Di temdint n Maastricht (Hollande), tanedlist/librairie tameqqrant (ẓer ttwira), tella yakan d tamesgida/lǧamaâ n Irumyen. Ass-a d amkan n temlilit n wid yesbedden tamussni nnig yal tamsalt.
Tamuɣli-nni tenbec aẓar n tismin ɣef wayen illan ass-a di tmurt n Lezzayer. And yebɣu yili yiwen, d tmara ad yerr tamuɣli ɣer wansi d-ikka, ad iqren ayen illan akkin akka.
Timura ufella frant timsal n ddin, kksent asɣen-nni yellan gar-as d udabu. Mačči d ayen d-yusan s wawal aẓidan kan ; di yal tamurt ikker wayhuh, uzzlen idammen, d wamek ffɣen annar wid iḥekmen ‘’s wawal n Rebbi’’, rran at tmurt d aklan-nsen.
Timura-nni ssnent amezruy-nsent, ẓrant ansi d-kkant ; ass-a gant-as afrag ur nrettem.
Di temdint n Maastricht neɣ anda nniḍen, tazeqqa n tamesgida tilemt tedwel d tanedlist i yedlisen/tiktabin akken ad tennerni tmussni di tmurt. Ihi, awa i d axxam n Rebbi ?
Azamul n tmuɣli-nni ur iffir : amdan yezwar ddin, neɣ ugar, ddin yella akken ad yili d ammud/lfayda i wemdan.
Mačči d abrid n wid ikkaten ad snegren tamussni : amedya n wid ihudden tamkerḍit n Alexandrie di zman n zik (1), akked wid ilemden si twaɣit-nni, l’OAS i yesserɣen tamkerḍit n tesdawit n Lezzayer di 1962 (2).
Ugur d ayen illan ass-a di tmura yecban tamurt n Lezzayer, anda yekcem ddin di tsertit n udabu armi yezzwer ayen iggran ; amedya n ‘’lǧamaâ Lǧazayer’’ yufrar ; d aḍegger n imelyaren di tallit deg sbitarat n tmurt ur ufin isufar swayes ara dawin imuḍan akked wayen ara ččen neɣ ayen ad issizedgen imuḍan.
Taɣuri si tsertit n wass-a di Lezzayer :
Di yal amkan, yal tarbaât neɣ tiddukla tineslemt ara yekkren ad tebnu tamesgida, tamuɣli-s tebrez : akken ad d-tekkes amur si tezmert n udabu (ccan akked uzduz), akken ad teseddu ɣer zdat tasertit-is nettat, syen ad d-tessekcem tadrimt i tnekra-s n uzekka. Deg usalu n ṭṭrad n 1992 n FIS i teddun s wudem nniḍen, « seg ucrured ɣer tikli », xmat-xmat.
Tawaɣit tameqqrant d asɣen yellan gar tdukliwin n tmeṭṭurfit tineslemt (mouvement de l’internationale arabo-islamiste).
Akken llant teddunt deg yiwen umussu n ixuniyen inselmen (frères musulmans), akken tebɣu tili tmurt i ten-id-isseqdacen si deffir (Turk, Qatar, Emirates, Saâudya…). Iswi-nsen ur iffir : d tamhersa/colonisation n tmurt n Tamazɣa.
Afrag zdat n tsertit-nni, d tadukli n yal Azzayri yeddan deg ubrid n tugdut akked izerfan i bennu n tagduda tamirant (une république moderne), anda ddin ad iqqim kan d ddin, deg umkan-is.
Tanekra n furar 2019 tefka-d azamul, illa webrid-nni yessuffuɣen, illa ur irgil, acku yesdukel amur ameqqran n Izzayriyen. Ma d tasusmi n wass-a mačči d tiggugemt n lebda ɣas ččuren leḥbas n tmurt.
Aumer U Lamara
Timerna/Notes :
1) La bibliothèque d’Alexandrie, fondée à Alexandrie alors capitale de l’Égypte, en 288 avant notre ère, est la plus célèbre bibliothèque de l’Antiquité et réunissait les ouvrages les plus importants de l’époque. Le fondateur Démétrios, disciple d’Aristote, désira qu’Alexandrie devienne une nouvelle Athènes par la diffusion des connaissances, qu’elle soit comme un phare de la pensée mondiale ; elle est définitivement détruite suite aux conséquences de la conquête arabe de l’Égypte (642).
Souce : https://fr.wikipedia.org/wiki/Biblioth%C3%A8que_d%27Alexandrie
2) L’incendie de la Bibliothèque universitaires de l’université d’Alger le 7 juin 1962 constitue un crime culturel impardonnable ; il a été perpétré par l’Organisation Armée Secrète (OAS), avec probablement la complicité des autorités coloniales, a provoqué la destruction de 400.000 ouvrages et manuscrits inestimables, à quelques jours seulement du recouvrement de la souveraineté nationale, le 5 juillet 1962.
