Gren-d tiɣri kra n yimasgaden, ass n usamas, deg Dzayer Tamaneɣt, i usmuteg n tgemmi tasegdant tadzayrit d useḍru n yiɣawasen n umesten s usedrew n yiɣermanen.
Deg yiwen n umyager amsadur d-yellan deg Daṛ Ɛebdellaṭif (Lḥamma, Dzayer Tamaneɣt) deg ukatar n tedyant n “Talaqi” i tessuddes Tnegga Tadzayrit i Ufeǧǧeǧ Adelsan, tiddukla tadelsant n “Tigemmi” d umazday n” Talaqi”, ssawlen-d yimasgaden-a ɣef tilawt n umesten n tgemmi tasegdant tadzayrit d tixxutert n usmuteg n temlilt n tmetti taɣarimt deg umesten d usetrer n temdinin tidzayriyin.
Deg tgermant-nnes ilmend n waya, yezzireg-d umasgad Akli Amrouche ɣef tḍullit n “unekni” ɣer yigmamen imaynuten n tmurt s usnummed-nsent deg unagraw amdinan ara d-yeggensesen idles n tmurt d tmagit-nnes, ilmend n useɣnew n “tdinamit tanmettit” ideg ara yedrew uɣerman s yimek yukin yernu d amasay.
Seg yidis-nnes, tessawel-d tmasgadt Maya Akkouche ɣef wazal anmetti d umdinan n wazuren n Teqṣebt n Dzayer, d wamek i derwen yineggura-a deg “usbuɣer n tsugint n yimezdaɣen d yinaẓuren am Mohamed Racim”, yernu terna-d dakken Taqṣebt tettwassen s wazuren-nnes d-yettgensisen “tallunt d tameddurant”, ulama tenqes tjumma-nsent ɣef lǧal n wammad udmawan d urusḍif.
Agensas n Tnegga Taɣelnawt n Yigzumen Yettwaḥerzen, Mustapha Hadj Kouider, yesmekti-d s Uɣawas Imezgi n Uḥraz d wammad n ugzum yettwaḥerzen i iderwen deg “usukkes n Teqṣebt n Delles seg udram”.
I usmekti, tameskant n “Talaqi” ad tkemmel arma d 24 yulyu.
APS
