Di 22 furar 2020 i d-iffeɣ uɣmis Tiɣremt, ayalas (quotidien) i yuran s tmaziɣt. 

Ffɣen-d 5 yeɣmisen, nzan, ɣran-ten di yal tama n tmurt. Mi yefka wegraw usiẓreg aɣmis wis 6 i l’imprimerie nationale, akken ad d-iffeɣ d lkaɣeḍ, adabu ifka-d rray-is : Ur d-iteffeɣ uɣmis acku yura s isekkilen n tlatinit !

Adabu n Lezzayer, ɣas ur illi uzamul, ur d-ifki aḍris yuran si tama-s, inna : « issefk aɣmis ad yaru s isekkilen n taârabt neɣ n tifinaɣ ». (1)

Atan wayen illan ! Ar ass-a teqqim akken. 7 wagguren zrin, aɣmis Tiɣremt ittwagdel.

Tikli n udabu n wass-a tban am uzal. Ad iwwet akken yufa akken ad issenger tamaziɣt di tmurt-nnaɣ. D win i d abrid-is, ayen nniḍen afella kan i yerna. Adabu n wass-a ur d-iffiɣ seg usalu n ‘’taârabt-tinneslemt’’.

Tamsalt n uɣmis ‘’Tiɣremt’’ tesban-d udem n udabu n tidett, tesban-d tiḥḥerci swayes i yedda. Maca, Anwa i d adabu i igedlen Tiɣremt ?

Nezmer ad d-nini ass-a, ur illi d adabu d-ibanen, win i ẓerren Izzayriyen : aselway n usekkak, Abdelmadjid Tebboune, akked ineɣlafen-is, neɣ agraw aɣelnaw, neɣ igerwan nniḍen iqqnen tamurt. 

Yiwen umedya, di tafrent izrin n 12/12/2019, ahil n A. Tebboune s tmaziɣt, yura s isekkilen n tlatinit («Comment ose-t-on suspendre Tighremt pour cause de graphie latine lorsque c’est dans cette même graphie qu’a été rédigée la version amazighe du programme électoral du président Tebboune ? »). Ur d-ikkir yiwen ad igdel ahil n A. Tebboune !

Izzayriyen akk ẓran mačči d adabu d-ibanen i yeṭṭfen anzel. D iserdasen si 1962, d nitni ar ass-a. D général Gaïd Salah (2) i igedlen annay amaziɣ di yunyu 2019, ass-a d général nniḍen akked wid am netta i igedlen aɣmis Tiɣremt. Tamsalt n isekkilen d tasebbiwt kan. Tidett, ur qbilen ad tbedd tmaziɣt di tmurt n Yugerten !

Mazal-iten qqnen deg wawal-nni n Ben Bella n 1962 : « Lezzayer d taârabt ! D taârabt ! D taârabt ! ».

Uguren illan zdat tmaziɣt akked tugdut di tmurt-nnaɣ ur zmiren ad frun skud illa udabu n userdas, adabu ‘’n at ukaskiḍ’’. D tin i d tamrit taneggarut i d-izgan di tnemmast n ubrid, i d-ireglen abrid n tugdut.  

Azekka nezra ad sbedden tamenḍawt tamaynut s tḥila. D tafellaḥt-nsen, ssnen-as. Tamezwarut ad sluɣen aktay n umenzu n nunamber 1954, ad gen ammus d iselwan i wid akked tid immuten af tleli n tmurt, tis snat ad wten ad srewten tallit akken ufan.  

Taggara, afus iwten ẓran-t akk Izzayriyen. Ass-a d agdal n uɣmis Tiɣremt, d annay amaziɣ, d tawekka deg uselmed n tmaziɣt (enseignement facultatif !), d aseḥrec n imeṭṭurfan inselmen akken ad sxerben tanekra tameqqrant n furar 2019.

Yiwen ubrid i yellan : d tadukli n Izzayriyen deg usalu n talwit, d win kan ad ten-isnegren wakali.

A.U.L.

Timerna / Notes :

(1) une source ministérielle a signifié via un SMS, au directeur de publication du nouveau journal de remplacer le caractère latin par le caractère arabe ou tifinagh sinon ce sera la suspension pure et simple de ce premier quotidien en tamazight […. ]Si la suspension de Tighremt pour cause d’un caractère non arabe d’impression pouvait assurer la promotion du tamazight, pourquoi ne pas commencer, pour la même raison, par dissoudre un à un les établissements scolaires et les départements de langues et cultures amazighes de Béjaïa, de Tizi-Ouzou, de Bouira, de Batna, de Tamanrasset et de l’ENS Bouzaréah ? » […] « Comment ose-t-on suspendre Tighremt pour cause de graphie latine lorsque c’est dans cette même graphie qu’a été rédigée la version amazighe du programme électoral du président Tebboune ? », s’interroge l’équipe de rédaction du journal lancé le 22 février 2020 à l’occasion du premier anniversaire du mouvement populaire » (Algérie-Eco, mars 2020).

2) En juin 2019, le général algérien Ahmed Gaïd Salah a fait savoir que le drapeau berbère ne serait désormais pas toléré dans les défilés lors des manifestations en Algérie.