Tadyant n Genzet (teḍra gar 1957 d 1962): iteddu yiwen, irkeb ɣef uɣyul, yuɣal-d si ssuq, d abrid ɣer taddart-is idis n Genzet.
Ur yuki mi d-ineggez yiwen userdas n Fransa ɣer tnemmast n ubrid, s ubeckiḍ gar ifassen, inna-yas s ẓẓga,
– Halte ! Tu viens d’où ?
Amsebrid-nni yedduqes, irfed ifassen-is, irra-yas s tefransit, akken issen
– Je reviens du pays des Arabes ! (‘’tamurt n Waâraben’’ = tamurt n uzaɣar)
Aserdas-nni arumi, iger tiɣri,
– Mon capitaine, il y a un homme ici qui revient du Caire !
Yal yiwen anida i yessers talast i tmurt n Lezzayer !
Anida yella wugur :
Amek izmer ad ibeddel uɣref aẓar, idles akked tutlayt s unekcum n ddin amaynut ɣer tmurt-is ?
Neẓra d ayen ur nelli, d ayen ur nezmir ad yili, d tikerkas kan. Maca, ansi d-kkant tkerkas-nni, anwi i tent-id-isnulfan ?
Deg iseggasen n 1930 i d-ilul umussu-nni n « El Ɛulama » inselmen, idis n Abdelḥamid U Badis, akken ad iqabel tamhersa n Fransa s taâkkazt n tinneslemt, akken « Izzayriyen ad idiren ddin-nsen », ur dewwlen d Irumyen. Ur illi yisem n tnekra i tlelli n tmurt.
Din i d-iffeɣ wawal-nni n U Badis : « aɣref n Lezzayer d ineslem, ɣer taârabt iga assaɣ » (1). U Badis ur d-inni « Lezzayer d taârabt ». Ass-a, d awal-nni i ddmen d allal yimeɣnasen imaynuten n « grand remplacement ».
Di tallit-nni, akabar n PPA-MTLD, d win iddan deg usalu-nni n El-Ɛulama, s tallalt n umussu n taɣelnaẓri taârabt n Chakib Areslan ; taggara MTLD issaweḍ ad irǧen amezruy, ad d-islal Lezzayer si tallit n tinneslemt kan, si lqern wis 7, di tira n rabul i yefka i ONU di 1948. Tazɣent d-ilulen di PPA-MTLD (crise berbériste) terna teqqen akabar-nni deg ubrid n tikerkas.
FLN, di ṭṭrad n 1954-1952, ur ifri tamsalt, zun ifka azuɣer deg ubrid n Messali, ifren asalu n taârabt-tinneslemt akked uselmed n taârabt. Ashetref n Ben Bella di 1962, mi d-inna « nekkni d aâraben », 3 tikkal, iga zun d tisusaf i umezruy, d tisusaf ɣer wudem n imelyan n Izzayriyen. Ben Bella yella d axuni n Ǧamal Abd el Naser di tallit-nni, Lezzayer tekcem di Liga aârabiya.
Kra n iseggasen ɣer sdat, terna-d tyita nniḍen s wawal n Ahmed Taleb Ibrahimi, aneɣlaf n usedwel : « nekkni d Imaziɣen, tinneslemt terra-yaɣ d Aâraben » (2). Ifra wawal ɣef uẓar d tmagit n tmurt n Lezzayer ! Aɣerbaz n Lezzayer ikcem aḍar afus di tesraft n taârabt-tinneslemt.
Timura tinselmin n umaḍal, icban Turk, Iran, Afɣanistan, Indonesia, Malaysia… ddment tinneslemt, maca qqiment d timura akken llant, s uẓar-nsent, s tutlayt-nsent, ɣas ssnent taârabt, selmadent ddin s taârabt, leqran-nsent s taârabt. Ur dwilent d taârabin, ɣas ddment isekkilen n taârabt i tira n tutlayin-nsent (3).
Ansi d-ikka umgared akked tmura n Tefrikt n Ugafa, tid issekcem yal adabu-nsent, di tsertit taârabt, di tmagit taârabt, zun d timura taârabin neɣ ugar ?
Talalit n tutlayt darǧa di Tefrikt n Ugafa
Arti/confusion i yellan gar ddin akked tmagit ikka-d si tlalit n tutlayt darǧa, tin iwumi semman « taârabt », ɣas akken amur ameqqran deg-s d tutlayt tamaziɣt.
Ur illi uɣref ameqqran aârab i d-ikecmen tamurt, igla-d s tutlayt-is, syin issenger aɣref amaziɣ i yellan di tmurt tamaziɣt, akken ad yaɣ amkan-is (gan-as isem : « génocide », « colonie de peuplement).
Ɣas llan-d uget n imenɣiyen gar iserdasen aâraben inselmen akked imezdaɣ imaziɣen di ṭṭrad iṭṭfen nnig 50 iseggasen, s imennuɣen di yal tama, s tuṭṭfa n imeḥbas, d irgazen neɣ d tilawin, wid/tid i wwin qqnen d aklan ɣer tmura n wagmuḍ, znuzun-ten din d aklan di leswaq n Damas, Beɣdad d Lqahira…
Maca, ur d-illi « grand remplacement colonial », am akken teḍra di Marikan si mi kecmen ɣer din wat Urupa, snegren amur ameqqran n imezdaɣ imezwura, ‘’Izandyanen’’, ṭṭfen amkan-nsen din.
Darǧa tlul-d deffir unekcum n tewsimin/tribus Banu Hilal di lqern wis 11 ɣer Tefrikt n Ugafa.
Deg iseggasen 1050 afella i tenti/tebda temsalt-nni. D amennuɣ gar yinselmen, gar usalu n ddin n iciɛiyen (chiites) akked win n at sunna (sunnites), i yellan di tallit-nni, i yellan ass-a.
Agellid n At Ziri (El Muɛiz U Badis) ifren ad iẓẓal di Qirwan s yisem n xalif aâbbasi n Beɣdad, iffeɣ seg usalu n xalif afaṭimi n Lqahira.
Imir, akken ad yerr ttar xalif n Lqahira, netta yefka-d ajrad n tewsimin Banu Hilal akked Banu Suleiman (4), i yellan yakan di teɣzut n wasif n Nil.
Ur iẓri yiwen acḥal n yemdanen i d-ikecmen tamurt n Tefrikt n Ugafa (50 000 neɣ ugar ?). Mi d-kecmen kan, srewten tamurt n Libya, syin d tamurt n Tunes, d aserɣi n tzeɣwwa n iɣerman, d ahuddu n wayen ibedden, d times i yigran, d ahuddu n tregwa akked timedwa n tfellaḥt.
D nnger i iteddun ittimɣur simal ɣer sdat. At Ziri wten ad gen afrag akken ufan s yal imenɣi, ajrad simal irennu-d.
Di tegnit-nni i yekcem wurar aberkan gar Imaziɣen : adabu n At Ḥemmad, ilmend deg ad ibges ad iqabel imnekcmen n waâraben Banu Hilal, ad yall At Ziri, nutni seddan taḥraymit akken ad rẓen adabu n watmaten-nsen, At Ziri.
Din i yebda useqdec n tewsimin taarabin n Banu Hilal zun d imenzan/mercenaires, deg ufus n igelliden Imaziɣen, yal yiwen ikkat ad ten-isseqdec, ad ten-isserkec, akken ad iwwet wiyaḍ. Gan-asen isem i yemnayen-nni itekksen iqerra, zun ɣef wudem n ddin ineslem : « Ijewwaden / lejwad », s tefransit « noblesse d’épée », am akken i t-yura Mustapha Lacheraf.
Amur ameqqran n Banu Hilal iqqim deg wakal n Tunes, amur nniḍen ikcem izuɣar n tmurt n Lezzayer, iddukel akked Iznaten i yellan ddren din, amur ameqqran deg-sen d ireḥḥalen am wat Banu Hilal.
Si tudert deg llan d ireḥḥalen/nomades, amur ameqqran n Banu Hilal issers tarekt, ddren d ifellaḥen, ma d tutlayt-nsen tebda tessaɣ i tmurt.
Ayen illan ifra :
Ihilaliyen ur kcimen deg udabu n tmurt tamaziɣt di yal tagelda ibedden (Imweḥden, Imrabḍen, Iḥefsiyen, At zyan, At Mrin, …), ur illi yisem n udabu aârab n Banu Hilal (5).
Banu Hilal ddren kan zun d amezrag, d tazmert n iserdasen deg ufus n yal adabu amaziɣ ikkren ad ten-isseqdec akken ad innaɣ akkin akka adabu amaziɣ yellan ɣer yidis-is neɣ i d-ikkren d acengu akken ad yaɣ amkan-is.
D tikli-nni i yeddan di tmurt tamaziɣt armi d tallit deg d-ikcem Turk tamurt n Tunes akked Lezzayer di lqern wis 16.
Ihi, ulac « grand remplacement » ?
Ulac « grand remplacement ».Takemmict n Ihilaliyen i d-ikecmen Tamazɣa n wagmuḍ ur tezmir ad tbeddel tamurt. Illa wawal : « d tirrint (n yesɣaren) i irennun ɣer taffa ».
Banu Hilal bḍan d iḥricen si lqern ɣer wayeḍ, uɣen amkan di yal tamnaṭ ideg ten-issers udabu i ten-isguǧen, iten-isqedcen di ṭṭrad-is, rnan beddlen tameddurt-nsen, si treḥḥalt ɣer tfellaḥt akked tkessawt… uɣalen d Imaziɣen am akken gan sdat-nsen Irumyen n Ruma yeqqimen, Iwandalen, akked wid d-irnan deffir-nsen, Iterkiyen, akked kra n Ifransiyen.
Amek i tedda tutlayt taârabt di tmurt tamaziɣt armi d-tlul tutlayt darǧa ?
- Tamezwarut tekka-d si tsuddest n igelliden Imaziɣen : win iran ad ikcem tamurt, ad iɣer i tewsimt n Banu Hilal akken ad nnaɣen idis-is, syin ad asen-yefk akal ad qqimen din d afrag ɣef tmurt d-iḥella. D azuzer akkin akka, ɣas amur ameqqran iqqim deg izuɣar n tmurt (Hauts Plateaux sahariens).
- Tis snat, d amyekcem n yemdanen, rnu-yas ‘’ccan n tutlayt n ddin’’, at tmurt kkaten ad issinen tutlayt taârabt d-innulfan.
- Tis kraḍ, d tanamit tamaynut d-ilulen di tmurt, zun Imaziɣen rran tutlayt-nsen ɣer deffir : mi mlalen sin deg ubrid ur myussanen, amezwaru ad inṭeq ɣer wayeḍ s taârabt, mačči s tmaziɣt (6). D tanamit-nni i yeldin abrid armi d-tlul tutlayt tamaynut n darǧa. Tanamit-nni, d ayen illan ass-a. D tin i yessefken ad tekkes !
Awal n taggara :
Ass-a, akken llan imezdaɣ n tmurt n Lezzayer, llan d Izzayriyen s yiwen wazal-nsen.
Ur illi umgared gar Uzzayri seg uẓar, akked Uzzayri i d-yuɣen aẓar ansi nniḍen, akken ibɣu yili.
Tamussni n umezruy d ammud/bénéfice, d afud akken ad tesnerni tmurt, mačči akken ad tezzi tamuɣli-s ɣer deffir.
D win kan i d iswi di tira n uḍris-a.
Aumer U Lamara
Timerna / Notes :
1. Eccaâbu el Ǧazayir muslimu, wa ila el Ɛuruba yentasib ».
2. « Nous sommes Berbères, l’islam nous a arabisés » Ahmed Taleb Ibrahimi, ministre de l’éducation nationale sous Boumediène et ministre des affaires étrangères (1965 – 1988).
3. Tamurt n Turk tella tettaru tutlayt-is s isekkilen n taârabt ; tekkes-iten di 1928.
La révolution des signes (Harf Devrimi en turc) est une réforme mise en œuvre le 1er novembre 1928 par Mustafa Kemal Atatürk pour remplacer l’alphabet arabe, en usage sous l’Empire ottoman pour transcrire le turc, par un alphabet spécifique dérivé de l’alphabet latin. (wikipédia)
4. La tribu originelle des Banu Hilal est composée de trois fractions : Athbaj, Riyāh, Zughba. Lors de leur migration vers l’Afrique du Nord, les Banu Hilal sont rejoints par trois autres groupes tribaux arabes : Jochem, Maqil, Sulaym.
5. « On peut dire que peut à peu les tribus arabes devenues sédentaires ou demeurées nomades se soumirent à l’autorité (amaziɣ) locale de quelle que fût la dynastie : Almohades, Almoravides, Hafside, Zianide, Mérinide, ou autre ; elles servirent d’instrument efficace pour collecter les impôts et rétablir l’ordre par le feu et par le sabre partout où l’ordre impérial était menacé ». in. Les Berbères dans l’Histoire, M. Gaid, tome V, p.120.
6. « Mi mlalen sin yemdanen deg ubrid ur nemyussan, amezwaru deg-sen ad inṭeq ɣur wayeḍ s taârabt, mačči s tmaziɣt… d win i d abrid unekcum n taârabt darǧa di tmurt ». d awal i d-inna yiwen umussnaw n CRAPE, di Lezzayer di 1984.
Amedya n tedyant di Lezzayer tamanaɣt di 2022 :
Muḥend Urabaḥ n taddart-nneɣ, ibedd di Lezzayer, inṭeq ɣer umezwaru yellan sdat-s deg ubrid, isteqsa-t s tmaziɣt :
– Di laânaya-k, anida yella ubrid ɣer… ?
Win ibedden, iwhem, irfed iɣallen-is ɣer igenni, irra-yas-d s tmaziɣt :
– Subḥan Lleh ! Anida i yi-tessneḍ akken ad d-tneṭqeḍ ɣur-i s teqbaylit di Lezzayer ?
Muḥend Urabaḥ, irra-yas,
– Ur k-ssineɣ ara, yal amkan d tamurt-nneɣ, ad hedreɣ deg-s s tmeslayt-nneɣ !
