Lεarc Nat Xelfun yezga-d di leḥnaḍ ina n Tizi-Ɣenif, d At Yeḥya Umussa, d At Ɛemṛan…Ţaɣiwant n Caεbet-Lεammer.
At Xelfun, ḥesvent-en d ivuneyiwen, Laεṛac i sen d-yezzin. Ţawin-d fell-asen timeseḍṣayin, am nekkni s At Yeţţureɣ di tamma n Micli, ţţkelixen-aɣ At Vuyusef, acku nutni ḥarcen di lkumirs. Llan diɣ At Vuɣarden di tamma yina n Vuɣni, ula d nutni qqaren-d d ivuneyiwen. Akka di yal tamma n tmurt n Leqvayel yella Lεarc neɣ taddart ɣef d-ţawin timeseḍṣayin wid i sen d-yezzin.
Ayagi ger taciwin kan, a d-nuɣal ar Da Wakli.
Ihi, Da Wakli d yiwen umezdaɣ di yiwet n taddart di Lεarc Nat Xelfun, yessεa mmi-s yemmed, yebbweḍ i zwaǧ. Zik-nni, aqcic mi yeṣawed 15 iseggwasen d asawen, ak innin dayen ula i yernu, tlaq-as tameṭṭut. Da Wakli, am neţţa am wiyiḍ, iwala mmi-s yemmed, yenna-yas i tmeṭṭut-is :
– Kker fell-am as d-nadiḍ tameṭṭut i mmi-m, dayen ula i s-nerrnu.
Di teggwniţ-nni, tiyamatin neɣ-tiseţţitin…teffɣent ɣef tudrin ţţnadint tiqcicin i warew-n-sent.
Ufant-as-d taqcict, sekkren tameɣṛa i mmen-sen s zhir. Mi bbwḍen sevεa wussan n tufɣa n teslit, bbwin-teţ ar tala am laεwyed. Azekka-nni, bbwin-ţ yemɣaṛen-is zzin-d akk ɣef tfarkiwin-nnsen. Andda bbwḍen as nntini :
-Tivḥirt-agi nnwen? tamazirt agi nnwen ? Tafarka n uzemmur agi nnwen…?
Da Wakli, yefka kan tameẓuɣt-is i sell-as d acu ar d-inni. Mi d-nna kan akka, a d-iremmez a d-yeţţhuzu aqqaruy-is.
Mi d-uɣalen s axxam, yenna-yas Da Wakli i tmeṭṭut-is :
-A tamɣaṛt, taqcict-agi ur d-uss-ara a ţexxdem axxam-is, azekka a ţerreɣ i vava-s.
Azekka-nni akken i ţ-yenna, yebbwi-ţ s axxam-nnsen, yenna-yas i vava-s :
-A leflani ha-t-an rriɣ-ak-d ṛṛeẓeq-ik, ur tefiɣ ara fell-aneɣ.
Tameɣṛa ar tmeɣṛa, alami i ţisevεa. Am tid iεeddan, tedda d yemmɣaṛen-is zzin-d ɣef akal-nnsen. Andda bbwḍen, as t-inni i temɣaṛt-is :
–A tamɣaṛt, tivḥirt agi a d-ivarek Ṛebbi nneɣ? Tamazirt agi nneɣ? Tafarka yagi n uzemmur nneɣ?…
Da Wakli am zik-is tameẓuɣt-is kan teṭṭuṛec, i sell i teslit-is amek teţţmeslay akk ţemɣaṛt-is. Kra s teqqar akken, neţţa yeţezzmumug.
Mi d-bbwḍen s axxam, yenna-yas i tmeṭṭut-is :
-Seɣṛiṛet a tamɣaṛt seɣṛiṛet. Fṛeḥ nufa-d tameṭṭut i mmit-nneɣ.
Ahmed Aït Bachir