Si talast ar talast, Yennayer isdukel tamurt n Lezzayer, si temnaṭ ar tayeḍ, isdukel akk timura n Tamazɣa akken llant !
Ur illi d awal, d ayen illan, d ayen ẓrant wallen, d tumert illan deg waṭṭawen n yemdanen, imeẓyanen d imeqqranen. Ɣas liḥala ur telhi, ur teffulki, am wid illan ass-a durin ddaw iqiḍunen deg udrar n Waṭlas.
Timrawin n iseggasen n umennuɣ di yal tamurt, si tnekra n Arrif di Merruk, si 1949 deg umussu n MTLD ar tefsut n 1980 di Lezzayer, ar tnekriwin di yal tamurt n Imucaɣ (Mali-Azawaḍ), Libya, Tunes, Maser-Siwa… armi d tigzirin Tiknariyin, fkant afud i tegrawla tamaziɣt.
Tamurt tamaziɣt tennuɣ s ubarud mgal yal tamhersa/listiaâmer n Urupa (Spanya, Fransa, Ṭelyan, atg…), tefka idammen n tarwa-s, maca yal timunent n tmurt seg iseggasen n 1960, ur d-tegli s tlelli n tmurt.
Acku, tamhersa tamezwarut n taârabt-tinneslemt mazal ur tekkis. D tin i d ugur ass-a i tlelli n yidles amaziɣ, i waɣlan/nation amaziɣ. Ur illi d aɣref nniḍen i d-ikecmen tamurt. Tamhersa yellan ass-a, d tin n tsertit taârabt-tinneslemt illan deg ufus…n Imaziɣen, akken ibɣu yili yiles-nsen, d tamaziɣt neɣ d darǧa.
Tamurt tamaziɣt ass-a tella deg waddad n « auto-colonisation », zun tessehres iman-is s yiman-s !
Yennayer ifka-d udem ikksen tikerkas, ikkes tagut i yedlen tamurt :
Tamurt teddukel si talast ar talast, maca yal adabu di yal tamurt ibedd d acengu n tmurt-is, mgal timetti-s.
D win i d amennuɣ di yal tamurt akken yal adabu ad iwelli gar ifassen n at tmurt. Ur illi d ṭṭrad, ur illi d ahuddu akked timenɣiwt am akken ddan yimeṭṭurfan inselmen irebraben acḥal d aseggas, acku deg wadmeɣ-nsen nutnu, tamurt mačči d tamurt-nsen.
Amennuɣ amaziɣ ass-a d uzekka ad yili deg ubrid n talwit, deg ubrid n yidles akked tmussni akken ad d-tekker tsuta tamaynut ara yekksen tabarda/tarekt ɣef tmurt tamaziɣt tameqqrant.
Imedyazen, imyura akked inaẓuren gren asurif deg ubrid n tegrawla…
Abrid ur irgil i yal adabu, di yal tamurt, akken ad yaɣ abrid n umezruy, n yidles n tmurt, mačči n win n wagmuḍ aârab, acku :
Imaziɣen ur llin d « aklan imellalen » n igelliden n pétrole ! (1)
Asalu issefken i udabu n Lezzayer iban ur iffir :
- Ad ikkes tiḥila n useqdec n yennayer, zun d folklore n « ikerrucen »
- Ad ikkes di tmenḍawt-is : « Lezzayer d tamurt taârabt tafrikit », akken Izzayriyen ad arun ayen iwatan s tutlayt tamaziɣt : « Lezzayer d tamurt tafrikit, d tamurt n yillel Agrakal ».
- Ad irrefref wannay amaziɣ nnig tzeqqa n El-Muradya.
Aumer U Lamara
Timerna /Notes :
- Uguren gar Lezzayer akked Emirates :