D Salima Souakri, taneɣlaft n waddal unnig (secrétaire d’État au sport d’élite) i d-innan awalen-a iḍelli (1).

D ayen ilhan aṭas ma yella tamurt n Lezzayer tbedd zun d afrag ameqqran, d agadir ur nrettem :

– ɣef zerfan n umdan akken ibɣu yili, d argaz neɣ d tameṭṭut, ad ikkes akkin buberrak n ‘’code de la famille’’ !

– ɣef uzref n yal amdan akken ad teddu teɣdemt tilellit, ur neqqin s tilifu ɣer yal adabu,

– ɣef tlisa n tmurt, Tamazɣa tameqqrant, ur d-tkeccem azekka tmurt nniḍen ad aɣ-tessehres leqrun nniḍen,

– ɣef tugdut n tidett akken ad ibedd udabu amagday, win ur d-neffiɣ seg ukaskiḍ di lkazirna neɣ si tcacit tamellalt n Ali Belhadj.

Maca awal n tneɣlaft Salima Souakri mačči d izerfan akked tilelli n Izzayriyen i d aɣbel-is. Tamuɣli-s, d asalu n systeme FLN, akken ad terr takmamt neɣ maḍi ad tessekcem ɣer lḥebs wid d-iccetkan di facebook.

Amzun ur ikfi Zeghmati i yessekcamen yal ass ilmeẓyen n tmurt ɣer leḥbas di yal tamdint, akken ad as-tefk tallalt. S yemdanen am wiyi, Ammar Belhimmer, Belkacem Zeghmati, Salima Souakri, atg, i yerran iman-nsen ass-a d ‘’Rebb Dzair’’,  ara tebnu azekka ‘’Lezzayer tamaynut’’ i tikli… ɣer deffi !

Tamurt-nnaɣ tessen yakan ‘’afrag ameqqran’’ (ligne rouge, frontière électrifiée,…) deg umezruy, maca mačči d aktay issefraḥen, d win n tallit taberkant, yal tikkelt :

– Ruman iga afrag LIMES, d aɣalad n uẓru i yebḍan tamurt n Tmazɣa ɣef sin, iwwet seg yixef ar yixef n Numidya (Lezzayer + Tunes). Tama ufella n ugafa d akal n temhersa i yeṭṭef Ruman, tama wadda n wanzul d tamurt tilellit. Limes iga d afrag akken ur d-keccmen Imucaɣ akked at Libya ad nnaɣen Ruman, ad sɣeẓẓen igran-nsen.

– Fransa tga sin ifergan imeqqranen n trisiti akked lminat, lignes Morice (2), yiwen ufrag gar Lezzayer d Merruk, wayeḍ gar Lezzayer d Tunes. Win iwten ad izri, ad immet s lminat neɣ s rsas  n laâsker n Fransa.

– Houari Boumediène isnulfa-d amaynut, iga afrag ameqqran ‘’virtuel’’, i yezzin i tmurt akken tella : irra Izzayriyen d imeḥbas di tmurt-nsen. Gan-as isem i ufrag-nni, ‘’autorisation de sortie du teritoire national’’. Tasarutt-is d ttriḥ yuran, illa deg ufus n imsulta.

– Deg iseggasen iberkanen, imeṭṭurfa inselmen n yal udem (FIS, AIS, GIA, GSPC, AQMI, …) gan afrag azeggaɣ n ujenwi : ddu yid-sen neɣ ad temmteḍ. Di tmurt deg fessren medden tazart d tini, nitni fessren iqerra n yemdanen immuten deg iberdan.

– Adabu n wass-a, s wudem n tkerkas n ‘’Lezzayer tamaynut’’, iga afrag i tlelli s ubrid amaynut : win d-iffɣen ad isuɣ, win iddmen annay amaziɣ, win d-innan tidett, win d-yuran urfan-is di fb neɣ anda nniḍen… ad ikcem ɣer lḥebs ! 

A wi yufan ad kksent fell-aɣ ‘’les lignes rouges’’, ad ikkes yal « afrag azeggaɣ », yal diktat i yeqqnen tamurt, akken ad tbedd tmurt-nnaɣ d TAMURT, swayes ur nettetḥi azekka gar tmura n umaḍal.

A. U. L.

Timerna / Notes :

1) Salima Souakri secrétaire d’Etat au sport d’ élite :  « Pour un petit problème, un athlète se plaint sur Facebook et menace d’arrêter sa carrière. L’Algérie est une ligne rouge. Je ne permets à aucun athlète de faire du chantage … » (Coup de gueule de Salima souakri, TSA 26/01/2020 ).

2) La ligne Morice était une ligne de défense armée constituée pendant la guerre d’Algérie, à partir de juillet 1957. Son nom provient d’André Morice, ministre français de la Défense. Elle a été édifiée afin de couper les combattants de l’Armée de libération nationale (ALN) de leurs bases à l’étranger…. (wikipédia)