Ass-a ad d-nelhi di telkin n wiyaḍ, ad nettu tilkin-nnaɣ… maca wḍent-aɣ-d yakan telkin-nsen si lqern wis 7, mazal ad d-rennunt !

Muḥemmed Ben Salman (MBS) ikker ad ibeddel abrid i tsertit n tmurt-is, ad tt-id-issuffeɣ si tillas n tinneslemt tawehhabit, tasalafit. D isalan i d-ttawin yeɣmisen n umaḍal. 

Ussan-a yessaweḍ akken ad d-issuffeɣ asekkak yellan deg iḥaditen n ddin ineslem (« amur ameqqran n iḥaditen n tinneslemt, d asekkak »). D ayen ilhan i tmurt-is. Ur nkeččem nekkni di tsertit n MBS.

Ugur, mačči d ayen iga MBS di tmurt-is, ugur d asirem n watmaten-nnaɣ di Tmazɣa i yessaramen ad d-yas wayen ilhan si tmurt-nni i  Lezzayer, Merruk, Tunes…

Ur netettu, ayen akk illan n ‘’imeṭṭurfan inselmen’’ (islamistes, terroristes) deg umaḍal, si tmurt-nni i d-ugmen tasertit-nsen, tamussni-nsen, tadrimt swayes sedduyen tiḥila-nsen d lmut-nsen. 

Ur issefk ad rnun imeɣnasen-nnaɣ ass-a di tmurt n Lezzayer, wid i yeddan deg ubrid n usirem n bennu n tugdut, beṭṭu gar tsertit akked ddin, ad ddun d iqeffafen di tsertit n MBS. Ur izmir ad d-yas wayen ilhan si tmurt-nni.

Deg iseggasen n 1940, imeɣnasen n PPA sutren i Laâulama n Maser akken ad nhun ‘’Laâulama’’ n Lezzayer, akken ur d-ttebdaden d icenga n tegrawla d-iteddun. Si Lqahira, uznen-d i Bachir Ibrahimi yunag ɣer din, kksen-t akkin deg ubrid d-iwwin tanekra n 1954. Mi yella di Lqahira, Bachir Ibrahimi iga yal taḥilett akken ad issexdem inelmaden n Lezzayer yellan din, akken ad ten-issekcem di tinneslemt tawehhabit tasalafit. 

Anta tasertit n MBS ?

Tamezwarut, ur illi yisem n tigawt n tegrawla di tikli n MBS. Tasertit-is tban am uzal : akken kan ad yernu tazmert i udabu n twacult-is, tin i yerran tamurt d ayla-s. Ulac tamurt nniḍen deg umaḍal am ‘’Saudya’’, i d-yuɣen isem n twacult El Saâud, seg wasmi d-tlul di 1932, tin ibedden d tagelda deg ufus n At Saâud.

Ass-a MBS yeẓra timura yellan tama-nsen (Qatar, Emirates, …) simmal teddun ɣer zdat di tsertit-nsen deg unnar n izerfan(1), iẓra daɣ ilmeẓyen n tmurt-is simmal teffɣen, regglen ɣer Qatar, Dubaï neɣ ɣer tmura tiberraniyin (Legliz , Marikan,…) ; iẓra mačči d ayen ilhan i d-iteddun mi neqqsen simmal yedrimen n petrol.

Si tama nniḍen, imeṭṭurfan i d-rebban nitni akken ad gen ccwal di tmura tinselmin, tura rran-d tamuɣli-nsen ɣer tmurt n Saâudya akken ad wten ad ṭṭfen adabu din. Ass-a d timsizzelt gar twacult n MBS akked imeṭṭurfan iwehhaben. Asexdem n ddin, d yiwen wennar n umennuɣ gar wiyaḍ, send ad taweḍ ɣer ibeckiḍen d yeblandiyen !

Anwa abrid issuffuɣen ?                            

Mačči d nekkni ad asen-imlen asalu deg ara ddun.

Maca, akken i nwala, akken i nessarem i wegdud n tmurt-nni, yiwen ubrid i yellan, ma MBS ira ad iffeɣ seg ubrid n lejdud-is : a yerr tamurt i yat tmurt-is, ad ilin d imezdaɣ n tmurt am netta, d iɣermen/citoyens, mačči d aklan-is (pas des sujets de la famille El Saâud). 

Deg ubrid-a, yiwen usaḍuf/une seule lois, ad tent-ifrun akk, d tamenḍawt tamaynut : ad tekkes tgelda n At Saâud, ad tbedd Tagduda El Aârabya (République d’Arabie). D tasarut akken ad kksen aqerru i tsertit tawehhabit tasalafit icebblen amaḍal… tin iteddun azekka ad sen-tekkes aqerru i nitni.

Mačči d awezɣi, acku taɣamsa-nsen, s TV El Arabya, tezwar yakan deg ubrid-a. 

Aumer U Lamara

Timerna / Notes.

1) Emirates iteddu ad ibeddel tamenḍawt-is, anda ad tebḍu tsertit gar-as d ddin (« Mon pays veut séparer la religion de la politique », déclaration récente de l’ambassadeur des Emirats aux USA).