Asali d-ifka uɣmis Le Monde ass-a n 20/12/2023 issewham : « Transférer les chefs militaires du Hamas vers Alger : un plan saoudien soumis au Quai d’Orsay » !Tuttra tamezwarut, d asali n tidet neɣ d tixurdas (intox) ? Ma nefla tiṭ ɣer wayen iḍran di 1982, mi yekcem Israël ɣer temdint n Beyrouth di Lubnan, d tamurt n Fransa i yefkan aɣerrabu ɣer Beyrouth, suffɣen-d syin imeqqranen n OLP, izwar-d Arafat, irfed afus-is ɣer igenni iga s sin iḍudan V n victoire !!! (2)
Fransa tewwi imeqqranen-nni akked iserdasen n OLP ɣer… temdint n Tunes !
Ass-a, di 2023, mi selfaɣent lbumbat Ipalistinen akked iberraniyen i tuɣ di Ghaza, Fransa ad tefk tamesrafegt neɣ aɣerrabu ad d-tawi Yahia Sinwar, Mohammed Deif akked imeddukal-nsen ɣer… temdint n Lezzayer ! (3)
Tuttra tamezwarut d tin n lmizan : amek, di tallit deg mmuten nnig 19 000 yemdanen s lbumbat n Israël di Ghaza, gar-asen nnig 6 000 n imeẓyanen akked imeṭṭiḍen, « ccifan » » n Hamas ad rewlen, ad snesren aqerru-nsen ɣer tmurt n Lezzayer ?
Tadyant n Arafat di Beyrouth d ayen iḍran, ass-a tezmer ad d-ternu. Tabɣest mačči d ayla-nsen.
Tuttra tis snat d tasuddest (stratégie) n Saoudia (akked Fransa) :
Ma tadyant d ayen illan d tidet, urar n tmurt n Saoudia iban am uzal. Ass-a d timsizzlet gar tmura taârabin (Saoudia, Qatar, Emirates, Maser…), anwa deg-sen ad isqedcen tamsalt n Palestine, anwa ad isqedcen ccifan-is, akken ad ten-sxedmen azekka di tsertit-nsen.
Ur telli talsa, ur telli tmella, aɣref n Palestine izmer ad inger, mačči d aɣbel-nsen nutni.
Tuttra tis kraḍ, d adabu n Lezzayer kan i izemren ad d-yerr awal !
Di 1982, Fransa tewwi-d ccwal n Palestine si Beyrouth ɣers Tunes. Kra wagguren kan usant-d tmesrufag n israël fkant lbumbat ɣer wanda illa yeffer Arafat akked imeddukal-is, rnan fkan-d iserdasen seg waman, nɣan kra seg ccifan-nni n OLP.
Tamurt n Lezzayer, tezmer ad teqbel ad teldi tabburt ass-a, ad d-tesselqeḍ ccwal n Palestine ɣer tmurt n Lezzayer akken… ad tesdafel (ad temnaâ) ɣef uqerru n Yahia Sinwar akked Mohammed Deif, wid ara yeǧǧen akkin atmaten-nsen, ad mmten ddaw lbumbat n Israël ?
Aumer U Lamara
Timerna / Notes :
- « Nwar Sinwar » / Yahia Sinouar, d anemhal n iserdasen n Hamas. « Noir c’est noir / Black is black) » tella d tazlit s teglizit i d-tessuffeɣ terbaât Los Bravos di 1966, isuqel-itt Johnny Hallyday ɣer tefransisit di 1966.
- V-nni n Arafat (Abu Ammar), d tadyant ɣef yura Mohia (Muḥend U Yeḥya).
- Le Monde du 20/12/2023 : Un document confidentiel, mis au point par un think tank de Riyad, esquisse un plan de sortie de crise à Gaza. En plus de l’exfiltation des cadres du mouvement islamiste vers l’Algérie, il suggère de déployer une force de maintien de la paix arabe dans l’enclave palestinienne…
Source :
https://www.lemonde.fr/international/article/2023/12/20/transferer-les-chefs-militaires-du-hamas-vers-alger-un-plan-saoudien-soumis-au-quai-d-orsay_6206839_3210.html
