad teqres ugar, acku agdud ikker fell-as, ikker ad d-yerr tamurt i warraw-is, tamurt deg ad tbedd tugdut, ad bedden izerfan am tmura ittuqadren deg umaḍal. Ur illi ubrid nniḍen.

Izzayriyen, d imdanen neɣ d iddawen ?

Di tmuɣli n udabu, Izzayriyen ur llin d imdanen izemren ad sbedden tamurt, ur sen-tlaq tugdut. Issefk-asen kan aâkkaz am wulli. Win d-yufraren gar-asen, ad infu neɣ ad ikcem agraw n udabu, ad t-sqedcen, ad ibedd d amdan s tidett, ad iḥkem alamma yemmut !

Tamuɣli-ya tella si zik, ‘’Eqqen-itt, effer-itt’’, d tin n temhersa (les ultra-colonialistes n zman).

Di tmuɣli n ugdud  i yella wugur ass-a.

Amzun adabu issekcem-aɣ takti-ya (= ‘’ur nezmir nekkni i tugdut, ur nelli d imdanen’’), armi nettnadi ad nẓer di tmura nniḍen anda i d-ufraren watmaten-nnaɣ nnig wiyaḍ.

Ayen akk i nẓer yal tikkelt ad d-ibin yiwen neɣ yiwet, deg waddal, di tussna neɣ di yal annar nniḍen (Zidane di Fransa, Idir, Zerhouni di Marikan, Pr. Senhadji, Aghanim di CNRS, Bouguermouh ɣur Pfizer di Marikan, …), d wayeḍ, d tayeḍ, amzun d ayen ur nelli, d awezɣi !

Yal yiwen/t izmer ad iger tamawt, deg yeɣmisen n tmurt neɣ di yal aẓeṭṭa n internet (réseaux sociaux), ad yaf meqqret tyita. Amzun tamurt d iddawen/ibkan kan i tt-izedɣen ass-a. Ccek ikcem deg idammen, deg iẓuran, armi d-nnulfan ass-a wid iqqazen iẓekwan n umezruy akken ad d-afen anwi gar wid ittwassnen deg umaḍal i yellan d Imaziɣen (Apulée/Afellay, St Augustin, Septime Sévère, Ṭariq, …).

Tamuɣli ɣer umezruy aqbur telha, maca mačči akken ad tesgen imdanen n wass-a, s yiseɣ n wid immuten, acku ur llin ‘’leqrun n rbeḥ/liser’’ deg umezruy-nnaɣ ; d leqrun n ṭṭrad akked imenɣi mgal nnger.

Tamuɣli akked tmussni n umezruy issefk ad ilin d afud i tikli ɣer zdat, i usnerni di yal tamussni. Ad ikkes ccek di yal yiwen, ad iẓer izmer ad yerẓ asalu akken yufa, anda yebɣu yili, d amdan am yemdanen n umaḍal, n talsa.

D asalu-ya kan ara yeddun deg uɣerbaz amaziɣ.

Aumer U Lamara

Timerna / Notes.

1) Apartheid : tasertit n apartheid tlul-d di 1948 di Taferka n Wanzul (Afrique du Sud), tebna ɣef beṭtu gar Imellalen akked Iberkanen, yal tama deg wakal-is, s tuddsa-s, s izerfan-is (politique de développement séparé). D tiḥila n temhersa. Tekkes tsertit n apartheid di 1991 segmi d-iffeɣ Mandela deg unekraf, syin gan tafrent tamezwarut di 1994, anda ‘’yal amdan s tiɣri-s’’, akken ibɣu yili, d aberkan neɣ d amellal.