Di tmurt neɣɣar-as « amennuɣ n iḍebbalen » : ad nnaɣen ad rnun, syin ad frun, ad ḥmun tazwayt i yiceṭṭaḥen !
Maca di temsalt illan ass-a gar Lezzayer akked Fransa, ur illi d tazwayt neɣ d amezgun. D tiḥila akked tɣennant si yal tama… ɣef uqerru n imelyan n Izzayriyen-Ifransiyen i yellan akkin akka n yillel Agrakal, ɣef Izzayriyen i yeddren di tmurt n Fransa, d ixeddamen, d inelmaden neɣ d imɣaren iffɣen lantrit, qqimen d tamara …
Adabu n Fransa ikkat ad issinef uguren illan di tsertit n tmurt-is, adabu n Lezzayer ibedd ɣef tfednan akken ad iseddu tagrawla n 1954, tin i yefran yakan si nnig 60 iseggasen !
Ihi, nezmer ad nini d amezgun aberkan akkin akka, ugar mi d-tekcem annar tfusit timeṭṭurfit n Fransa (extrême droite n RN), akked « yemjahden » izzayriyen i yeffren deg yifran n Ṭukṭuk (Tiktok) (1) ?
Tamsalt n tuṭṭfa ɣer lḥebs di Lezzayer n Boualem Sansal terna-d zun d timmist kan i wugur illan yakan gar Lezzayer akked Fransa : di temsalt n Tiniri n Utaram, neɣ Asif Zeggaɣen (« Sahara occidental »), Fransa tmal ɣer tama n Merruk, tenna zun akal-nni illa d ayla n Merruk.
Din kan, adabu n Lezzayer yerra Fansa d acengu, Aselway n Fransa, Emmanuel Macron, issuffuɣ-d isennanen, yiwen deffir wayeḍ. D tasertit tasertant/politique politicienne.
Ur illi wayen ara d-snernint tḥila deg unnar n tsertit.
Issefk yal tamurt ad tezwir deg wayen illan si tama-s akken ad tefru ayen illan deg ufus-is, i yessefken ad ifru :
Lezzayer ad d-tebru i Boualem Sansal akked imeḥbas nniḍen ittwaṭṭfen ɣef tsertit di yal tiɣremt n tmurt,
Fransa ad teqqen yal win iɣren deg uẓeṭṭa (Tiktok, instagram…) i tmenɣit n Izzayriyen, ad ternu ad tekkes yal awal ur nwata ɣef tmurt n Lezzayer, am umedya n « l’Algérie se déshonore en ne libérant pas Boualem Sansal », mačči d awal ilhan, mačči d awalen ara d-issuffɣen azekka Boualem Sansal si lḥebs.
Ma Fransa tezmer ad tger tamawt i tmurt n Lezzayer, issefk ad tẓer ayen illan, ayen isduklen 45 imelyan n imezdaɣ n tmurt n Lezzayer, mačči s tmuɣli n « royaume arabe » n Napoléon III : yiwen ur d-ikkir ass-a akken ad yeg ṭṭrad mgal Fransa, deffir wid n ugraw i yesseḥmuyen ṭṭbel.
Izzayriyen zdin di talwit, dduklen di yal tamnaṭ, akken ad sezrin di lehna tameɣra n yixf useggas amaziɣ, Yennayer 2975.
Yennayer ameggaz i yal yiwet, i yal yiwen !
Aumer U Lamara
Timerna / Notes :
1. « Imjahden » n Ṭukṭuk n 2025 i yettberriḥen si Nantes, Grenoble, Lyon… akken Izzayriyen ad nɣen Izzayriyen nniḍen (les opposants), wid ur neqbil adabu yellan di Lezzayer, d wid-nni neɣ d imeddukal-nsen i yessekren yakan aẓeggi deg unnar Stade de France, mi llan sellen medden i yimseɣret/l’hymne n Fransa, La Marseillaise, asmi turar Fransa akked Lezzayer.
Amur ameqqran seg wid-nni igan herrwel d imezwura, si temdint n Lyon i yulin ɣer Paris, fran « akken ad gen ẓẓga » i tmurt n Fransa.
