.){kind=link}
Di tmura n teɣdemt/justice, illa wawal : « ur irennu yiwen awal deffir wayen tefra teɣdemt, ilha n dir-it » (on ne commente pas les décisions de justice).
D tidett… illa di tmura anda tella teɣdemt tilellit (1) !
Tifrat n timenɣit n Djamal Bensmaïl di tzeqqa n teɣdemt n Dar El Beiḍa, ur teqqim di tzeqqa-nni n teɣdemt, gar ifassen n ɣerraq, imastanen, amezzarfu. Tamsalt tekcem annar n tsertit, zun d amezrag mgal Izzayriyen.
Tuttra-nnaɣ, d anadi ɣef tidett anda tella.
Mačči d ‘’tidett iwumi tesker taẓult’’, gar ifassen n udabu. D wid illan din, ass-nni n 11 ɣect 2021, di tnemmast n Larbaâ At Iraten, ad tt-id-ifken.
Llant ttwirat, llant les videos mačči yiwet. Deg-sent neẓra yiwen umdan, bu txatemt-nni tawraɣt n wureɣ (alliance), d anemmas gar yergazen, inṣel-as ucebbub :
Ilsa takmamt akked ur iẓer yiwen udem-is,
Ibedd zdat tebburt ufurgu n imsulta, sin ifassen ṭṭfen akka d wakka ɣef tebburt,
Izzi-d azagur-is/aârur-is ɣer yermdanen-nni yella deffir-s, ur yugad, acku llan ‘’imeddukal-is’’ d afrag deffir-s,
Issuffeɣ-d tafekka n Djamal Bensmaïl (illan yakan immut) seg ufurgu, zun d tacekkart n siman, ur ikukra, ur irfid aqerru-s,
Ikna, isser-itt ɣer tmurt, syen iṭṭef-itt deg wagus, izzuɣer-itt am akken zzuɣuren iserdasen n ‘’les forces spéciales’’ wid immuten,
Ikna s laâqel, ur yugad, ur ifki tamuɣli akken ad inser, ma yella gren-d imsulta (sic!) !
Ifka tafekka n win immuten i yelmeẓyen yeḥman, zun d iqeffafen, akken ad t-serɣen deg ubrid.
Anda-t ass-a bu txatemt-nni tawraɣt ?
Illa gar 49 n yemdanen-nni iwumi ḥekmen s lmut/tamettant (2), neɣ yeffeɣ akkin, yuɣal ɣer umkan-is, ansi d-yusa,… neɣ yeffeɣ tamurt, d ‘’attaché’’ culturel’’, neɣ ‘’attaché militaire’’ di kra n lambasad n tmurt n Lezzayer ?
D netta kan, akked wid illan din am netta, ara d-ifken tidett ɣef twaɣit n Larbaâ At Iraten, ma yurez-it unezgum, iččur wul-is, akken ad issifes lxaṭer-is.
Aumer U Lamara
Timerna / Notes :
1) Illa wawal n Mohia : « Di tmurt n la Suisse tella la justice, mačči am dahin ɣur-nnaɣ ! ».
2) Répression de la révolte de la Kabylie en 1871 :
Taɣuri n ‘’49 condamnations à mort’’ gar 102-nni i yeṭṭwaṭṭfen ɣef temsalt-nni, ur telli deg unnar n teɣdemt. Di tmuɣli-nnaɣ, d leǧwab asertan n wid iṭṭfen adabu di Lezzayer, akken ad wten ad rẓen isem n tnekra di tmurt n Lezzayer iseggasen ɣer zdat.
Mačči d ayen illan d amaynut, illa yakan deg umezruy.
Mi tensa tnekra n 1871, feclen yemdanen, Fransa tewwet s uzduɣ ameqqran akken ad tessefcel tamurt : ḥekmen s lmut i temrawin n yemdanen, nfan wid nfan ɣer tmura nniḍen (Cayenne di Guyane, Nouvelle Calédonie, Surya, …), kksen akal n uzaɣar i wat tmurt fkan-t i ukulun, suffɣen-d tawsa/leɣrama tameqqrant i wid akk illan di tnekra, s yismawen-nsen di yal taddart, azal n 36 imelyunen frank-ureɣ (francs-or) ; kksen daɣ azal n 450 000 gtar n wakal i wat tmurt !
Wid iṭṭfen adabu ass-a di Lezzayer ɣran amezruy n temhersa/listiaâmer n Fransa, wten tamurt akken i tt-tewwet Fransa s tmuɣli-nni : « semɣer tiyita, ewwet, akken ur d-ireffed yiwen aqerru-s, akka 20 iseggasen ɣer zdat ! ».
Maca, di 2022 imdanen ssnen, tbeddel tallit, mačči am tin 1871 !