Alɣu n udabu n Lezzayer n 7 yennayer 2026 / 20976, yif akk wid d-iffɣen yakan deg useggas amaynut.
Ur illi wayen iffren deg-s, ur illi d win d-innan « Ffɣen-d akk imeḥbas yettwarzen di yal asekraf n tmurt ».
Winna, azal n 45 imelyan n Izzayriyen ggunin-t am… aggur n laâid.
Alɣu d-issuffeɣ unabaḍ n tmurt n Lezzayer yufrar, ad d-ittuɣal yal aseggas acku iga am tedyant n ufellaḥ-nni yeččan uẓu n yiger i yessarem ad t-iẓẓu, akken ad d-imger ad isserwet, ad yerr ɣer tesga.
Alɣu : « Lezzayer ad d-taɣ amelyun n wakraren i tmezla, ilmend n laâid tameqqrant d-iteddun » ! (1).
Ur nessiɣzif awal ɣef temsalt ibnan ɣef tsertit n tidderɣelt.
1. Di yal tamurt, di yal tamnaṭ, yiwen ubrid kan i yellan akken afellaḥ ad isnerni, ad d-islal aqḍar n iɣersiwen : ad izwir ad d-yaɣ tixsi, taɣaṭ neɣ tafunast ara d-igren izamaren, iɣiden neɣ igenduzen, syin ad irnu, yal aseggas ad issemɣer alamma yuɣal d aqḍar. Imir, izmer ad izzenz, ad d-yaɣ ayen nniḍen, neɣ tikkal ad d-ifren ikerri… i tmezla n laâid, ma iwala izmer-as.
Amek i tezgel tmussni n tmurt i wid illan deg udabu, akken ad zwiren ad aɣen… amelyun n wakraren ur d-nettarew ?
Amek zzewren tiḥila n tsertit akken ad seččen aksum i Yizzayriyen s tedrimt n lgaz d pétrole n ddaw tmurt, win ur d-nxellef ?
Tuttra i nekkni, i yal yiwen : mačči d tamurt iteččen deg uksum-is ?
2. Tasertit-a n tmurt n Lezzayer tesban-d diɣ tidderɣelt nniḍen, ma yella d aɛâned, neɣ d tismin di tmurt n Saâudiya :
Yal aseggas, tagelda n Saâudiya tettaɣ-d nnig umelyun n wakraren i tmezla n laâid. Tettaɣ-d si tmura n Tefrikt n Wagmuḍ (Sudan, Somalie, Djibouti, …) akked Urupa (Roumanie, …).
Maca, ayen ur ẓrin at udabu n Lezzayer (neɣ ẓran, rnan qqnen allen-nsen s lebɣi-nsen, akken ad seddun tasertit-nsen) :
- Akraren i d-tettaɣ Saâudya, mačči d agerruj n tmurt (trésor) i ten-ittxellisen, d iḥeǧǧaǧen d-ittasen i ten-ittxellisen s tedrimt n Dollars akked Euros i sekcamen ɣer tmurt-nni. Zun d aseddeq i Rebbi : nutni ur zellun, ur ẓerren ikerri, ur teččen aksum-is.
- Akraren immezlen, amur ameqqran deg-sen ad aɣen abrid deg ifuga isemmaḍen, di tmesrufag, ɣer tmura nniḍen tinselmin. Saâudiya teznuzu akraren-nni (carcasses) i yuget n tmura : Iraq, Jordanya, Yemen, Mauritania, Bengladesh.
Tasarut :
Saâudya trebbeḥ snat tikkal : tzellu akraren i xellsen iberraniyen, syin trennu teznuzu-ten d aksum i tmura nniḍen, tessekcam-d tadrimt !
Tiḥila-ya teddunt akk s yisem n ddin ineslem… akked tidderɣelt n yinselmen.
Aumer U Lamara
Timerna / Notes :
1. Aḍris n ulɣu deg uɣmis Le Matin d’Algérie :
