Adabu yekker ad d-iniwel abazin n tafrent iwumi yessen si 1962. Di 2021, ur illi umaynut, ur d-ildi abrid nniḍen, win i sarmen imelyunen n Izzayriyen.

Aheggi n tifranin n APN akked APW di tlata wagguren d-iteddun, iban d askunner n teḥraymit, ur d-igellu s wayen ilhan i tmurt : « Anda llan ixerwiḍen, illa wayen iffren ».

Mačči d tazzla neɣ d aɣiwel i d ugur, d wid issefken ad azzlen i d ugur amezwaru. Ur tezmir ad d-tili tafrent iteddun ad d-teslal ‘’Lezzayer tamaynut’’ s ikabaren yesnegren tamurt : FLN, RND, MSP, TAJ, MPA, atg.

Am akken ur tezmir ad d-tili tafrent n tidett skud illa udabu nnig udabu, ‘’les services’’ n war udem ur issin yiwen, wid ibeṭṭun imukan i yikabaren, qbel ad d-tili tafrent, efk-as i wa, ekkes-as i win, zun d urar n damma, d asekkak.

D tilufa-ya i d-isnekren Izzayriyen dduklen si furar 2019, akken ad tbeddel ɣef lsas.

Siweḍ akeddab ar tabburt

Ugur ameqqran d tamsalt n ukabar n FLN. Skud illa FLN d akabar gar ifassen n udabu, ur tezmir ad tbeddel tmurt. Acku « FLN mačči d akabar, d ayla n Izzayriyen si 1954 » (1).

Tigawt tamezwarut n Teboune, qbel yal tafrent, issefk isem n FLN ad iffeɣ si tsertit, ad ikcem amkan-is deg umezruy, ad t-lemden imeẓyanen deg uɣerbaz.

Abrid nniḍen akk d tikellax.

Ma yekkes FLN deg unnar, yuɣ amkan-is deg usalay/musée n umezruy, ad tekkes temsizzelt usekkak. Ass-nni, ad tbeddel udem

Maca, ass-a mačči d abrid-nni i yuɣ udabu. Netta yeẓẓa tuẓẓal yiwet tikkelt, tamurt ines, mačči d ayla n ugdud azzayri. Sin iseggasen-aya tiɣri n ubrid teqqar « tamurt d ayla-nnaɣ, ad neg rray-nnaɣ ». Adabu ur d-ifki tameẓẓuɣt i tiɣri n ubrid.

Tasertit n udabu ur teddi ad tbeddel, acku i nitni ‘’agdud Azzayri ur issaweḍ i tugdut’’.

Tasuddest-is (sa stratégie) tefka ɣer yiwet lewhi : ad sberken amussu/lḥirak, ad d-snulfon ayen ur nelli, ad skecmen Izzayriyen ɣer leḥbus di yal tama, ad skecmen ccek gar yemdanen, ma ufan ad snekren imennuɣen gar Izzayriyen akken ad d-bedden nitni afella, i tifrat.

Taggara, ad heggin amkan, d tagelda i warraw-nsen.

A.U.L

Timerna / Notes :

1) Asmi d-snulfan taḥilett-nni ‘’Parti du Front de Libération Nationale’’, di tallit n parti unique, Kateb Yacine inna-yas : ‘’si c’est une partie de quelque chose de plus important (la majorité du peuple algérien), alors elle est où cette autre partie, et elle s’exprime où ?’’ (citation de mémoire).