Agraw n APN ifra-tt di tafrent n wass n 24 dujamber 2025 (1) : tamharsa n Fransa d tinnɣit/crime, issefk tamurt n Fransa ad d-tefdu ayen akk i tga di tmurt n Lezzayer, issefk ad tessuter asuref/smaḥ i tmurt n Lezzayer !
D ayen ilhan nezzeh, ma ur llint tḥila.
D ayen illan d abrid, akken ad d-ters talwit gar Lezzayer d Fransa, akken azekka ad ddunt temsal n tadiplomasit gar-asent deg ubrid n tulut/égalité. Ad tekkes tɣennant, ad d-ilal wassaɣ ibnan ɣef tidet, ɣef leqder akkin akka.
Maca, agraw n APN ur issefk ad iqqim di tnemmast n ubrid. Issefk ad tt-ifru ar aẓar.
Amek ?
Ma APN yessuter di Fransa akken ad tessuter nettat smaḥ di tmurt n Lezzayer, issefk diɣ timura nniḍen i yeshersen tamurt n Lezzayer ad sutrent smaḥ-nni.
Ayen illan deg umezruy ittwassen :
Issefk APN ad teg tafrent akken tamurt n Turk, tin i yeshersen tamurt n Lezzayer si 1515 armi d 1830, ad tessuter smaḥ si tmurt n Lezzayer, acku tessehres tamurt, tenɣa, texla tiɣermin, terra Izzayriyen d aklan-is.
Issefk tamurt n Saâudya akked tmura n Surya akked Iraq i yeshersen tamurt n Lezzayer si 642 ar 710, anida snegren amur ameqqran n uɣref n Tefrikt n Ugafa, anida nɣan Dihya akked Aksil, anida wwin azal n 50 000 n tlawin timaziɣin, d taklatin i zzenzen di leswaq n Beɣdad akked Damas.
Issefk tamurt n Roma n wass-a, tin i yeshersen Tafrikt n Ugafa azal n 4 leqrun, ad tessuter smaḥ i tmurt n Lezzayer s wayen akk i tesserwet, s tmenɣiwt n ugellid Yugerten di tesraft n Tullianum di Roma di tegrest n -104, s wayen akk i thudd n tɣermiwin di Tamazɣa.
Mi tefra APN ahil-is, ass-nni ad yizmir ad yali wannay amaziɣ, ad irrefref nnig tzeqqa n Lmuradya.
Ass-nni Diduc Murad ad as-yaki rsen yeɣsan-is, terra-d iseɣ-is tmurt-is, ad yini : « ayen issarem issaweḍ ».
Ma teqqim APN di tnemmast n ubrid, di tɣennant-is kan mgal Fransa, zun d « imjahden n dujamber 2025 » (am wid-nni n 19 di meɣres 1962), akken kan ad rnun ad kerzen ɣef Izzayriyen, iban si tura, urar-is ur issawaḍ, acku ass-a Izzayriyen ldint wallen-nsen.
Ih, « Siweḍ akeddab ar tabburt » !
Aumer U Lamara
*) Le vote de l’APN de la loi criminalisant la colonisation française : allez jusqu’au bout !
Timerna / Notes :
1. Les députés algériens ont adopté, mercredi 24 décembre, une loi pour « criminaliser la colonisation française », dans un contexte de tensions diplomatiques entre Alger et Paris : loi exigeant de la France des « réparations intégrales » et des « excuses formelles » pour « les crimes » de son passé colonial en Algérie. Visant à « criminaliser la colonisation française en Algérie ».
Le Monde 24/12/2025.
 : tamharsa n Fransa d tinnɣit/crime, issefk tamurt n Fransa ad d-tefdu ayen akk i tga di tmurt n Lezzayer, issefk ad tessuter asuref/smaḥ i tmurt n Lezzayer !){kind=link}