Mačči d tikkelt tamezwarut i nesla i wawalen-a, s yal tutlayt, seg yimi n wid d-issasen yal tazalɣi/médaille di yal addal : « je dédie cette médaille au ‘’monde arabe’’ (2024) !…. à la femme arabe (2000), à la Palestine… »
Zun Izzayriyen ḥemmlen ugar timura nniḍen, armi ttun tamurt-nsen akked watmaten-nsen.
Ugur, mačči d awal inna umyurar mi yufrar di yal addal ; ugur ikka-d sɣur wid i yas-innan si deffir, ayen ara yini, amek ara t-yini : d iqeddacen-nni n udabu yellan deffir-s, zun amyurar-nni d anzel n tsertit-nsen, d aberraḥ d udellel i tsertit-nsen, anida tezwar Palestine, Polisario, monde arabe, femme arabe, rue arabe…
Tikli-ya mačči d tamaynut, d ayen illan si zik n zik : Izzayriyen (Imaziɣen akken llan) bedden d imenzan/mercenaires n yal adabu n berra, send ad bedden d afrag ɣef tmurt-nsen :
Imaziɣen llan d imenzan n udabu n Carthage, d iserdasen i yessawḍen imenɣi ɣer Urupa mgal Roma (guerres puniques I, II, III) ; amezwaru deg-sen, Maherbal, illa d jiniral ɣer yidis n Hannibal ;
Imaziɣen kecmen d imenzan n udabu n Ruman, snegren tamurt n Tmazɣa/Numidya, si mi yettwaṭṭef Yugerten ; Gauda (gma-s n Yugerten) izwar sdat-nsen asmi serɣen Gafsa ;
Imaziɣen ddan d imenzan n udabu n yinselmen n Damas, zegren illel Agrakal, kecmen tamurt n Spanya ;
Imaziɣen bedden d imenzan n Idris I, sbedden adabu n tgelda taârabt-tineslemt di Merruk, tuɣ aẓar armi d ass-a s tgelda n Muḥemmed VI ;
Imaziɣen llan d imenzan n udabu n Turk, di Lezzayer d Tunes, ugar n kraḍ n leqrun, srewten tamurt, tekksen iqerra, seddan ṭṭrad n tibbandit n waman deg yillel Agrakal (piraterie en Méditerranée) ;
Imaziɣen ddan d imenzan n udabu n Fransa si 1830, di yal ṭṭrad ameqqran n umaḍal n 1914-1918 akked 1939-1945, ddan d imenzan di ṭṭrad n Lezzayer (azal n 100 000 n yemdanen, gar lḥarka, GMS, mokhaznis…).
Deffir 1962…
Tasertit n Lezzayer si deffir 1962 teslul-d imenzan imaynuten i yerran tasertit n Lezzayer ɣer deffir, zzewren tasertit n ‘’monde arabe’’, n Ligue arabe, s yisem n néo-FLN.
D abrid-nni ideg idda ukabar n tmeṭṭurfit tineslemt (FIS akked yerbiben-is), mi kan d-ilul di 1989, akken ad yaɣ amkan n néo-FLN, ad ikkes tacacit-nni n « tiers-mondisme », ad as-iqqen i tmurt lḥiǧab n tinneslemt.
Innulfa-d usalu n timmenzent n taârabt-tinneslemnt (« esprit mercenaire arabo-islamiste ») i yessaɣen s tedrimt tameqqrant n igelliden n pétrole.
D tasertit-nni i iteddun ass-a di tmurt n Lezzayer, ddaw ufus n udabu ibedden deffir Bouteflika. Adabu-nni iteddu ad yeg tameɣra tameqqrant i wass n 7 ctamber d-iteddun, ad yerr tajmilt i wid d-issasen yal tazalɣi n wureɣ… i ‘’monde arabe’’.
Maca, mazal ur tengir ;
Awal n Djamel Sedjati iga zun d ayamun, ibeddel abrid, yerra-d tamuɣli ɣer tmurt-is, inna : «Je dédie cette médaille à tous les Algériens ! » ; am akken tezwar yakan Hassiba Boulmerka di 1992 : « Je dédie cette médaille d’or à Mohamed Boudiaf ! ».
Ulac adabu izemren ad ikkes asirem…
Aumer U Lamara
Timerna / Notes :
1. Ismawen n Izzayriyen d-issasen tazalɣi seg wuraren olympik (JO) : Hassiba Boulmerka (1992), Noureddine Morceli (1996), Nouria Benida-Merah (2000), Taoufik Makhloufi (2012), Hocine Soltani (1996), Imane Khelif (2024), Kaylia Nemour (2024), Djamel Sedjati (2024).