Nettat, amezwaru di sebaâ warraw-is i d-turew di taddart-agi n Udɣaɣ, Belqasem, ad yili di laâmer-is rebaâin n sna, lakin teqqim kan « n Tbilbuzt » i d isem-is.
Di sebaâ-yagi d-turew akked Ḥmiṭuc, snat kan n teqcicin, neɣ aâd d tilawin imi nutenti s yiman-nsent zewǧent, s warraw-nsent, ass-agi llant deg yixxamen-nsent. Qqimen yergazen, aneggaruu deg-sen d ilemẓi, ixeddem, dɣa d netta i wuɣur llan tura nettat d umɣar, Ḥmiṭuc. Wiyaḍ :
Belqasem : ussan-agi yaâddan i iruḥ ɣer Fransa. Iǧǧa tameṭṭut-is d snat yess-is, deg yiwet lḥara, lakin aâzlent ɣef yemɣaren. Iceggaâ-asent neɣ yeǧǧ-itent i laẓ.
Wis sin :
Saâdi : dagi di tmurt, di lḥara, ula d netta, yaâzel s tmeṭṭut-is, d uqḍar n warraw-is.
Wis tlata :
Ferḥat : dagi diɣen yakk yiwet lḥara, yaâzel s tmeṭṭut-is d sin neɣ tlata warraw-is. Netta, cwiya, ɣef leḥsab n lweqt, iḥmed Rebbi. Lakin akken llan akk, ulac gma-s neɣ tameṭṭut ara yefken i tayeḍ ula d tasafut.
Wis rebaâ :
Laârbi : netta mazal-it ar ass-a d aâsekriw, di Lezzayer. Aṭas aya ideg iruḥ, lakin tura la t-ṭṭammaâen, qrib ad d-yas.
Tis xemsa akked setta, d tiqcicin, nenna-t-id, zewǧent, ulac-itent.
Wis sebaâ :
Rabeḥ : d ilemẓi-yagi yezdin d yemɣaren. Staxren-t-id di lakul. Juhra akked Ḥmiṭuc, ass-nni mazal-it d aqrur, nnan-as : « ala keč i yaɣ-d-iqqimen, ad txedmeḍ fell-aneɣ. Daɣ netta, ulamma d « ilemẓi », lakin a Rebbi ma di laâmer-is rbaâṭac neɣ xemseṭṭac n sna. Yagi ifassen-is debɣen, neɣ meččen s lǧir n imassuten, neɣ ččuren d icelfax n umencar d ugelzim. Ma d zwaǧ, taswiɛt-agi ur d-ilhi netta, imɣaren ur as-t-id-ttadren. Ihi yeqqim kan Laârbi ur nezwiǧ ara ; winna asmi ara d-iffeɣ si laâsker, yusa-d, sakin…
Lemmer ɣef akken qqaren « tamɣart » i tmeṭṭut ara yimɣuren di laâmer, Juhra mačči d tamɣart. D arraw-is, am Belqasem, am ula d Saâdi i meqqren, ɣef ukmac, d uffermec, d ccib n tmira-nsen. Tabilbuzt, nettat ur tesaâi ara aksum ara yimɣuren. Wezzilet, tebded, ma d iɣsan ur d-ttbanen ara akken ad iẓer bnadem ma qedmen neɣ meẓẓiyit. Ma d acebbub-is… timeḥremt neɣ d sebɣa. Llant di teslatin-is, am tmeṭṭut n Saâdi, ladɣa tameṭṭut n Ferḥat ur tent-tettif ara s « temẓi » segmi aâni sugtent timennufra, neɣ ahat ula d cwit n lihana. Ad ternuḍ, lḥasun, tigi yettrebbin, akka d lebda, cuɣlent kan d lbejɣaɣed-nni nsent, ur d-ttelhayet ara d ucebbeḥ neɣ d uwennaâ n iqudam-nsent.
D Tabilbuzt i d sebba n beṭṭu n warraw-is akken llan. Lukan ɣef leḥsab n lqella n trika ideg llan, ur saân akken ara ferqen. D lemḍerra kan, mačči d nfaâ, ara sen-yilin mi mebruzzaâen. Lakin i tlata imeqqranen msetbaâen ɣer waâzal, mkul yiwen yaâna cwiṭ n texxamt i t-id-isaḥen di lḥara. Argaz iteddu ɣer wakken ara yewqem axxam-is i yiman-is, s tidet. Lakin atan ittas-d laâkes mara tecrek lḥara ideg ara yezwir wawal n beṭṭu.
D tislatin, neɣ d irgazen-nsent, neɣ d Tabilbuzt ay dir ? Anwa iḍelmen deg-sen ?… kra n win iwumi ara teḥku nettat, tettɣiḍ deg wakken ɣur-s lḥeqq, d nettat i yettwaḥeqren. Irna wiyiḍ, am teslatin, am yergazen-nsent, laâmer ḥkin i ḥed, laâmer cetkan i yiwen s temɣart n yemmat-sen ? Tabaɛ, lḥasun, ula d lǧiran-nsen, lemmer d ara cehden s lḥeqq, d nettat kan iwumi sellen kull ass, ass kamel, nettat d imeṭṭawen di lḥara-nsen.
Belaïd At Ali
Timerna/notes :
1. Lbejɣaɣed : imettiḍen, imeẓyanen, igurdan, llufanat…
