Irgazen akked tilawin iteddun deg ubrid-nsen di Lezzayer tamanaɣt, teddun di lecɣal-nsen, amur ameqqran ur ggaren tamawt i wayen illan idis-nsen, neɣ sdat-nsen.
Yal yiwen, tal yiwet tettazzal akken ad tefru ayen izwaren, d abrid ɣer umahil, d tiɣin n usafar neɣ sin, neɣ d abrid ɣer uxxam, akkin di tqessabt, neɣ anida nniḍen.
Di tnemmast n Lezzayer tamanaɣt, agemmaḍ i lbusṭa tameqqrant n Tafura, illa wemkan isduklen yal udem n tmurt n Lezzayer : deg yiwen umkan, illa uzamul n yiseɣ n tmurt, illa uzamul n tixubbta !
Zun rsen deg yiwen umkan, zdin deg yiwen wakal, yal yiwen yufa amkan-is ! Yal Azzayri ad ifren abrid n yiseɣ, neɣ abrid n kennu, n tixubbta !
Maca, ur izmir ad yili ufran akka.
Tasarut i wawal :
Azqaq ameqqran illan gar usayes Audin (Place Audin), akked lbusṭa tameqqrant, isem-is azqaq Abdelkrim El Khettabi.
D isem yufraren deg wakal n Tamazɣa : Muḥend Abdelkrim n At Yusef Waâli (di nekwa isem-is El Khettabi), illa d ameqqran n tnekra n tmurt n Arif (Rif) di tmurt n Merruk, si 1920 armi d asmi yeɣli di 1926. D netta i yesbedden tagduda n Arif, issenger tazmert n Spanya, irna yessenger tazmert n Fransa, taggara yettwaṭṭef di 1926.
Si 1947 armi d 1962 mi yella di Lqahira, isdukel imeɣnasen n tmura n Tamazɣa (Istiqlal, FLN, Destour) akken ad nnaɣent dduklent, acengu n Fransa, deg umussu n « Mouvement de Libération de l’Afrique du Nord ».
Ar ass-a, isem n Abdelkrim iqqim d azamul n ilmeẓyen n Arif i d-ikkren mgal adabu n igelliden. Isem n Abdelkrim issefk ad yili d azamul n tilelli n yilmeẓyen n Tamazɣa akken azekka ad teddukel d yiwet tmurt tameqqrant (1) (2).
Aɣerbaz n kennu :
Di tnemmast n uzqaq Abdelkrim El Khettabi, di numru 13, tbedd yiwet tzeqqa tameqqrant. Di tallit n Fransa, tazeqqa-nni tella d tasnawit/lycée Delacroix !
Seg iseggasen n 1970, beddlen-as isem, tella d tasnawit Omar Racim, syen tezdi akked tesdawit n Lezzayer.
Assa-a, amkan-nni beddlen wussan-is : idwel d tasnawit Arruǧ Kheireddine Barberousse !!!
Atmaten Arruǧ akked Kheireddine ur llin d Izzayriyen, ur nnuɣen i tlelli n Izzayriyen. Nutni d Iterkiyen, kecmen-d zun d imḥadden, taggara ṭṭfen adabu di Lezzayer di 1516 asmi nɣan Selim Utemmi, ḥekmen tamurt d tamhersa/colonisation taqurant, armi d asmi d-tekcem Fransa di 1830.
Azal n tlata leqrun, Iterkiyen i d-irnan deffir Arruǧ akked Kheireddine sersen-d qawsas ɣef tmurt, snegren tudrin, tekksen iqerra, ččan tamurt.
Yal yiwen izmer ad iɣer ayen illan ɣef udabu aterki di tmurt n Lezzayer.
Ur illi wayen iffren.
Tuttra yezwaren yal awal :
Anwa afus deg udabu n tmurt n Lezzayer i yefkan isem n watmaten Barberousse i tesnawit deg lemmden yilmeẓyen n tmurt n Lezzayer, di tnemmast n Lezzayer tamanaɣt ?
Ur illi d war tamussni, acku amezruy n watmaten Barberousse akked umezruy n temhersa n Turk di tmurt n Lezzayer ittwassen akken iwata.
Wid ifkan isem n Barberousse i tesnawit, d wid iran ad d-rebbin ilmeẓyen n Lezzayer deg ubrid n usekkak n umezruy, zun ‘’amsehres ineslem’’ ur illi d amsehres, zzewren ddin nnig tlelli n tmurt-nsen.
Wid igan tamsalt-nni bedden d afus n temhersa n yiḍelli, akken ad gen ixulaf i yal tamhersa d-iteddun. Nutni teddun ad leqqmen takti-nni i d-issuffeɣ yakan Malek Bennabi, zun Izzayriyen kecmen deg uqaleb n « colonisabilité », zun kerfen tagecrirt i lebda, win d-yusan ad ten-iḥkem, ad ikrez yis-sen.
Awal aneggaru, akken i nwala si tama-nneɣ, mačči d Izzyariyen neɣ mačči d tasertit n Izzayriyen i yefkan isem n Barberousse i tesnawit-nni di tnemmast n Lezzayer.
Anwa/Anwi ihi ?
Aumer U Lamara
Timerna / Notes :
1. Abdelkrim El Khettabi : https://fr.wikipedia.org/wiki/Abdelkrim_el-Khattabi
La guerre du Rif : https://fr.wikipedia.org/wiki/Guerre_du_Rif
2. Muḥend Abdelkrim, Di Dewla n Ripublik, Aumer U Lamara, éditions L’Harmattan, Paris 2012.
3. Arruǧ akked Xeyreddin (Aroudj Barberousse et Kheireddine)
Tasnawit Arruǧ Kheieddine Barberousse, di Lezzayer.