Taɣuri-w i wungal Tiṭ d yilleḍ ayen i d-qqarent tewriqin, cuvaɣ-ţ ar tissit n usekran i yessivnineɣ lkas, ad ijeɣɣem deg ccrav-is ad iţɣis deg lvenna-s.
Nekk d timeɣrit icuvan asekran-nni yebreţxen deg lkas-is, ula d nekk ţberţixex ar daxel n yal asekkil, yal awal, yal tafyirt, yal taseddart, yal asevter, yal tikti zedɣeɣ deg-s. Vennuɣ-d tiktiwin-iw ula d nekk am wakken i d-ivennu winna d-yeṭṭfen tiwriqin ɣer Ṭawes; yeqqar-itent, ivennu-d taḥkayt s tissin d tuɣalin gar tewriqin-nni almi d-yesnulfa tayeḍ; d taḥkayt-is neţa.
Mi qqareɣ ungal-a, tikkwal ţḥulfuɣ iman-iw d tamrurit axaṭer ur lliɣ ara d iman-iw. D timetti kan iyi-isseḍfaren. Mi qqareɣ ungal-a, ţḥulfuɣ i yiman-iw d amuḍin, ţḥulfuɣ i yiman-iw d Ṭawes tafremlit neɣ d Ṭawes; tameddakkelt n umuḍin, ţḥulfuɣ i yiman-iw d ṭṭviv neɣ d yemma-s n ṭṭviv, tikkwal ţḥulfuɣ iman-iw d imeɣri, d awadem, d amsezɣan, d timeţi d ddin, d tikti, …
Qqareɣ ungal-a, fessiɣ deg-s, am uεeqqa n ssker deg lkas n waman, am uεeqqa n rrmel deg teɣzi n sseḥra… Qqareɣ ungal-a, ţḥulfuɣ s ccvaḥa n tiṭ i yeţcemmit yilleḍ, s wazal n tkatut sdat n tatut, ţḥulfuɣ s lferq gar wass-a d uzekka… ţḥulfuɣ s wawal d unemgal-is, s tikti d tnemgalt-is, … Qqareɣ ungal-a, ţemmɣeɣ seg tugna n uɣaniv ɣer tayeḍ, am tceṭṭaḥt n lbali; yesseḍfaren tafekka-s ɣef wanya n uẓawan aleqqaq idehhnen allen d yimeẓẓuɣen.
Qqareɣ-t stummuneɣ taqvaylit-nni yuffafen, tinna akken icevḥen, tin ur nexliḍ ara. Taqvaylit-nni yemsel uḥeddad, yessuffeɣ-iţ-id d taɣawsa, d asevdad, d udem… Qqareɣ-t, ur vɣiɣ ara ad yekfu. Qqareɣ-t kan s ţawil. Qqareɣ-t, qqareɣ-as ungal-a, yessuli aswir n tsekla taqvaylit ar tqacuct.
Nasima Xuxi (Tafrara At Wejquq )