Ur d-iqqim yisem n yiseɣ i udabu yefkan tamurt n Lezzayer d tarbibt n Wagmuḍ Anemmas/Moyen-Orient (1), i yeččuren leḥbas s wid ur neffiɣ i ubrid, i yesmentigen times yal ass akken ad yeg ṭṭrad akked Merruk ur d-nekcim tamurt.
Abrid-is yiwen : d asexreb akka d wakka, s yal taḥilett, akken ad iqqim ugar, ad isserwet di tmurt. D tin i d tafellaḥt-is si tazwara.
Adabu ikkat ajewwaq yal tikkelt s ssut amaynut, akken ad isgen tamurt, ittarra awren ɣer tessirt akken ad d-isnulfu asirem ur nelli… ar tezri yir tegnitt.
D ayen illan, d ayen i ẓran akk Izzayriyen.
Ussan-a, d tizlit tamaynut i d-iffɣen si tzeqqa n El Muradia : « tamurt n Lezzayer ad terfed iman-is s usenfar/projet amaynut n tdamsa, d ‘’décollage économique’’ ! ».
Ih ! Azekka ad d-nerr Kurya n Wanẓul/Corée du Sud ɣer deffir !
Win i ten-yumnen ass-a, ala win yeččan ul-is, neɣ win iteččen tamurt di terbut-nsen. Acku
yal awal s lmizan-is. Akken ad terfed tmurt iman-is, issefk di tazwara
– Ad ikkes udabu ukaskiḍ iteẓẓgen tamurt armi teqqur,
– Ad ibedd uzref, ad teddu teɣdemt tilellit,
– Ad aɣen rray warraw n tmurt i yessnen, ur regglen ɣer tmura n medden,
– Ad d-ibin usirem n tidett, mačči d iɣil azegzaw n waman n yillel i trewla di teflukin n tencirt.
Ulac tiyita deg ugraw i yeṭṭfen ass-a adabu di Lezzayer. Iḍelli d wiyaḍ i yellan zdat-nsen, azekka ad d-kecmen wid nniḍen ad srewten ugar, ma zemren. Agraw yettbeddil udem akked yismawen, maca tasertit akked userwet-is iteddu simmal, ar asmi ara qqaren lebyur n petrol (2).
Tiyita tella deg Izzayriyen i yumnen ar ass-a, tezmer ad tbeddel s « système » nni ibedden di 1962.
Tuttra tamezwarut : d asirem s tidett, neɣ d tifkin/tikci n ufus, yal yiwen yessaram ad tbeddel tegnitt i netta s timmad-is, ad ikcem annar n wid iḥekmen, zun d yiwen gar-asen… ad d-taweḍ nnuba-s, ad isserwet ?
Awal tefra-t-id tiɣri-nni d-ilulen deg iberdan n yal tiɣremt, si furar 2019 : « système berra ! ». Akken ad d-tlal Lezzayer tamaynut, issefk ad ikkes système, ad ibedd wayeḍ ɣef tgejda n izerf an.
Abrid-is, win issuffuɣen, mačči d taganit n wayen ad d-yasen seg udabu. Abrid-is d taruẓi n usalu amaynut, d asgerwel ara yekksen tuẓẓal-nsen i yentan deg uksum n tmurt.
Mačči d asfillet kan, mačči d ayen illan d awezɣi/impossible ; imezwura-nni n nunamber 1954 gren tiɣri i weɣref azzayri akken ad ikker zun d yiwen (3), ur sutren neɣ ḥawten di Fransa akken ad d-tefk udem, ad tbeddel abrid n temhersa-s…
Aumer U Lamara
Timerna / Notes :
1) S tbuqalt n laâr n tmura n Waâraben (‘’coupe arabe’’ de football !).
2) Adabu yettberriḥ s wawal n « l’après pétrole, diversification des exportations… », ad izzenz azekka isufar nniḍen. Fellag irra-yas yakan awal : « on va exporter les ligues (des droits de l’Homme) et importer les droits de l’Homme ! ». Asmi nessuli la ligue algérienne de défense des droits de l’Homme di 1985, adabu yesnulfa-d si tama-s snat les ligues n usekkak, syin irna-d ‘’l’observatoire des droits de l’Homme’’, akken kan ad yerẓ la ligue tilellit. Yiwen uneɣlaf inna-d di tallit-nni : « toute l’Algérie est une ligue des droits de l’Homme (sic!) ».
2/ Appel des révolutionnaires du 1er novembre 1954 : « Peuple algérien, … A vous qui êtes appelés à nous juger … notre souci en diffusant la présente proclamation est de vous éclairer sur les raisons profondes qui nous ont poussés à agir en vous exposant notre programme, le sens de notre action, le bien-fondé de nos vues dont le but demeure l’indépendance nationale dans le cadre nord-africain. Notre désir aussi est de vous éviter la confusion que pourraient entretenir l’impérialisme et ses agents administratifs et autres politicailleurs véreux… ».
