Di twaɣit n Covid-19 deg ɣellin yemdanen am yizan di tmurt n Lezzayer, adabu ibedd-d d ugur di tnemmast n ubrid, akken ur ttawḍent tmacinin iskaren uksijan akked yal ddwa nniḍen ɣur imuḍan yenṭerren, ɣer wanda ttunefken. Ilmend ad d-ildi tibbura s tmesrufag n Air Algérie akked tukksa n « la bureaucratie » n ddiwana, netta irgel-itt-id s wulɣu n yiḍelli (1) : « yal asafar d-ikecmen, ad iddu ɣef ufus-is netta ».

Yiwen Uzzayri ur yumin ad awḍent tmacinin i yimuḍan iwatan ma kecment gar ifassen n la maffia n la pharmacie centrale algérienne !

Azekka, ayen ikecmen ad yenz ddaw ufus di marché noir n ssuq n El Ḥarrac, El Ḥamiz akked imukan nniḍen, am iqiḍunen-nni d-fkant tmura tiberraniyin asmi tenhezz tmurt di Bumerdes. 

Taggara n temsalt-a tban am uzal : adabu ikker ad iskuffer tamurt (organisation de l’asphyxie des citoyens), ad yernu ad issečč imeddukal-is.

Taɣuri si temsalt-a : 

Iswi/le but n tuqqna n yal asafar d-ittunefken akken ad yezri si la pharmacie centrale, mačči d aɣbel n beṭṭu iwatan acku amur ameqqran n tmacinin akked ddwa teddun ad awḍen ɣer sbiṭarat n tmurt. Sbiṭarat-nni akken llan, akked tzeɣwa polycliniques, teddun akk ddaw udabu n uneɣlaf n tdawsa/ministère de la santé. Aneɣlaf izmer ad yefk lamer i yal sbiṭar akken ad as-d-yerr i la pharmacie centrale ayen izaden nnig wayen yeḥwaǧ i yimuḍan yellan din. Teshel temsalt. 

Tamussni deg umaḍal tella :

Di temsal n tallalt / aide, solidarité, ulac abrid yufraren am win wezzilen : win ad ifken ayen iwumi yezmer, tikci-s ad taweḍ afus n win i teqsed (circuit court : donateur – récepteur). D abrid deg ulac taxessart. Ass-a di tmura n umaḍal, wid yettaken tadrimt i tallalt, ssaramen ad ẓren iwacu tedda tedrimt-nsen, anda tewweḍ, wuɣur tewweḍ (des opérations ciblées, justifiées, bouclées).

D ugur ameqqran illan deg iseggasen izrin i yessawden ɣer ubrid-a. Zik, llant tddukliwin humanitaires iteččen azal n 80 % n tedrimt d-ikecmen deg umesruf n ‘’fonctionnement’’ ; taleqqimt kan ad yawḍen amkan-is, wid iwumi tettunefk !

Ass-a, tamurt n Lezzayer, ilmend ad telmed seg wayen iteddun di tmura nniḍen, nettat tuɣal ɣer deffir, ɣer logiciel n caporalisme n tmura n soviet inegren.  

Amek i nezmer ad tt-nefhem ?

Ulɣu i d-iffɣen ur illi seg ufus n uneɣlaf n tdawsa. Ur illi d rray n Abderraḥmane Benbouzid s timmad-is. Tiyita tekka-d nnig-s : d rray n uẓar n udabu n iserdasen, d afus n isuddas/les stratèges du pouvoir i itt-igan akken ad cudden ayen i yasen-inesren ussan-a : d tiwizi i yekkren di yal tamurt (Fransa, Marikan, Canada, …) akken ad aznen isufar iwatan i yimuḍan n tmurt, yal yiwen anda yella, yal taddart, yal tawsimt/laârc ikker ibzer-d tadrimt i tiɣin n tmacinin. 

D tiwizi n Izzayriyen i yewwet udabu akken ad tt-yerẓ, acku d taddukli iteddun ad timɣur azekka, ad d-tawi tiddukliwin nniḍen. Adabu yugad ad teddu ɣer uqerru-s, iga-d afrag, maca d afrag n wuffal. Ur izmir ad yeg afrag i uḥemmal d-iteddun.    

Aẓar n udabu yiwen-is si 1962, asmi ibedd s takriṭ/violence akked tazzla n idammen.

Tawaɣit tamezwarut ibda-tt Ben Bella di 1963 s yiwen ukabar/ ‘’Parti unique’’, ‘’la nationalisation des salons de coiffure’’, akked la milice ittcuddun imdanen deg iberdan.

Adabu ibedden s tezmert n ugraw n Ujda (clan d’Oujda) (2), ifra abrid-is : ad ikkes yal tilelli i wegdud Azzayri. Timunent-nni n 1962, ilmend ad d-tawi tilelli akked tumert, tewwi-d tudert n tmara ddaw uzaglu n FLN akked iserdasen-is.

60 iseggasen n yal tawaɣit, ass-a wḍen ad kksen azwu n uksijan i Yizzayriyen akken ad t-zzenzen ddaw ufus. 

Aâddan tilas ɣer yir taggara-nsen, akken ad ttwakksen akken llan.

Aumer U Lamara

Timerna / Notes :

1) Communiqué de l’ambassade d’Algérie en France : … solliciter une autorisation d’acheminement des dons  ; déclarer l’identité des donateurs (associations, collectifs, particuliers) ; établir la liste du matériel.

Le ministère de la santé est le seul et unique destinataires des dons recuellis ; il se charge de le répartir au niveau national… 

2) Clan d’Oujda : https://fr.wikipedia.org/wiki/Clan_d%27Oujda