Yiwen wass Weḥsen yeccekta-yas i wemdakkel-is Lḥanafi, yenna-yas:
-Ass-agi a Lḥanfi a gma a k d-ḥkuɣ!
-D lxir a Weḥsen! Ini-yi-d, i wacu i nella d imdukkal ihi!
-Ur ḥṣiɣ ara akk amek ara k-id iniɣ!
-Nniɣ-ak ini-d, ur ttseḍḥi wara, imdukkal gan i wannect-a.
-Ihi tḥeqqer-iyi Myassa, tameṭṭut-iw. Teqḍeε deg-i nnefs. Ur iyi d-iṣaḥ ara ad d-neṭṭqeɣ. Tura ur gziɣ amek ara xedmeɣ.
-Ma ad-iyi taɣeḍ awal, ad ḍebbreɣ fell-ak a Weḥsen.
-I wacu i k-id cektaɣ ihi!
-Ihi bru-yas i Myassa, nekk a tt-aɣeɣ. Syina ad ttwaliḍ.
Weḥsen iεedda ixdem akken, yebra-yas i Myassa. Ɛeddan wussan, yuɣ-itt Lḥanafi.
Smana-nni kan tamezwarut yesreɛreɛ-d weɣyul deg udaynin, Lḥanafi yeddem-d tafala (lbala), yeɣli di lkarta n weɣyul ameɣbun. Deg wassen, Myassa teṭṭef-itt tugdi, tettɣimi kan di teɣmert. Tenna-yas : « Ma ixdem-as i weɣyul akka-ihin, d acu ara yixdem i nekkini! »
Yiwen wass Weḥsen yemlal-d Lḥanafi, yesteqsa-t :
-Amek ihi, tameṭṭut-nni?
Yeḥka-yas-d amek i s-yexdem, yenna-yas :
-Deg wassen am win yeccektan i Ṛebbi. Tura nekk a s bruɣ, keččini err-itt. Atan tura twalaḍ amek ara txedmeḍ.
Myassa tuɣal s axxam-nnsen, kra kan yerra-tt Weḥsen. Azekka-nni qqimen, alami ata yesreɛreɛ-d weɣyul deg udaynin. Weḥsen ur yelli d aεezzam, yemmeɣ yeddem-d tafala, yekker ad iruḥ ar udaynin, tenna-yas Myassa :
-Ur ttεeţib ara iman-ik a Weḥsen, fiḥel ma tebbiḍ dnub n weɣyul ameɣbun, sres iman-ik, keččini ssneɣ-k.
Ahmed Aït Bachir