23 juin 2024
spot_img
AccueilCultureJam K-Billy, gar usekfel d usemhez n tezlit taqbaylit-tamaziɣt

Jam K-Billy, gar usekfel d usemhez n tezlit taqbaylit-tamaziɣt

Tizlit taqbaylit neɣ s umata tamaziɣt telḥa-d asurif d azekrar deg wayen yerzan asenfali d usnulfu, ɣas ulama tizlit n zik tuɣ amḍiq deg radyuwat imi d win kan i yellan d aɣbalu n tilin ay deg ara d-ibin ccna d yidles amaziɣ.

Ddeqs i as-yennan idles-nneɣ imawi yetteḥnunuf deg umda n yidles ur nesɛi lsas, neɣ wid as-yeqqaren d inan ğğan lewḥuc asmi tessawal ddunit, d asbuḥri kan i ccḍeḥ d useftutes n temɛayin, maca tanzit n tezlit taqbaylit ɣur-s tigejda yeṭṭfen ageccuṭ deg takayin n yimdanen ɣer umennuɣ, aḥraz d usiweḍ n tgemmi tadelsant ɣer yidelsanen nniḍen.

Aya yeğğa-d later deg wayen ccnan yimezwura-nneɣ , ekk-d si tewrirt n Lbacir Amellaḥ ɣer tezniqt dda Sliman d Ccix Lḥesnawi, ternuḍ-d akka ɣer wat lfuci n wawal At Menguellat d wiyiḍ.

 Tin n wass-a am tin n yiḍelli, maca d udem kan ay deg mxallafen deg zerri n yiseggasen yenḍen ɣer yiwen yiswi agejdan iɣef ibedd ssqef n yidles Amaziɣ.

Am akken neẓra tizlit taqbaylit tcudd aṭas ɣer jjiḥ d lɣerba deg yiseggasen n 40 d asawen, imi tugett n yicennayen n lweqt-nni ur kkin ara deg tɛucert n wakal d yat wakal, aṭas deg-sen ay nfan, ula d tamettant-nsen d taɣribt, temgarad d tin n Si Muḥend u Mḥend yemmuten d aɣrib deg tmurt-is.

- Advertisement -

Inaẓuren n lweqt-nni i d-nebder aṭas deg-sen ur kcimen tamurt n lejdud ugar n 30 n yiseggasen, amedya : Ccix lḥesnawi yemmut d aɣrib, yenḍel deg tegzirt n la reunion, slimane Azem deg Moissac, Ccix arab buyezgaren deg Massy, Zarouki Allaoua deg Thias … Ula d ineggura-a yecban Yidir, karim Tiziouer mmuten d iɣriben ad fell-asen talwit.

  Nnig n waya ,ma nsukk-d tiṭ ɣef tasuta-agi ṭṭfen asdig meqqren deg uḥraz d usemhez n ccna n teqbaylit xersum ansay-nni yellan seg zik imi zgan ssiğhiden azrar n uẓawan d tmedyezt taqbaylit deg yimeḍqan icebḥen deg tmanaɣt n Paris, imi tizzelt-nsen akka i tebda deg leqhawi anda ttemlilen leqbayel deg yimalas , din ay tteksen lxiq d lḥir-nni n tmurt yeccaḍen ulawen-wen.

     Iseggasen-agi ineggura, tennulfa-d yiwet n tensayt yerran zzman-nni aberkan n jjiḥ d zzman n yijeğğigen d tnakurin n tiẓeḍt imi d ilmeẓyen yeɣran, ifehmen i yeṭṭfen asdig-nni ilem deg uẓawan n teqbaylit. Ma nerra taɣda n tmuɣli ɣef temsalt-a ay deg ad d-neglem tagnit yeldin akk tsuta-a tamaynut i yekksen aslef-nni yeqqazen deg wid iɛeddan , ad d-naf ilmeẓyen n leqbayel skeflen-d ansay-nni yellan d ukris  deg yiwet n tneɣlust icebḥen deg tmanaɣt n umaḍal lpari, ad d-naf  «Café de Paris » I d-yezgan deg uɣlad Ménilmontant deg tɣiwant n n Paris, 75011.

D yiwet n Tegrawt n yinaẓuren ɣef lmendad-nsen Belaid Branis mmi-s n Karim Abranis akked d Tmeṭṭut-is Nassima Chillaoui, imi sin-a gar tawuculin yettaẓen ɣer sdat akken yenna Tahar Djaout. Ineggura a slulen-d yiwet n tegrawt iwumi fkan assag Jam K-Billy I i d-suddusen yal ddurt, tettili ass lḥed ɣef 19ts d asawen.

Tansayt-a d tagrumma n yinaẓuren i d-yettemlilen ɣer yiwen usayez ilmendad n tezlit taqbaylit, d ummuɣ n tezlatin n teqbaylit i d-suturen yal beddu n tmeɣra akken ad yili usekfel d useğhed n uẓar adelsan, ddeqs n yinaẓuren i yettekkin deg tfaska-a, yecban Mokrane Achewwiq, d yiwen umaẓwan yettwasen deg umraḥ n uẓawan agraɣlan d wiyaḍ.

Timlilit-a n La JAM d tagnit i yilmeẓyen iwakken ad ilin d itran uzekka, imi d imɣan ara yegmun i tenzit n tezlit taqbaylit, d itran ara yeḍwin tafat i yidles-nneɣ afulki.

Tikti-a d asebɣes i wid ur nettunefk ara tegnit deg lmizan n ccna, imi lqaleb-ines d aseḥbiber, d asemhez n tgemmi d yidles n teqbaylit, d aleqqem n yidles ɣer yidelsan nniḍen, am akken d abernus n sser.

Acḍaḍ ad yerr ɣer tuyat, aya yessebgan-d lqedd n yimenzayen d wansayen, acḍaḍ wis sin ad yernu sdat ad yeldi ifer, aya d tamuɣli i tullya ɣer idelsanen d umaḍal akken ad d-nini ula d nekkni nettikki deg tɣerma n talsa.

     Jam K-Billy d tinẓi i tezrart n ccna n teqbaylit, d asekfel, d tajmilt imi yal ddurt ara d-yezzin ar tegnit n temraḥt-a ttaran-as tajmlit n yiwen gar yinaẓuren n ccna n teqbaylit , i tilin n waya , tura akka ssawḍen uṭṭun wis 78 d timlilit.

  Nessitim-asen i tegrumma n LA JAM K-Billy afud anezmar ara yesdakklen iɣallen i lebni d useggem n tgemmi n ccna taqbaylit.

Azzedine Abdous (Didine)

LAISSEZ UN COMMENTAIRE

S'il vous plaît entrez votre commentaire!
S'il vous plaît entrez votre nom ici

ARTICLES SIMILAIRES

Les plus lus

Les derniers articles

Commentaires récents