29 juin 2022
spot_img
AccueilIdéeYidir Imenfi

Yidir Imenfi

Kabylie ancienne

Yidir d yiwen illemẓi yeţidir di yiwet n taddert di lεarc Nat Mlikec, di zman-nni Fransa mazel testaεmmaṛ tamurt n Lzzayer.

Vava-s isem-is Muqṛan, d afellaḥ, yesεa lmal, yerna yessεa diɣ ddeqs n yigran, yelhad d wakal-is akken ilaq. Yidir yeţak-as afud i vava-s di tyesawt, di tyarza, deg-wafras n tfarkiwin d wayen nniḍen. Mi d-yebbweḍ lawen n lɣela, a ţ-id jemmεen s axxam, a d-kksen lεula nnsen, a d-kksen azel n inevgi n Ṛebbi, diɣ a d-rrnnun a d-kksen zariεa i wseggwas i d-iteddun, ayen i d-yeggwran a tawin ɣer suq n Tezmalt a tezenzen.

Yiwen wass deg-wass n suq, yiwen ucembbiḍ yusad a d-yeqqḍu ar Da Meqṛan. Yeççuṛ aḍelaε-is, yekker a d-iṛuḥ mebla ma ixeleṣ, yerna i sexxṣaṛ-as-d awal i Da Meqṛan. Yidir, iwala iεedda lvaṭel ɣef vava-s, dɣa ineggez ɣef ucembbiv-nni, yesɣli-t ɣer lqεa, i retεit s lbbunnyat ar wudem-is issfunnzer-it immaṛa, udem-is i teddu yakk d idamen. Alarmi s bessif i t-id kksen imseweqen ger ifasen-is.

Yuɣal suq din din yefra. Imsewqen, nnan-as i Yidir tura ɣas rrwel, neɣ ad assen ijjaddarmiyen ak rrefden. Yidir yeffk-aţ ţarewla, iεedda s axxam nnsen irrfed tamekkwḥelt n vava-s akk ţḥezzamt n ukkaṛṭṭuc, yuli s adrar.

Seg-wass n taluft-nni n suq, Yidir yeţidir s tufra. Ijjaddarmiyen d Icenbbiḍen sufɣen fell-as iqelaven. Yidir, tiẓgi teţak-it i tayeḍ, aεciw yeţak-it i wayeḍ, yefeɣ fell-as uvarreḥ, deg At Mlikec, deg At Aεbbes, deg Uqbu,… Yidir slan akk yi-s yemdanen. Uɣalen, sawalen-as Yidir Imenfi. Lqqwuyad d icenbbiḍen i kecmm-it-en lxuf. Ula d Lkulun-nni n uzaɣaṛ n la Summam diɣ tkecemit-en targgagayet.

- Advertisement -

Yidir, maççi d amesvateli, warǧin yeḥqqaṛ yiwen. Ssya ar da ad iṣṣub s tufra ar luḍa , a d-yawi ayen ara yeçç d wayen yaḥwaǧ, a d-yuɣal s adrar. Mi Yesla s Ucenbbiḍ neɣ Lqayed, yeḥqqar albεeḍ n yemdannen, a d-iṣṣub at yesexxwleε, a d-yeggal deg-s, warǧin yenɣa yiwen. Ula d Lkulun-nni n Luḍa n Ṣummam, uɣalen ur teţaggwaden-ara. A d-yass ad yawi ayen yebɣa, a d-rren iman-nnsen ur twalen-ara.

Acenbbiḍ-nni i g-sfunzar di suq, yaṛɣa fell-as yebɣa a t-id yeṭṭef, yefka fell-as ula ţajεelet i win ara s t-id yezenzen.

Yibbwas, yiwen umeksa yebbw-id s lexwbar i Yidir amek yakk i g-xeddem, yessen lawen gi d-yeţţṣubbu ar suq n Tezmalt…, yessen akk tikli-ines. Yesla s tejεelt i g-fka fell-as Ucenbbiḍ-nni, dɣa iṛuḥ ar ɣuṛ-s, yenna-yas :

– Ma d-iyi d-fkkeḍ tajεelt-nni si tṛeggmeḍ i win ak d-yemlen andda yeţili Yidir Imenfi, ak d-inniɣ annida, d amek i d-ikeççem ar suq n Tezmalt !

– Ma temmliḍ-iyi-d amek, ak fkkeɣ tajεelt s iṛeggmeɣ, ur ţuɣaleɣ-ara deg-wawal-iw!

– Ihi ass n suq, ruḥ ar wemkan leflani uqbel ad ɣllin yetran deg genni, arǧu-t dina ad yass.

Yeffka-yas tajεelt-is, ssyinna iruḥ ar Ijjaddarmiyen, yenna-yasen d acu is d-yenna umeksa-nni. Dɣa ijjaddarmiyen akk i Icenbbiḍen, xedmen-as taxazabit i Yidir. Deg wass n suq taṣebḥit zik, sireklind akk suq , uṛǧǧan alarmi i d yebbweḍ Yidir Imenfi, wehan akk fell-as tixwnefyac n tmeggweḥlin-nnsen, εegḍen-d fell-as, nnan-as:

– Sars tameggwḥelt-ik, rrfed ifassen-ik neɣ a nejved fell-ak!

Yidir iwala dayen, ur yezmmir d acu ara yexxdem, isars tameggwḥelt-is irrfed ifasen-is. Yusad Ucenbbiḍ-nni iseressl-it, yenna-yas :

–Twaleḍ, ṭṭfeɣ-k-id! Tura a ţţxelṣeḍ ayen ur teççiḍ!

–Teṭṭfeḍ-iyi-d tura, umaεna ur ţaggwad, am ass-a a d-yas wass-ik!

Yidir Imenfi, sεeddan-t d i çṛaε, ḥekkmen fell-as tleta iseggwasen n lḥevs.

Lεarc akk yemmuɣven. Da Meqṛan amzun yeɣli-d fell-as wedrar. Tazmmart teǧǧa-t, ur yezmir-ara a d-innɣec ula ţivḥirt n lebṣel yellan s daw waxam-is, dɣa yura-yas tabṛaţ i Yidir ar lḥebs, yenna-yas :

– Twaleḍ a Yidir a mmi! Ass-mi telliḍ yid-i nemmεawen ddunnit. Tura vava-k teǧǧa-t tezmmart, ula ţamazirt-nni gi n teẓẓu levṣel ur zmireɣ a ţ-nneɣceɣ!

Yidir, mi yeɣṛa tavṛaţ n vava-s yeɣli-d fell-as leḥzen, yeţţxemim amek i g-zzmerr a t-iεiwen. Dɣa tusa-t-id tikti. Yeẓṛa tivṛatin i t-id yeţawḍen, neɣ tid i g-cceggiε neţţa, qaṛen-tent iεesassen n lḥevs. Iεedda yura-yas tavṛaţ i vava-s, yenna-yas :

-A vava, ɣurek a ţţneɣcceḍ tamazirt-nni levṣel, neɣ as d-awiḍ afellaḥ ara ţineɣccen! Atan deg-s ay freɣ akk ayen akken twaleḍ yella gara-nneɣ!

Mi ɣṛan tavṛaţ-nni iεesassen, fkan-ţ ijjaddarmiyen. Ijjaddarmiyen, wehmen d acu i g-farr akka Yidir Imenfi di tmazirt-nnsen. Azekka-nni taṣevḥit, bwin yid-sen Icenbbiḍen, rrnnan ixeddamen s iqubac ẓedmen ar taddert n Yidir. Ssfaεffεen Da Meqṛan ameɣvun. Nnan-as :

– Andda-ka tella tmazirt gi tţeẓẓu-m levṣel ?

-Ţagi yellan s daw waxxam. D acu ara txedmem di tmazirt n levṣel a wladdi?

– Yah, tarriḍ iman-ik ur t waleḍ ara? A d-nesekkfel ayen akken tefrem keçç d mmi-k s daw wakel!

– A wladi ur tesεiḍ i nefarr nek d mmi di tmazirt agi, yehwa-yawen kan!

-Yah! i tevṛaţ agi ik d-iceggaε mmi-k, neɣ d lekdev? Susem, neɣ ak nnawi a ţarrnuḍ ar ɣuṛ-es ɣ er lḥevs!

Da Meqṛan ageswaḥ yuɣ-iţ mkkumda, yesusem. Nutnni bdan a taɣuzi, akal yellan s wadda rren-t-id s ufell-a. Fegllen akk tamazirt-nni, alarmi ţammeddit ur tesεiḍ i yufan, rrefden duzan-nsen ṛuḥ-en.

Da Meqṛan ur yefhim acemmek.

Kra bbwussan, Yidir yura-yas-d tavṛaţ i vava-s, yenna-yas

–A vava, a d-yilli εeddannen yemcumen-nni, feglen akk tamazirt-nni levṣel!. Ihi, tura tzemṛeḍ a ţeẓẓuḍ tiveṣlin-ik !

Alarmi d imiren i g-faq Da Meqṛan, acuɣaṛ Ijjaddarmiyen fegglen akk tamazirt-is. Dɣa yevda uẓẓzu n tveṣllin-is.

Win d-iεeddan ad yerr slam ɣef Da Meqṛan, ad s-yinni :

-Atan mazel-ik t zemreḍ a Da Meqṛan, mazel lbaraka!

– Ih a tarwa akka, ih! Deg-ul-is, yeqqaṛ-as : “ Tagi d lbaraka n Yidir-inu, a t iḥrez Ṛebbi! ».

Ahmed Aït Bachir

 

ARTICLES SIMILAIRES

3 Commentaires

    • Mass Madani
      De grace soyez seculaire; vous avez ecrit une phrase et le nom de Dieu a apparu deux fois.
      On ne peut avancer vers l’universalite comme cela; ce meme concept que je crois vous cherissez.

  1. Azul a leflani – Ḥmed Ayt Lbacir

    Ttmax inek iyezzem am ifer n idles; qessiḥ-it am ifelfel nni i umi neqqar „ic n umaεiz“ … d lbarud s timmad-is, lḥaṣun.

    Mayella wayen i ad k-ed iwelleh rebbi, akken i as-inna Muḥend U Lḥusin, i Muḥend U Mḥend, γef akken i d-iwwi awal fell-asen Dda Lmulud deg yiwen deg idrisen ines i umi i iqqar: “yenna-ays Ccix Muhand”, ula ara trajuṭ, ad tεeṭleṭ, neγ ad terreṭ aṭar γer deffir.

    Nek, γas rnu iyi seg ass-a d asawen γer iqerrayen inek.

    Aru ! Aru ! Aru skud tettazal tala inek. Aman-is tteksen fad i win akked tin i umi teqqur taγect.

    Imi i ssuliγ taγuri n uḍris inek, teṭra yid-i am win i ffuden, iswa.

    Tira, γef ayen sneγ deg tγawsa ayi, tettunefk-ak

    Tanemmirt inek γef uḍris i d-turiṭ.

    Ssarameγ ad k-nγer tikkelt n iṭen, tin i d-iteddun.

LAISSEZ UN COMMENTAIRE

S'il vous plaît entrez votre commentaire!
S'il vous plaît entrez votre nom ici

Les plus lus

Ce que vous devez savoir sur la Bugatti Veyron 16 FR

Les ingénieurs automobiles ont fait des progrès incroyables au cours de la dernière décennie du 20e siècle. L'essor des ordinateurs de bord puissants et...

Les plus populaires

Commentaires récents