Tiḥila di tsertit yiwen wudem-nsent : d tikli n izirdi !
Di tallit deg tenneqlab ddunit s ṭṭrad n Russia mgal Ukrainia, tilufa n Tdamsa n Trump, lbumbat yal ass di Gaza, imenɣiyen di Congo (RDC), timenɣiwt n Imucaɣ deg Azawaḍ di Mali… imeṭṭurfan inselmen/islamistes n Lezzayer kecmen-d annar akken ad d-ḥellin tamurt… n Palestine !
Maca, yiwet tmuɣli tesdukel-iten akked Waâraben n yal tamurt : mačči d tilelli n uɣref n Palestine i d aɣbel-sen : d nnger n tagduda n Israël i d iswi-nsen, syin ssarmen ad bnun tagduda n Palestine ɣef ixerban.
Si beṭṭu n tmurt di 1948, armi d 1967 (ṭṭrad n 6 wussan gar israël akked tmura taârabin), yiwet tmurt taârabt ur d-tudir isem n « tagduda n Palestine ».
Tanekra ussan-a n ukabar n Hamas-DZ (MSP) s tmeskant sdat tzeqqa n ukabar (1) di Lezzayer akked yal amkan anida tella tkemmict n imeɣnasen-nsen (tella yiwet video n tiddi-nsen di tesdawit n Tizi Wezzu, ma d tidet ?), tesban-d tiḥila yellan : mačči d tanekra, mačči d aẓeggi ɣef izerfan di tmurt n Lezzayer, mačči d aẓeggi akken ad d-ffɣen wid ittwarzen di yal anekraf, mačči d aẓeggi ɣef leɣla n war tilas n isufar n tgella di leswaq n tmurt n Lezzayer.
Tanekra-nsen tella-d akken ad ẓeggin si Lezzayer… i tlelli n uɣref n Palestine, ad nfun tanmahalt/ambassadrice n USA di Lezzayer.
D tiḥila ur neffir, mačči d ayen d-snulfan nutni.
Hamas-DZ n wass-a izwar-it yakan ukabar n ex. FIS di tazwara n 1990, asmi ulin imeɣnasen n FIS, d ajemmal s twuɣa, izwar-asen Ali Belhadj s tselsa n ṭṭrad/tenue militaire, ɣer tzeqqa n uɣlif n wastan (ministère de la défense) i yellan di Tigrin/tagarins, di Lezzayer tamanaɣt.
Ali Belhadj iqubel-it-id uneɣlaf n wastan (ministre de la défense), jiniral Khaled Nezzar, i yellan s tselsa taɣarimt/en tenue civile.
Acu i yessuter Ali Belhadj i jiniral Khaled Nezzar ?
Issuter-as ad d-yefk ibeckiḍen i yimeɣnasen n FIS akken… ad nnaɣen mgal Israël !
Gar Lezzayer tamanaɣt akked Tel Aviv, llan ugar n 4000 km !
Taḥilet-nni tban anida i tessaweḍ ; mačči d amennuɣ mgal Israël i d iswi n Ali Belhadj akked inemhalen n FIS. Iswi-nsen akken ad d-ṭṭfen uzzal, ibeckiḍen akken ad nnaɣen mgal tamurt n Lezzayer, mgal Izzayriyen. D abrid d-ibanen ɣer sdat.
Taggara, iserdasen n FIS-MIA ur ggunin ugar, kecmen lkazirnat n temsulta akked temrigt/armée n Lezzayer, nɣan, zlan irgazen, ukren-d uzzal swayes gan ṭṭrad mgal tamurt n Lezzayer, ugar n 10 iseggasen.
Izzayriyen akken llan ur ttun, ur zmiren ad ttun ayen iḍran di yal tamnnaṭ, ɣas ass-a susmen, rran-tt ɣer daxel. Irebraben nɣan, zlan irgazen tilawin,
- Nɣan imeqqranen imeẓyanen,
- Snegren imussnawen di yal amkan,
- Serɣen imettiḍen deg ixxamen,
- Hudden tizeɣwa, iɣerbazen, tiɣiwanin, tigenturin,
- Sersen lbumbat di yal amkan armi ula ddaw tmedlin di temqebrin n tmurt,
- Sguǧǧen tudrin, qqiment xlant ar ass-a deg idurar n Buzegza, Warsenis, Blida, Tihert, Iɣil-Izzan…
Ṭṭrad n FIS-MIA, GIA, GSPC… mgal tamurt n Lezzayer iqqim-d d awcem deg umezruy n tmurt, d awcem ur ntekkes di yal admeɣ.
Tanekra n wass-a n ukabar Hamas-DZ tettban-d zun d aseḥmu n wayen illan yakan, izri iḍelli. Amennuɣ mgal Israël d taḥilet kan.
Abrid-is iban, neẓra-t nekkni ; mačči i wammud/lfayda n Izzayriyen ; d iceqqiq kan i ttnadin ad t-afen akken ad zrin deg-s, d abrid ɣer tuṭṭfa n udabu n tmurt, ad aɣ-sbibben tarekt/tabarda n « Islamic republic of Algeria » (am akken yura deg wahil n Qatar, Emirats, Maser,… n watmaten inselmen)
Ma neǧǧa-ten…
Aumer U Lamara
Timerna / Notes :
1. Hamas-DZ : tameskant n imeɣnasen-is sdat tzeqqa n ukabar deg wass n 04/04/2025.
Ur tamaâ tafat anda tekket…
Kifkif dagh, a mas Ulamara. Nekni s yeqvayliyen ncuva Hamas-dz; amennugh d tmettant n yeqvayliyen i tlelli n Zdayer. Ass-a sawettnagh les élites negh armi ur nezri d acu yagh; armi t3erqagh la yella d aghrum ig-zwaren ´tudert n d tudert ig zwaren aghrum’.
Tiririt n wawal i mass « Bon pour moi » :
Tamezwarut ur ilhi ad iffer yiwen deffir yisem ur nelli d isem.
Diɣ, ilha ma tefkid-aɣ-d ayen tettxemmimeḍ keč ɣef umgared illan gar Uzzayri akked Uqbayli. Anida yella umagered-nni, ad nissin ayen ur nessin.
Taggara, ad ak-iniɣ : anef-asen i « les élites » di tlelli-nsen, yal yiwen/yiwet ad yaru neɣ ad yini ayen iẓra netta d abrid issefken. Imdanen, ur llin akk d « les khobzistes » neɣ d ixabten.
Neɣ wissen, ma tessarameḍ ad ten-tesqedceḍ i tsertit-ik, zun d « les intellectuels organiqes » n tallit-nni taberkant n parti unique !
Mazal d-neffiɣ si taberna !