Tamurt irran takmamt i umedyaz, i t-igren di tesraft, ur tezmir ad tili d tamurt gar tmura i igan azal i umdan, d argaz neɣ d tameṭṭut, akken ibɣu yili.
Ur tezmir ad taɣ amkan deg igerwan ibedden d talast gar izerfan akked yal tasnareft/dictature.
S tuqqna n Mohamed Tadjadit di 5 iseggasen n unekraf, tamurt n Lezzayer tekcem aluḍ-nni n yir ammus (1).
Akken bɣunt ilint tecrurin i yas-d-aâllqen akken ad as-sbibben yal tamsalt, zun ikker-d d acengu n tmurt-is, ass-a yiwen Uzzayri ur ittamen tikerkas-nni.
Tamsalt tefra, ur telli tagut : « taɣdemt n tmurt-nneɣ teqqen Mohamed Tadjadit akken ad as-rren takmamt, akken ad issusem ».
Maca, ur izmir yiwen ad yerr takmamt i umedyaz di tiɣri-s, di twuɣa-s i tayri n tmurt-is. Nnan-t imedyazen sdat-s :
Eǧǧet-iyi abrid ad aâddiɣ
Iwumi iyi-tugadem
…
Ifasssen ur kkaten ara
I tira iwumi laqen (2)
….
Azekka ad t-inin imedyazen ara d-ikkren, s tiɣri yugaren tin illan ass-a, ad iddu ssut-nsen, ad izger akkin i tɣilla.
Maca, maca… tasusmi n tmurt ass-a ur telli d ayamun ad d-iglun ayen ilhan.
Maca, ur iẓri yiwen ma d tin zun n tidderɣelt, n ‘’tesmeḍ n wul’’ n waṭan i d-innulfan, neɣ d tin kan n usemnenni n wurfan, tirint nnig tayeḍ, ar d-yaweḍ wass-nni ideg ara yaɣ uḥeǧǧaǧu ameqqran n waklan idduklen di ddra n tlelli-nsen…
Tamawt :
Si berru n Boualem Sansal si lḥebs deg was n 13/11/2025, iteddu wawal, zun d ayen issewhamen : « amek adabu d-ibran i Boualem Sansal, ikkat s wa ijebber s wa, deg wass-is iwwet Mohamed Tadjadit s 5 iseggasen, amek ? ».
Tidet kan : tuṭṭfa n Sansal ɣer lḥebs d laâr, berru i yas-d-bran d aârayen, am wawal-nni n umedyaz (3) !
D tamsalt n wass-a i yessefken ad teg talast gar teɣdemt/justice akked tsertit : asmi ara tbeddel teɣdemt n Lezzayer, ur tettili d taqeddact n tsertit, ass-nni ad ikkes wugur d ameqqran ɣef tmurt…
Aumer U Lamara
Timerna / Notes :
1. Tiɣimit n teɣdem n Dar El Beida (tribunal criminel) n wass n 11/11/2025, tefra s tefgurt/peine n 5 iseggasen n unekraf/lḥebs, akked 200 000 DA i Mohamed Tadjadit.
2. Asefru n umedyaz Lhacène Ziani ; d asefru i cnan yakan ‘’Ideflawen’’.
3. D awal n umedyaz ameqqran, Yusef U Qasi (1680 – 1740 ?), asmi yas-inna yiwen ilemẓi :
– A Dda Yusef, ad nemaâbbar ?
Nnan, irra-yas Yusef U Qasi :
– Ma nemaâbbar di sin, akken i teffeɣ taâkes : ma ugareɣ-k, ad as-inin « ẓer kan, d laâr, irna-t umɣar ! », ma tugareḍ-iyi, ad as-inin : « ẓer kan, d aârayen, ikker ad imaâbbar akked umɣar ! ».
* Amaâbber : lutte gréco-romaine – amaziɣ.
