Yevrahim At Waεrav seg Wewrir At Mengelat (Micli), yella de neţţa i d tṛejman n lkumiṣar Dumont deg iseggwasen-nni imezwura mi d-keccmen iṛumyen ar Micli. Yibbas yenna-yas lkumiṣar i Yevrahim :
– Kunwi s Leqvayel teţzzuxum, teqqarem-as : « Ulac wi yifen tameslayt taqvaylit! Aha ṭren awiyi-d amusnaw-nni nnwen ad meslayeɣ yid-s! »
Yevrahim iruḥ ar Tmejjuṭ iwala-d Lḥusin Uvacir, yenna-yas :
– A Da Lḥusin, atan lkumiṣaṛ yevɣa ad yemeslay yid-k, yenna-yi-d awit-id.
– D acu i tevɣiḍ a k-inniɣ a Yevrahim a mmi : d nutni i ţ-iḥekmen, ad dduɣ kan.
Ddukklen-d akken ruḥen-d ɣer Micli. Lḥusin Uvacir, iruḥ-d kan akken s levsa-nni yeţlus yal ass, ur d-icebbeḥ ara. Dumont, mi iwala Lḥusin Uvacir, d acu n levsa d-acu n liḥala, iweznit s ṭarf n ṭiṭ, yenna-yas :
– D wagi si teţzuxum?
– Ih, d Wagi!
Dɣa yenṭeq ar Lḥusin Uvacir, yenna-yas :
– D kečč akken si ţzzuxun Wat Mengelat?
Yevrahim yeṭarjim-as i Lḥusin Uvacir, yerra-yas-d :
– Inna-s lkumuṣaṛ agi : « nekkni di tmeslayt nneɣ ur nessεa ara awal n zzux, nessεa sswav d ţideṭ. »
Yenna-yas lkumiṣaṛ i Yevṛahim :
– Inna-s ihi a iyi d-yinni : d acu n lfarq yellan gar lektev akked tideţ!
Yenna-yas Lḥusin Uvacir :
– Gar tideţ d lektev kan ṛevεa iḍuden.
Yenna-yas lkumiṣar :
– Inna-s a yi d-isefhem ugar annect-a.
Yenna-yas Lḥusin Uvacir :
– D lqis yellan gar tiṭ d umeẓuɣ. Tideţ dayen wallent wallen, ulac win ara tent-yeskidven. Lekdev dayen yesla umeẓuɣ, yal wa amek ara d-yeṣiweḍ awal.
Ahmed Aït Bachir
*Lhusin Uvacir Ait Bachir (Hocine Ait Bachir ) d Jedd-is n Mulud Mεemmri.
