Akken ibɣu yili wudem n unagraw n APN ad d-iffɣen azekka di tasilt n udabu, d udem n usekkak (1). Mačči d win i fernen Izzayriyen, mačči d win i sarmen Izzayriyen. D APN Taïwan !

Illa deg wawal n tmurt-nnaɣ, di yal tamsalt, « d agraw i tent-iferrun ». Maca, wid iṭṭfen adabu ass-a, fran ad sbedden agraw-nsen d anzel gar ifassen-nsen akken ad sersen ugar iḍarren-nsen deg udabu.

Tasusmi-nsen ur tessawal/ur tɣar i wayen ilhan. Ass-a, seqqan-tt-id nutni, ad tt-frun nutni am akken uɣen tanumi xerrzen-tt si zik. Anwi iberdan i yellan ?

• Ad fken tamurt gar ifassen n imeṭṭurfan inselmen, MSP, Bina, akked wiyaḍ,

  - Advertisement -

• Ad rren tamurt i ‘’yimawlan-is’’ si 1962, FLN akked waklan-is n RND, TAJ, …

• Ad d-snulfun agraw s yimenzan/mercenaires ikecmen tafrent akken ad aɣen 30 imelyunen i waggur d wayen iteddun yid-s (ccan n yisem, takerrust, akal, tamussni n wid itekkan, les affaires…)

Akken ibɣu yili, ulac ayen ilhan ad d-iffɣen si tḥila-nsen. Ass-a, mačči d aggur n laâid i ggunin Izzayriyen, d yir talalit n wass n twaɣit.

Asirem illa ur ingir.

Zdat wudem aberkan n udabu i yeqqnen tamurt, iban-d usirem ameqqran n tarwa n tmurt i t-iqublen, di yal tama, di yal tiɣremt. D imelyunen n Izzayriyen ur nekni zdat udabu akken ad taweḍ tmurt azekka ɣer wanda tessarem.

Ɣas mazal amennuɣ deg ubrid n tugdut, deg ubrid n talwit, asurif amezwaru n umennuɣ ass-a d ibeddi tama n tirni n imeḥbas ittwacudden akked twaculin-nsen, d wid-nni yeqqimen i laẓ akken ad d-teffeɣ tiɣri-nsen seg ugadir n ‘’Alcatraz’’ (2) akked leḥbas nniḍen n tmurt.

Ɣas tamurt n Iqbayliyen/Adrar n Wuzzal (3) tenjer-d abrid i tnekra di talwit, tenna-d ur teqbil tiḥila n tafrent usekkak, ass-a tella di tlemmast n tnekra, acku Lezzayer yiwet i yellan. 

Yiwen ur izmir ad yeǧǧ tardast deg-s i yimeɣnasen n taârabt-tinneslemt, ixuniyen n igelliden n Wagmuḍ (Emirats, Qatar, …). D Bengrina neɣ d yiwen/yiwet nniḍen. 

A.U.L

Timerna / Notes :

1) Asekkak/contrefaçon : à l’origine du terme, contrefaçon de la monnaie turque.

La contrefaçon se définit comme la reproduction, l’imitation ou l’utilisation totale ou partielle d’un droit de propriété intellectuelle sans l’autorisation de son propriétaire ou de l’ Etat. Il peut s’agir d’une marque, d’un modèle, d’un brevet, d’un droit d’auteur (littérature, musique, …), d’un logiciel, d’un circuit intégré ou d’une obtention végétale… 

2) Alcatraz : d isem i yas-fkan i lḥebs amaynut i yebnan tama n Bgayet (Alcatraz : prison fédérale (USA) de haute sécurité (1934-1963) ; îlot dans la baie de San francisco) ;

3) Adrar n Wuzzal : Mons Ferratus, akken i yas-semman Irumyen (Ruman) i tmurt n Iqbayliyen, Kabylie.