Yiwet talast i yellan di Tmazɣa tameqqrant, d talast illan gar Libya akked Maser, akkin i Derna d Tobrouk (1).
Tilisa yellan ass-a gar Libya akked Tunes, gar Tunes d Lezzayer, gar Lezzayer d Merruk, akked talast gar Merruk d Muritanya, akken llant d tilisa n tmara i sbedden ‘’igelliden’’ n tallit-nni n imenɣiyen, di ‘’leqrun n tillas’’ (les siècles obscures), akken kan ad smeɣren akal-nsen d tezmert-nsen nitni. Ur llint d tilisa gar tmura yemgaraden deg wakal, deg yidles, deg umezruy neɣ tutlayt. Tamurt n Masnsen d yiwet, seg yixef ar yixef.
Ma tella tdukli iwatan i tmurt n Lezzayer azekka, akken ad tezdi akked tmura nniḍen, ‘’am iḍudan ufus’’, d tin n Tamazɣa tameqqrant i d-yusan seg umezruy aqbur, seg yidles ; mačči d asḥerkel n tdukli ur nelli, ‘’Liga arabiya’’, ur nebni ɣef tidett, ur ngi azekka si 1940.
Tazzla ass-a ɣer « énième sommet de la ligue arabe’’ n tḥila gar tmura-nni, akken ad dduklen ad aâzlen wa neɣ win, akken ad nebcen akka neɣ akkin tamsalt n Palestine, tefka-d udem n tsertit n tmurt n Lezzayer : tamuɣli n udabu, d tin n yerbiben n wagmuḍ (des vassaux du Moyen-Orient), wid ur d-negzim timiṭ seg weḥḍun n taârabt-tinneslemt.
Ulac ɣur-sen tamuɣli tilellit (une vision autonome) si tmurt tamaziɣt tameqqrant n Tefrikt Ugafa.
Liga arabiya tlul-d di yiwet tallit i yezrin, d tin i teǧǧa tsertit iddan di tallit-nni n iseggasen n 1940. Si tazwara-s tezgel, acku tebna ɣef ‘’uẓar’’ ur nelli. Tazzla n wass-a akken ad d-snekren alaxert, iban-d zun d tuzzya n tzizwit tadderɣalt : din kan.
Asalu n tsertit n Tamazɣa tameqqrant, si talast n Maser ar waman n Atlantik, d asalu ɣer tewsimt/tribu tameqqrant ara yezdin 5 tmura, azal 10 M km² s tiniri, nnig 100 imelyunen n imezdaɣ. Mačči d taqwirt n sin iɣallen idis n taddart.
Di tsertit, llan sin iberdan, ttwassnen : ad yeg yiwen tasertit-is, s wayen illan deg ufus, neɣ ad iwwet akken ad d-yaf afud, akken ad iseddu tasertit-is ɣer zdat, akken iwata (2). Amezwaru d asḥerkel din kan, wis sin d tikli n yimmal, d tikli deg ubrid n umezruy.
Tamuɣli n yimmal tebna ɣef tmuɣli ɣer zdat (vision politique), tezwar-as tukksa n icuddan i yeqqnen imdanen isertanen/politique, terna-yas tmussni.
Tukksa n tlisa gar tmura n Tamazɣa izmer ad yili d asurif amezwaru akken ad tezdi tmurt, d yiwet, s wudem iwatan, syin ad d-frun iberdan n yal annar (fédération, …). Mačči d ayen illan d awezɣi, ɣas llan wuguren di yal tamurt.
Yiwet temsalt tefra : mačči d wid illan ass-a di yal adabu, di Libya, Tunes, Lezzayer, Merruk, Muritanya, ara yeddun deg ubrid amaynut n zeddi n Tmazɣa, maca ma yeldi-d tabburt yiwen si tama, izmer ad ikkes akukru i wiyaḍ, akken ad gen asurif amezwaru. Ass-a, d akukru-nni i d cckal i paradigme amaynut.
Asalu i bennu n Tamazɣa tameqqrant zdat Urupa yedduklen (Union Européenne), ur izmir ad iddu akked yal tamuɣli n beṭṭu i yettenfufuden di yal tama. Tamsalt n temnaṭ n Asif Zeggaɣen (Seḥra n utaram/Sahara occidental) d yiwet deg-sent. Ferru n wugur-nni ad yili kan di zeddi n tmura, ad tebdd azekka di timanit-is, d tamnaṭ am yal tamnaṭ n Tamazɣa.
Asalu n bennu n Tamazɣa tilellit ur izmir ad iddukel akked tmuɣli n wid issarmen ad neqqen lebda d irbiben ɣer Liga arabiya… akked wid issaramen ad d-snulfun tilisa timaynutin di tmurt idduklen, tilisa gar Lezzayer d Tizi Wezzu, neɣ gar Batna d Seṭṭif, neɣ gar Metlili d Wehran…
D tidderɣelt, acku ur igi yiwen talast di tnemmast n wayla-s !
Mačči d ugar n beṭṭu i tesxes/teḥwaǧ tmurt-nnaɣ, d ugar n tegmatt ara yeddun deg ubrid n umezruy, di tmuɣli n Yugerten.
Tebrek d usemmiḍ n tesraft n Tullianum (3), ddaw tiɣremt n Roma, ad aɣ-ilin d azamul i usirem-nnaɣ, i tikli-nnaɣ yal ass ɣer tafukt n Tamazɣa.
Aumer U Lamara
Timerna / Notes.
1) Derna (adernu / iderna), d tamdint illan di Libya, idis n Tobrouk (Taberka), ɣer talast gar Libya akked Maser ; mačči d Derna illan deg At Budrar.
2) Deux façons de faire de la politique : faire la politique de ses moyens ou bien donner les moyens à sa politique (ad tefkeḍ afud iwatan i tsertit-ik, neɣ ad tedduḍ kan akken tzemreḍ, s wayen illan) ?
3) Tullianum, d isem n lḥebs n Roma, anda i yettwaṭṭef, i yemmut Yugerten, si laẓ d usemmiḍ.