Aberraḥ ikker : adabu ad yeg adiwenni ameqqran (dialogue inclusif), ad imlil akked yal akabar, akken taggara ad ibnu «un front interne soudé», d agraw idduklen, izdin, akken azekka ad yizmir ad iqabel yal ugur ad d-yasen. D ayen ilhan, mer d tidett.
Maca tadyant, illa wayen deg tezgel, adabu ur yuɣ abrid iwatan.
Deg wadeg adabu ad iɣer i Yizzayriyen, anda bɣun ilin, netta iɣer i yiqeffafen-nni itezzin deg ijufar n udabu, akken ad ččen talqimt. D wid illan iḍelli, d wid illan ass-a, d tikli-nsen azekka.
Timliliyin d-illan ussan-a di tzeqqa n El Muradya, ger Abdelmadjid Tebboune akked Mokri, Bengrina, Djilali, atg… d tabburt i d-ildin akken ad d-kecmen wid issazlen iḍelli idammen n Izzayriyen, ad dewlen daɣ d ‘’personalité nationale’’, am tallit-nni n Bouteflika. Ulac amaynut !
Deffir temliliyin-nni, yal yiwen seg iqeffafen-nni ikkat ad d-isseknu taciṭa ɣer tama-s, akken ad ikcem agraw, s « nniɣ-as akka, rniɣ-as akka i sidi aselway-nneɣ… »…
Yiwen ur isteqsa imdanen-nni : « i netta acu i yawen-d-inna ? Anda i iteddu uselway-a, anda i teteddu tmurt ? ».
Mazal-aɣ di tin n « yugar tiqersi, tafawett ».
Abrid i yuɣ udabu, mačči d win deg ara d-iffeɣ azekka wegraw ad isdduklen Izzayriyen ; tidett urar ittwassen, d adrum kan n tkerkas, akken ad isenned fell-as udabu, ad issezri tallit n ddiq. Taḥilett tettwassen di yal tamurt, d amezgun, yir amezgun.
D adrum i teddun ad t-sbedden mgal/contre Izzayriyen, mačči akked Izzayriyen.
Imussnawen di tmura nniḍen nnan : « yal ugur ad d-yawḍen, issefk ad yili d tagnitt akken ad tt-nfares, ad nelmed, ad nesnerni seg-s tamussni ». 60 iseggasen deffir 1962, tamurt tezzi s uzagur i tmussni. Mačči ass-a ara ibeddel udabu abrid… neɣ diri win ittaysen ?
Illa yiwen udiwenni ameqqran izemren ad ibeddel tamurt : d win ara gen Izzayriyen gar-asen. Tanekra n furar 2019 tenjer asalu amezwaru, ɣas ur issaweḍ ubrid, iban anda iteddu, acku d izerfan i d lsas n ubrid-nni.
Adabu yellan ass-a di Lezzayer, ma yelmed si tnekra d-illan, izmer ad ibedd, ad yaɣ abrid n yiseɣ, ad yili d azamul i bennu n ugraw ameqqran i d-ifkan aẓar seg uswir n Ifri-Uzellagen, akken taggara ad ibedd udabu amaynut ɣef tgejda n izerfan. Izwar-as ubeddel n logiciel.
Tikersi tamezwarut ara yefsin, zun d ccerṭ amenzu : ad tbedd timanit n tmurt n Lezzayer/autonomie de l’Algérie, ad tekkes tbarda i nerra i yiman-nneɣ, d kennu zdat timura n wagmuḍ s tsertit n taârabt-tinneslemt, armi neqqen cckal nɣil d axelxal.
Mi tekkes tkersi-nni, ad d-ldint tebbura, akk tibbura !
Aumer U Lamara
Timerna / Notes.
1) « Elles, elles, ar qabel ad ak-nales ! », d awal i qqaren i yikerri d tixsi, yal aseggas di lawan n tullsa n taduṭ-is. Ad ak-nales = ad ak-nɛiwed
Ales = recommencer, répéter, refaire, …