Taṣeṭa tekna af ayen turew! Neɣ : Taṣeṭa taṛeẓ af ayen turew ! Yal tamnaṭ amek i teqqaṛ.

S wanzi yagi, yiwen wemdan yefra yiwet n taluft yegguman a d-af tifrat.

Tella yiwet n tmeṭṭut tezweǧ ar yiwet n taddart, axxam-nni ɣur tedda ţislit, ţawacult meqqwṛen, ţidiren di dduks. Ɛeddan wussan-nni kan n tisullya-ines, tenna-yas temɣart-is :

– Rrefed iman-im a ţṛuḥ-eḍ ar lexla.

Deg-wassen a segunfu ur t-uffi : haţan di tevḥirt, haţan deg-igger, haţan di teẓgi i wezdam n yesɣaṛen…Tuɣal tarna-d dderya, tesεa-d aqcic akk ţeqcict. Γas akken, tamɣaṛt-is s deffir-es kan, tarna-d ula ţalwest-is i d-yenevren.

Arggaz-is yeţawi kan lewhi s wallen, awal ur t i d-iṣaḥ. Tameṭṭut tameɣvunt, teṣvaṛ alami dayen tebbweḍ-as tfidi ar yiɣes, tεedda tceggaε i vav-as, tenna-yas :

– Ilaq a d-ṛuḥ-eḍ a s ţemeslay-eḍ i wemɣaṛ agi yenu ɣef annect-a lvaṭel sεedd-ayen felli.

Vav-as yuɣ lḥal ţaweḍent isallen af yell-is. Umaεna yenna-yas : skud ur d-cekkt-ara neţţat s timad-is, fiḥel ma vḍiɣ-ţ d warew-is. Ass-en mi t-yebbweḍ lexwvaṛ, ivaṛedaε-ed iw sardun-is, yeṭef-ed avrid ar waxxam n yell-is.

Mi yebbweḍ, ulac slam ulac awal, yenna-yas i yell-is :

– Rrefed iceṭṭiḍ-nim talliḍ sufella usardun ak m-awiɣ s-axxam !

Amɣaṛ, tamɣaṛt, arggaz-is zzin-d akk fell-as :

– Ah a leflani ! D acu-t akka wagi, xzu cciṭan a ţevḍuḍ tameṭut d warew-is !

– Cwaṭṭen d kunwi, akkwen yexzzu. A lǧuhala, taṛṛem yelli d zayla, acḥal aya ara txeddem fell-awen, tarna tamɣaṛt d yell-is warǧin i s-fkant talwit. Bkada wakada, ur tezzi a d-uɣal ar waxxam agi imesvaṭliyen.

Tameṭut tjemmεed akk iiceṭṭiḍen-is, arewi-is ţejjgugulen deg jjuffaṛ-is, tṛuḥ a ţalli suffela n usardun, yenna-yas vav-as :

– Trezem-iyi tkkufaṛt! Arew-im ar d-qimen da, ur t-ddin yid-em!

Arew-is ţrun, neţţat teţţru, ṛuḥ-en-d.

Qimen akken achal. Tameṭṭut deg-waxxam n vav-as siwa imeṭṭi, arew-is diɣ gguman a d-ṣevṛen af yemmat-sen. Arggaz-is yewqaε, yeţwalli deg-warewi-s, gezmen tassa-s. Yibbwas yenna-yas i vav-as d yemma-s :

– I tura, iεeǧǧev-awen wakka! A teţwall-im deg-warew-iw gguman a d-ḥevsen imeṭṭi ɣef yemmat-sen. Yaw akkwen yehdu Ṛebbi, as nnawi lejjmaε i Da Leflani aɣ d-yerr tameṭṭut!

S wakka, vav-as i jemmεed tarvaεt n lεeqqwel, m-yifkkan ţaεed a d-mlillen di taddart uḍeggwal-nsen.

Yiwen deg tejmaεt-nni n lxir, mi i teddu deg-wevrid iwalla yiwet n tṣeṭa n tzemurt tcellxed seg-wakken turew, dɣa i εedda i kemel-as-d acclex, yarreţ s daw teccḍaṭ n uvaṛnus-is, iṛuḥ-ed.

Mi bbwḍen ar zat waxxam uḍeggwal-nni, sawelen-as. Yeffɣed ar ɣuṛ-sen, akken i t n-id-iwalla yessxunẓaṛ, yenna-yasen :

– D acu i tevɣam ar ɣuṛ-i ?

Ineṭṭq-ed wamɣaṛ n yell-is, yenna-yas :

– A leflani, atan bbwiɣ-ak-d tajjmaεt agi n lxir, ma yehda-k Ṛebbi, aɣ d-rreḍ tameṭut ar warew-is.

– Asmi ţ-id bbwiɣ i d-grreɣ limin lqaṭaε, ɣas uɣal-et ansi i d-kkam!

Inneṭṭq-ed yiwen di lejmaε-nni, yenna-yas :

– A leflani, wagi mačči d ṣṣwav, mačči akka i teddunt temsel, ǧǧaɣ a nnekcem s-axxam, s yinna Ṛay a saεdi at i d-ifek Ṛebbi.

Iwalla d ṣṣwav i s d-yenna, d lεiv a d-yerr af tbbwurt tajjmaεt n lxir, dɣa i s-keccmiten s axxam-is.

Bdan awal. Atan ar wa, atan ar wayeḍ…Kks-ed ansi ur as d-kkin, arggaz aεkam yeḥarrneni yeberrneni, yeggwuma a d-ifek lwi. Yuɣal win-akken i d-yebbwin taṣeṭa-nni uzermur yid-s, yekksiţ-id s daw uvaṛnus-is, yenna-yas :

– A leflani, d acu-ţ tagi ?

– Ţaṣeṭa n uzermur.

– Daya kan i twall-eḍ deg-s ?

– Atan ivan, turew alami i d-clex.

– Ihi a leflani, akka ula d yelli-k, tarreţ tmerra a ţeknu, a ţaṛṛeẓ af ayen turew !

Iwalla i qeḍεit-id di tsawent, d ṣwav i s d-yenna, umaεna mazel yebarrneni, yarra-yas-d :

– Nek ggreɣ-d Limmin ur nnḥenet, ur zmireɣ-ara a d-uɣalleɣ deg-wawal-iw!

– A Leflani, acḥal i g-llan akka am kečč : ggwull-en uɣall-en ḥennt-en. Ur telliḍ deg mezwura, ur teţlliḍ deg neggwura!

Widak-nni ddan-d akk deg-wawal-is, dɣa yefk-ad lwi, yekkna-d.

S wakka i tuɣal tmeṭṭut ar warew-is.