Illa wayen ibeddlen di tmurt-nnaɣ. Ayen ibeddlen ad d-iqqim deg yidles n tmurt acku yuɣ-d aẓar seg umezruy n tmurt, seg wakal-is di yal tama, seg idammen akked tidiwin n warraw-is.

Ayen ibeddlen d akud/lweqt d wamek iteddu wakud, d leḥsab-is i yesdduklen iḍelli akked uzekka, amezruy akked yimmal.

Yal agdud d-iṭṭfen ixef n usaru n wakud, iẓra ansi d-ikka, iẓra anda iteddu.

Asmi d-iffeɣ umezruy aqbur n tmurt, tekkes fella-as temdelt, s tedyant n Cacnaq ikecmen tamurt n Maser di -950 send Aâisa, tbeddel tmuɣli ɣef umezruy tmurt : « ziɣ nella si zik deg umezruy ! » i nnan kra.

Mi sbedden imeɣnasen (1) aseggas-nni d aseggas amenzu n umezruy, injer-d usalu i umezruy n tmurt, win iteddun abrid-is ɣer zdat, d abrid igedllen nnger. 

Ass-a Imaziɣen llan deg useggas n 2971, iẓra-t yal wiyen/yiwet di Tmazɣa, am akken llan di israel di 5781, di Iran di 1400, i llan yinselmen di 1443. Yal agdud anwa i d asalu n umezruy-is.

Taɣuri n wayen yuran afella, d tamsirt/leçon : 

1. Ayen izrin/yaâddan ur immut, illa.

Ass-a, Imaziɣen ffɣen-d si tmuɣli-nni d-ikecmen si tmurt n Waâraben, d tamuɣli tabedwit anda amdan ur iqqin ɣer wakal-is, ur iqqin ɣer wakud, iteddu gar igenni d tmurt n war isem, n war talast, rnan seddan-as awal-nsen : « « elli fat mat » / ayen izrin immut. 

Ass-a, isebdaden/statues d-irennun di yal taddart, di yal tiɣremt (Aksil, Yugurten, Masnsen, Dihya, Abane, Lmulud, Lwennas, Yidir …), ssut-nsen yiwen : Iḍelli yella ur immut, ayen izrin illa ur immut, ibraren-nnaɣ (2) ad d-qqimen deg umezruy d inigan n tudert-nnaɣ n wass-a, n uzekka-nnaɣ.

Tafsut, Tafsut Taberkant, yal tanekra n ugdud, yal tikli d-irennun, ad arunt, ad qqiment d azamul n umezruy iddren, iteddun deg usalu anda ixef-is d tilelli n ugdud amaziɣ, akken bɣun ilin wuguren. 

2. Tamsalt n tmuɣli ɣer umezruy aqbur n tmurt-nnaɣ tameqqrant, Tamazɣa, ur tezmir ad teddukel akked tin n imeṭṭurfan inselmen (islamistes), ama d wid n FIS, n GIA, n El Qaïda n DAECH, neɣ n yismawen d-irennun.

I nitni, tamuɣli yiwet : ayen illan d talsa, d tamussni, d amezruy qbel talalit-nsen, issefk ad ikkes, ad ihudd, ad irtem, ad yundal, ad inger.

Ur zmiren ad dduklen iberdan-nnaɣ.   

Aumer U Lamara

Timerna / Notes.

1) Tajmilt tameqqrant i Amar Neggadi n udrar Awras (Tamerwant), akked imeɣnasen nniḍen n Ugraw Imaziɣen akked tdukliwin nniḍen.

2) Ibraren : wid yufraren nnig wiyaḍ deg umezruy, deg yiseɣ, tamussni, tabɣest… = les héros.