Deg wagu deg tella ass-a tmurt, anida yiwet luzin kan i iteddun yal ass : d taɣdemt n Zeghmaṭi i yettaran tarwa n Lezzayer ɣer leḥbas, tessuffuɣ-d imukar akked ibandiyen imeqqranen, ur ishil ad yefk yiwen tamuɣli ɣer zdat, ad issirem, neɣ ad yamen tezmer ad tbeddel.

D ayen illan. Maca d tamara ad nefk tiṭ ɣer tizi d-iteddun, akken ad nẓer anida ara nejbu deffir yiɣil akkin. Adabu n wass-a tekcem-it twekka n tewser, n laâr akked tkerkas, d abrid ad igrurej.

Yiwen seg wid illan di tnekra n wass 22 di furar 2019, ur ifcil ur izgil yiwet tikli di Lezzayer, issaram irennu, maca yiwen wawal deg yimi-s : «Ugadeɣ ad teṭṭef aɣerda tnekra-ya, ugadeɣ, ugadeɣ !».

Akken ur ‘’teṭṭef aɣerda’’ azekka tegrawla n furar, d at tmurt ad tt-ibeddlen, mačči d timura d-iqqimen akkin s tuccar-nsen. Ma ulac iɣisi gar ugdud, ur d-keččment tuccar-nni.

Yiwen deg iberdan d-ibanen i tsertit uzekka n tmurt n Lezzayer, mi rsent tgejda n tugdut, d tuddsa n timanit n yal tamnaṭ n tmurt (autonomies régionales). Di tira yellan, timnaḍin timezwura d-ibanen, d tamurt n Iqbayliyen, Tamẓabt, Aheggar, Awras…

Wid akk ibedden i tsertit-a wwin-d amedya si tmura n umaḍal i yufraren, anda tbedd tugdut n tidett (Suisse, Allemagne, Belgique, Espagne, USA, Mexique, Inde, …). Ur izmir yiwen ad d-isukkes i tsertit-nsent.

Akken ad teddu tsertit n timanit n temnaḍin di tmurt n Lezzayer, mačči yiwen ccerṭ i yellan. Sin i yellan, zun d tigejda :

1. Adabu yufraren ad yili d awanek idduklen di talwit (Etat central), win ibnan ɣef tmenḍawt i qeblen at tmurt di tafrent ur numis s tikerkas.

2. Timanit n yal tamnaṭ (autonomie régionale) ad tbedd ɣef tmenḍawt-nni yesdduklen tamurt, anda ur tettili tuccḍa ɣer ubrid nniḍen. Ad yili ufrag d agadir ur izegger yiwen.

D tuccḍa ɣer ubrid nniḍen i d ugur ameqqran !

Ur illi ccek, tikta iteddun ass-a di temnaḍin n tmurt, am Tamurt n Iqbayliyen, Tamẓabt, d tikta timagdayin (valeurs républicaines), maca ur izmir yiwen ad iḍmen ayen ad d-ilalen anda nniḍen. Di tallit n txerbicin n taârabt-tinneslemt, llan ugut n wid ad d-iskecmen tuccar-nsen akken ad sbedden lxalifa di temnaḍin nniden. Idrimen imeqqranen llan. 

Iḍelli kan di Libya, tamurt n Qatar teṭṭef tamnaṭ n Benghazi, timesrufag-is srusuyent-d yal ass uzzal d lbumbat i ṭṭrad gar At Libya. 

Azekka, timura n Qatar, Emirates, Terk, Maser neɣ tayeḍ ad d-skecment uzzal i ‘’watmaten-nsen Aâraben’’, i ṭṭrad gar-annaɣ akken ad fergen aḥric si tmurt n Lezzayer. Ad tedwel tmurt am tallit-nni n leqrun imezwura, ‘’les siècles obscures’’.

Iḍelli kan, ddaw udabu n Bouteflika, timura n Qatar akked Emirates saḥellen amur si tmurt n Lezzayer, deg uzaɣar ameqqran (Hauts Plateaux), i tnegmert/syada n tyuzaḍ akked teɣzalt (chasse à l’outarde et à la gazelle). Timesrufag nsent ttrusun ttafgent deg umafag n Ghardaïa, ur iẓri yiwen ayen illan deg isenduqen-nni imeqqranen i d-srusunt. Anwa iḍemnen ass-a ulac deg-sen les missiles sol-air FIM-92 Stinger n Marikan, heggant i wass-nsent ?

Iḍelli kan, deg umennuɣ ur nefri gar At Mẓab akked Caâmba di Ghardaïa, wid isserɣayen ixxamen akked tḥuna n Imẓabiyen, tefka ɣer zdat tmuɣli-nsen : « kkaten ad suffɣen Imẓabiyen si teɣzut n Mẓab, akken ad ssalin lxalifa, ad d-rnun timnaḍin n Hassi Messaoud akked Hassi Rmel di lxalifa aârab». D awal d-inna yiwen illan di tnemmast n tnekra-nni di Ghardaïa. 

Iḍelli, ass-a llant temnaḍin di tmurt n Lezzayer anda ttemnasaben akked At Emirates d Qatar, ttemyejwaǧen akka d wakka akken ad gen asɣen n idammen. Azekka ad smeɣren, ad ẓẓun tuẓẓal di tmurt, ad farsen ma yella-d ccwal, ad gen tilisa i lxalifa, anida i tessaweḍ tezmert-nsen. Mačči d ‘’la politique fiction’’. 

Uguren llan di yal tasertit, di yal tallit. Issefk ad ten-iẓer yiwen, ur ten-iteffer, ad sen-yeg afrag s wayen iwatan akken ad iddu ɣer zdat. Tasertit n timanit n tidett ad teddu ad tessers talwit di tmurt. Issefk ad tezwir di tukksa n uɣeẓẓu n barbes-FLN (la prédation FLN-iste, arabo-islamiste).

A.U. L

Timerna / Notes.

1) Titre/azwel : Quelles autonomies à côté des califats ?