Ulac awal ara d-nernu ɣef usekkak iteddun ussan-a di tmurt n Lezzayer. Mačči d ayen iḍerrun di tmura. D amezgun !
Tella yiwet d tamaynut, acku tamurt n Lezzayer tesnulfa-d ayen ur nelli, terna tardast ɣer sdat : d aneɣlaf n temsal n ugensu (ministre de l’Intérieur) i ibedden d anemhal n temsizzelt/directeur de campagne n udabu yellan !
Azamul-is i yal Azzayri yefra : win ur nefriḥ, ad iɣeẓẓ tibṣelt !
Tuttra tameqqrant d uguren illan di tedbelt/administration n tmurt n Lezzayer :
- Amek ad as-neg azal i yal tafrent (anida ara yekkes usekkak deg uẓar) ?
- Amek ara tbedd tedbelt n tmurt d tarawsant/neutre, ur tmal akka neɣ akkin, di yal tafrent i uselway n tmurt ?
Ayen illan ass-a :
1. Tamsalt n wazal akked leqder n tafrent, n wazal n tigawt n udɣer/lbuṭ (acte de vote) n yal amdan, nura-d fell-as yakan deg uɣmis Le Matin d’Algérie (2).
I wumur ameqqran n Izzayriyen, d udem n tiḥila kan i yellan ass-a akken yiwen ad iṭṭef amkan ; ɣas tifranin n tɣiwanin (APC) rrant-d azal i tafrent, acku yal taddart, yal akabar ibedd issenqad akken ur d-ittili usekkak.
Ass-a, 60 iseggasen deffir 1962, néo-FLN iwwet armi yekkes azal i tafrent akken tebɣu tili. Taneggarut d tafrent aselwit/élection présidentielle. Iwweḍ usekkak-nni agensu n ikabaren, akken ad sbedden wa neɣ win s yal taḥilet. Acḥal d akabar ideg ikker wukkim ger imeɣnasen-nsen.
2. Tadbelt n tmurt n Lezzayer ikcem-itt uwekkiw n néo-FLN, armi ur telli talast gar tedbelt akked ukabar n FLN. Akken akk llan wid illan d unnigen di tedbelt, d inemhalen, nutni llan d iserdasen n ANP neɣ n FLN. D ayen uran acḥal d aseggas deg uzref : « asaḍuf 120 / article 120 », yal anemhal n tedbelt, issefk ad yili d amaslaḍ/membre n FLN.
Ass-a tamsalt-nni teslul-d tadbelt iqqnen ɣer « udabu » (d FLN neɣ d ikabaren d-ilulen seg-s ; gan-asen isem « ikabaren n tselwit/partis de la majorité présidentielle).
Tadbelt-nni teslul-d iḍelli kan agraw n ANIE (Autorité Nationale Indépendante des Elections), ANIE ur telli d tilellit, ur teffiɣ seg ufus n néo-FLN, tezga-d d taqeddact n udabu, d afus n usekkak.
Ur tezmir ad d-tili tefrent iwatan s tedbelt illan ass-a di tmurt n Lezzayer.
Amek i d ixf-is ?
Ɣas ulac tareẓmi/solution iteddun zun d taryact di yal tamsalt, izmer yiwen ad iwwet ad d-yaf abrid nniḍen.
Takti tamezwarut i nsell di tmurt n Lezzayer ur telli d abrid : « ad nɣer i tmura nniḍen ad d-asent, akken ad sbeddent tafrent zeddigen di tmurt n Lezzayer ! ». Mačči d abrid, d awal n wurfan kan n wid ikksen asirem.
Agraw n ONU neɣ timura nniḍen n umaḍal ur zmirent ad frunt uguren n yiwet tmurt ma ur kkirent akken ad ten-frun yimezdaɣ n tmurt-nni.
Teqqim-d tebburt di tlalit n ugraw amaynut i tifranin, agraw ur nettili deg ufus n tedbelt (am akken tella ass-a tedbelt n ANIE), d win ur nettili ddaw tecḍat n ANP, d win ur nettili deg ufus n ukabar-a neɣ n ukabar-in.
Issefk ad yili d agraw nnig ikabaren, ur iteffeɣ akkin i ufus n iɣarimen.
Amek izmer ad d-ilal ugraw-nni ilelli ?
D win i izemren ad ibedd di yal taɣiwant (APC), s tafrent ur deg illi usekkak, syin ad ibnu taseddart nnig tayeḍ arma d aqerru, ad iqqim d agraw anida ur izmir ad t-ismil yiwen akka neɣ akkin, « ur ittnuz, ur irehhen ».
Tagejdit-is ad tili d aẓeṭṭa n tfurmatikt anida ur ittili usekkak, anida yal Aẓẓayri ad yizmir ad iẓer ayen illan si tseddart ar tayeḍ. Uget n tmura i yas-igan abrid-nni ; ur illi d awezɣi.
Ma d ayen iḍerrun ussan-a di tmurt n Lezzayer, ur illi d ayen iffren i tiṭ n tmura, ur irni iseɣ i tmurt n Lezzayer.
Aumer U Lamara
Timerna / Notes :
1. Awal illa yakan s darǧa : « leɛɛab Ḥmida, reccam Ḥmida ». D awal i d-ismekta Mouloud Hamrouche di tafrent taselwit n… 1999 !
2. Aḍris deg uɣmis Le Matin d’Algérie :