Akka di kra n wussan ad ibedd uselway amaynut n tmurt n Lezzayer. D win illan ara yilin. Adabu ad as-isburr abernus amellal zun d win ibedden « s wudem n tugdut, si temsizzelt n tugdut ». Akka !
Netta, d ayen illan i yellan, d win illan i yellan, si tazwara n umezruy n tmurt n Lezzayer. Nezmer ad nefk tamuɣli ɣer usaru-nni yentin si 1962 armi d ass-a, d yiwen ubrid :
1962 : d « coup d’État’’ n Ben Bella, mgal GPRA, s ufus n temrigt/armée n berra, n Houari Boumediène, tin i d-ikecmen si Merruk akked Tunes.
1965 : d « coup d’État’’ n Boumediène mgal adabu n Ben Bella, di 19 yunyu 1965, gan-as isem « aseggem n ubrid n tegrawla/redressement révolutionnaire », suffɣen-d les chars ɣer iberdan, nɣan imdanen, ččuren leḥbas.
1979 : d »coup d’État » n FLN akked temrigt, mi yemmut Houari Boumediène di 27/12/1978 ; tamrigt n ANP tefren Chadli Bendjedid d aselway deg was n 7/02/1979.
1988 : d « coup d’État’’ n temrigt, tekkes akkin Chadli, tewwi-d aselway amaynut, Mohamed Boudiaf, di tmesrafegt, si temdint n Wejda di Merruk, anida yella d imenfi. Mi yunef abrid n wid t-id-iwwin, fkan-as win t-inɣan di Annaba, deg wass n 29 yunyu 1992.
1999 : d « coup d’État » n Bouteflika, s ufus n temrigt i t-id-iwwin si Emirates ; netta yecreḍ di tazwara ad ibedd d aselway s nnig 70 %, send ad tili tafrent (sic!), akken ad yifrir nnig Liamine Zeroual, win ibedden s 61,30 % .
Taggara sbedden-t Bouteflika s 73,80 % n tafrent n usekkak.
2019 : d « coup d’État’’ n ‘’système’’, deffir tnekra n Ḥirak issenhezzen tamurt, isbedd Abdelmadjid Tebboune, s tafrent ur nelli d tafrent.
2024 : asekkak iqqim di « coup d’État permanent », iteddu s tussda n tebwaḍin akked ubeddel n tebwaḍin, ɣas ttbeddilen akk’akka wudmawen akked yismawen.
Nnig tafrent n 1995 i yessulin Liamine Zeroual d aselway, di tallit-nni n ṭṭrad n timeṭṭurfit tineslemt mgal tamurt n Lezzayer, acku Izzayriyen fernen s tidet jiniral aserdas, akken ad iqabel irebraben n FIS akked yerbiben-is (GIA, AIS, GSPC…), ur d-telli tafrent iseḥḥan am akken ttilint di tmura n tugdut.
Ass-a di 2024, ɣas ibeddel ubrid, mačči d tuffɣa n les chars ɣer iberdan, mačči d astuti n rsas ɣef yelmeẓyen n Lezzayer, d tamsulta i yeṭṭfen anzel n udabu, ttcuddun-d yal win ur neqbil adabu yellan, ɣas s ubrid n talwit, rennun tissi deffir tayeḍ ɣer leḥbas n tmurt, s yisem n teɣdemt.
Ass-a, tafrent iteddun ddaw uzaglu n temsulta, tin ikksen yal tilelli i wawal ur nelli d win n « bni wiwi » n zman n zik, ur telli d tafrent, ur tezmir ad tili d tafrent. Ɣas skecmen-d sin ikabaren akken ad ilin deg umezgun-nni n temsizzlet, Izzayriyen walan ayen illan, ulac ayen iffren.
Ass n 7 ctamber 2024 tameddit, adabu ad yeg tameɣra acku yessas-d 5 iseggasen n udabu ideg ara yernu ad iqqim, ad iḥkem, ad isserwet mgal tamurt n Lezzayer, ad yečč ayen d-tefka tmurt akked ddaw tmurt.
Yal yiwen seg wid illan di tqacuct n udabu isedduy tikerkas-is, iḥetteb irennu akken ad yaɣ i warraw-is asensu/hôtel di Paris, Barcelone neɣ London !
Ma d uguren imeqqranen iggunin tamurt (tadamsa, war amahil n yelmeẓyen, aɣerbaz ukrif n taârabt-tinneslemt, agdal n tmaziɣt, tikli simal n tiniri, ḥamu n ugama, uguren n tlisa n tmurt, bennu n Tamazɣa tasertant…) ad qqimen akken ur ferrun, ad aẓayen ugar, ad ten-bibben yizzayriyen ara d-ilalen azekka.
D abrid n nnger, mačči d win n usirem, acku adabu yergel-d yal igli/horizon…
Aumer U Lamara
Timerna / Notes :
1. Le Coup d’État permanent est un essai de François Mitterrand, publié par les éditions Plon en 1964, pendant la présidence de Charles de Gaulle. François Mitterrand y dénonce la pratique du pouvoir personnel par le général de Gaulle. Le titre s’appuie sur la notoriété du livre de Léon Trotsky La Révolution permanente (les éditions de Minuit, Paris, 1963).