Yidir Awjεud si taddart n Tala Leɣrus. Yidir Awjεud, d amjahed ameqqran di lgira-nni gar Lzzayer d Fransa. Yidir mussan di temnaṭ-nnsen, yesarwa-yasen lemṛar i lεeskar n Fransa. Yiwen wass, yeḍra-d yiwen lakruccaǧ ameqqran, deg yefri ukarmus.
Lεeskar n Fransa ussan-d deg waṭas yid-sen, imjuḥad wwten alami dayen ur zmiren. Kra deg-sen mmuten, kra selken iman-nnsen rrewlen, kra ṭṭfen-ten s uffus, i deg yettiki Yidir Awjεud.
Wwin-ten ɣer lka, Yidir Awjεud ṭurṭurin-t, ccudden-t, kksen-as εeryan akken i t-id ssεa yemma-s. Wisen amek i yexdem, yefsi-d cced-is, yeseɣfel lεeskar irwel-asen-d. Deg webrid, iwala tarbeεt n tlawin ar yiwet n tebḥirt, yesawel i yiwet deg-sent, yenna-yas :
-Nekk d Yidir Awjεud, ur ttaggad-mt ara. Wali tin id -yelsan deg-kent snat n tqenddyar, ad d-kkes yiwet, ǧǧem-tet dina, ruḥ-mt s axxam, ur ttaggad-mt ara. Yidir yelsa taqenddurt-nni, yefka-t tazla s axxam-nnsen.
Mi yekcem di tewwurt n wexxam, Dda Wesεid, baba-s, trekb-it lxelεa, axeṭar yeḥsa mmi-s ṭṭfen-t-id lεeskar d ameḥbus, ihi ttarewla i sen d-yerwal. Yenna-yas i Yidir :
-Anaɣ a Yidir a mmi acimi i d-rewleḍ ɣer wexxam, tura kan ad d-awḍen lεeskar ad qelben axxam!
Dɣa ur yelli d aεezam, yeddem-d tasupirt, yeččur-it d seksu d useqi, yeṭṭef abrid ɣer lka. Yewweḍ ar ubaryir n lka, iwala-t-id Ḥmaddac abayuε, yaεna-t-id. Yewweḍ-d kan ɣur-s, yewwet-it s lbbunya, yeseɣli-t ar lqaεa. Dda Wesεid ageswaḥ yekker-d, yefka-yas tasupit-nni i Ḥmaddac, yenna-yas :
-Ttxil-k a Ḥmaddac a mmi, fek-as cwiṭ n seksu yagi i Yidir inu, fiḥel ma yemmut s laẓ.
Ḥmaddac yerna-yas-d lbbunya i Dda Wesεid, yenna-yas-d :
-Meḥsub ur teḥṣiḍ ara Yidir inek yerwel!
-Ɣef wudem Rebbi a Ḥmaddac a mmi, m-ur d-iyi tenniḍ anida i tenɣam, ad d-ṛuḥeɣ ad t-id awiɣ ad t-neṭṭleɣ!
Ahmed Aït Bachir