Di yiwet n taddart di temnaṭ-ina Nat Wasif, yella yiwen warggaz yedda cwit di laεmmaṛ, tameṭṭut-is mazel-iţ meẓẓiyet. Dren akken acḥal, tameṭṭut tevda tesstehzay deg-warggaz-is, tuɣal ammakken tḥeqqṛ-it. Ula d cwiṭ n seksu, s tmmara kan i s teţţak. Leqdic-is akk s wurfan d ucennef.

Arggaz yemmuɣven kan, ur-yeẓṛ-i i wumi ara yeḥku lhem-is. Yibbwas i seweq ar Lǧemεa Ufella, yemmllal d yiwen wemddakkel-is Nat Mengelat. M’salam-en, m’steqqs-an, amek llan, dɣa yenna-yas-d wemddakkel-nni ynes :

– Ay-amddakkel atan wudem-ik ur yesfṛaḥ-ara! D acu-t akka yeḍṛan yid-k, aqli da!

– D acu ar ak inni-ɣ ay amddakkel! Ẓr-iɣ ur teţţxaṣṣ-aḍ ara, ak ivarek Ṛebbi. Iḥi ak inniɣ kan tideţ, ur lliɣ ara vxiṛ. Ass-a yefkka-k-id Ṛebbi, ihi welleh ar d-ak ḥkkuɣ. Amekken t walleḍ tameṭṭut-iw ugareɣ-ţ di laεmmaṛ. Iseggwasen-nni imezwura neddrit-en am nekkw-nni am wiyaḍ. Tagarra yagi tuɣal-iyi limmaṛa, ula d cwiṭ n seksu s tmmara iyi t-id ţak.

– Teẓṛ-iḍ ay amddakkel! Nek ak inni-ɣ kan tideţ! Mi tebbwḍeḍ ar liḥal-yagi, nekkw-nni deg At Mengelat neqqaṛ-as : « Seksu n tmmara, tevεit taknna! »

–Dayen ay amddakkel, ur yelli ar iyi d-rrnuḍ!

Arggaz yuɣal-d s axxam, yeqqen a sardun-is degw daynnin. Tameṭṭut am zik-is, d zḥel d ucennef…

Arggaz, awal i s d-yenna wemddakkel-is, ur yeɣli-ara di rrayeε. Azkka-nni yevda annadi ɣef tmeṭṭut, armi i d-yuffa.

Tameṭṭut ur tuḥtam ara armi i s d-kcem takna s axxam. Dɣa a t-ţezzem deg iman-is. Tevda teţţṛuẓu meẓẓi meẓẓi ar warggaz-is :

– Ay arggaz, ak d-qedceɣ aya, ak-d-sebbweɣ aya…

Arggaz yeggugem kan. Yibbwas yenna-yas :

– Teẓṛiḍ a tameṭṭut: Immezwura qqaṛen-as : « asmi i tcevḥeḍ a d-wteḍ ay adfel, ur d witeḍ-ara! » Ihi tura s-miččem neɣ qqim!

Seg-mi i twala ar warggaz-is fukkent-as, dɣa tezzi ɣef takna-s.

Takna-s, ur tzad ara di ṣifa, diɣ tesqewqiw acemma. Umaεna ţaεbbwajt, ksed d acu ur tesin a texxdem. U yerna tţeddu di levɣi i wargaz-is.

Tameṭṭut tegguma as tfek talwit lquvat, aεayaṛ…

– A teqewqawt, a tucmmiţ, a tin-ur nesεi imawlan…

Tinna tesusem kan. Armi dayen teḥawelit-ent, yibbwas tenna-yas :

– Teẓṛiḍ a takna! Limmerr di telhiḍ ay axxam, ur rrennun-ara fell-ak taɣwuṛfeţ!