6 décembre 2022
spot_img
AccueilA la uneArrazen tesbeddit Tiregwa

Arrazen tesbeddit Tiregwa

Wid yewwin arrazen n tsekla d-tesuddus yal aseggas tesbeddit Tiregwa, tarigt 2972/2022

S tumert d yiseɣ meqqren ara d-nerr igemmaḍ n teẓrigt 2021-2022 n temsizeliyin n tsekla i d-tesuddus yal aseggas tesbeddit Tiregwa, gar-asen : Arraz Belɛid At Ʃli n tira n tullisin i d-yettillin seg 2012 ar ass-a, arraz Racid Ʃellic n wungal yufraren seg 2014 ar ass-a, arraz Ṭawes Ʃemruc yufraren seg 2020 ar ass-a akked warraz Furulu n tsekla n tmeddurt yufraren seg 2021 ar ass-a. I wesmekti, iswi n warrazen-agi, d asebɣes n wesnulfu d tira taseklant deg tmeslayt-nneɣ.

Arraz Racid Ʃellic n wungal yufraren, tarigt tis 8

Aseggas-a d tamarut Massika Touati i yuwin arraz Racid Ʃellic n useggas 2972-2022 s wungal-is “ZIRA ”  i d-yeffɣen-di ctember 2021 ɣer tezrigin “IMAL”.

Massika Touati, seg Yimeẓalen di Bgayet tettaru idlisen d yeḍrisen n tsekla ladɣa deg tesɣunt taliktrunit TiziEvents.

- Advertisement -

Tura ungal-is amenzu “ZIRA” iyes tuwi arraz Racid Ʃellic n useggas-a.

 

Ayyuz i Massika Touati!

Arraz Belɛid At Ʃli, tarigt tis 9.

Taẓrigt tis 9 n Temsizelt n tullist yufraren i d-tesuddus Tesbeddit Tiregwa s tallelt n Tiddukla Tiwizi n Maṛṛikan. Iɛeggalen n tesqamut n yineẓrafen fernen-d :

  • Arraz amezwaru: Samira Hocini s tullist-is “Anebdu n wurɣu
  • Arraz wis sin: Dalila Keddache, s tullist-is “Tineggas
  • Arraz wis kraḍ: Larbi Yahioun, s tullist-is “Wissen ma ad yali wass?

Ayyuz !

Arraz Ṭawes Σemruc, tarigt tis 3.

Wid i d-yufraren aseggas-a deg Taẓrigt tis 3 n temsizzelt Ṭawes Σemruc n tsekla i yimeẓyanen i d-tesuddus Tesbeddit Tiregwa akked Tiddukla Tadelsant Tamaziyt n Maṛṛikan (ACAA):

– Arraz Ṭawes Amruc 0-5 iseggasen: Hamid Melaz, s wedlis-is “Tameɣra n wuccen “.

– Arraz Ṭawes  Amruc 6-10 iseggasen: Larbi  Yahioun, s wedlis-is “Briruc d yibiw yessewhamen “.

– Arraz Ṭawes  Amruc 11-18 iseggasen: Fatima Gherab, s wedlis-is “Izem d yilef“.

– Arraz Ṭawes  Amruc tisfifin n unuɣen (BD): Kamel Bentaha, s wedlis-is “Σeẓẓi akked Σezzul“.

 

Ayyuz !

Arraz Furulu (Mulud Ferɛun) n tsekla n tmeddurt, tarigt tis 2.

Taẓrigt tis 2 n temsizelt Furulu (Mulud Ferɛun) n tsekla n tmeddurt i d-tesuddus Tiregwa akked mass Yazid Djerbib tuwi-tt Massa Fadila Oulebsir n useggas 2972-2022 s wedlis-is Ṭawes Ibelɛiden (1910-1959)” i d-yeffɣen deg 2021 ɣer tezrigin “Ccix Muḥend Ulḥusin”.

Fadila Oulebsir d taselmadt deg tesdawit n Bgayet. D tamnadit diɣen deg tsekla, tutlayt d tgemmi tamaziɣt deg ugezdu n tutlayt d yedles amaziɣ. Ɣer-s Magister deg tsekla tamaziɣt akked Maitrise deg tussniwin tisensegmanin. Tettheyyi dukṭura-ines ɣef yinaw asunti deg tira n tmeṭṭut taqbaylit.

Adlis-is iyes tuwi arraz Furulu, d ungal amazray i d-tuwin awal ɣef tmeɣrast Ṭawes Ibelɛiden seg At Mlikec yennuɣ mgal tamharsa tafransist. D isem i d-tesukkes seg yimi n tatut. Temmut deg useggas 1959 s walddun, taqendut i telsa imir-nni, yeflan s tersasin, mazal-itt ar ass-a, terra-tt Fadila Oulebsir d taduli n welis-is.

Ayyuz i Fadila Oulebsir !

AMAYNUT : Arraz Tiregwa n tsuqqilt, tarigt 1ut : 2972/2022

Tasbeddit Tiregwa tettkemmil s wesbeddi n warrazen n tsekla akken diɣen teggar azeṭṭa akked tdukliwin nniḍen yellan deg umaḍal. Amaynut n useggas-a, d win i d-illulen s tallelt n Tiddukla Agraw n yimeɣriyen iqbayliyen n Fransa, iswi-s ad tefkk afud i yiwet n tewsit nniḍen n tsekla, tagi d tin yurzen tira n tsuqqilt. Yuwi isem : “Arraz Muḥya”, d tajmilt i Muḥend Uyeḥya (1950-2004).

Deg taẓrigt tamenzut 2972-2022, arraz yettunefk i mass Ahmed Nekkar ɣef wayen akk yura d wayen d-yesuqqel ɣer teqbaylit. Adlis-is Yugar ucerrig tafawet» yuwi deg 2010 arraz Mouloud-Mammeri n wungal yufraren yuran s tmaziɣt.

Seg wayen d-yerra seg tefransist ɣer tagi-nneɣ yella wedlis «Rebelle» n Matoub Lwennas  s wezwel «Asfel d uɣurru»,  «L’alchimiste» n de Paulo Coelho i yettwasuqqlen ɣer ugar n 80 tutlayin, «Alice au pays des merveilles» n Lewis Caroll, «La chèvre de Monsieur Seguin» n Alphonse Daudet, atg.

Anwa-t Ahmed Nekkar

Ḥmed Nekkar, ilul ass n 13 Meɣres 1955 di taddart Aɛfir, Lɛerc n wAt Selgem ittuɣalen ar temnaḍt n Delles di Bumerdas, tamurt n Leqbayel. Si mi yekfa taɣuri ines n tesnawit deg 1975 ikcem s temsizzelt s aɣerbaz n yimsudda Diduch Murad di Tizi-Wezzu.

Tawuri n leqdic-is d aselmad di teɣlift n usegmi. Uqbel ad iffeɣ ar teɣtast ( retraite) yeqdec d aselmad n uẓawan d solfège deg uɣerbaz alemmas seg 1990 armi d 2013 aseggas deg yeffeɣ taɣtast, syin yeldi axxam n teẓrigin n udlis umi yefka isem Tamagit di Tamda. Ass-a ittidir di leqruba n Tizi-Wezzu.

Ḥmed Nekkar d amedyaz, d amaru, d anagal n tsekla Taqbaylit tatrart. D yiwen si tgejda n yidles amaziɣ s wayen i d-yefka i tutlayt n tyemmat d wayen akk i d-yezzin ar twennaḍt n tsekla d yidles. D yiwen i yefkan tudert-is i yidles d tira n tsekla taqbaylit s taɣulin ines imgaraden, ama d tullisin, ungalen, tizrawin, tamedyazt, timucuha, amezgun, tisuqilin, almad n tutlayt …

Yefka-d lwelha-s ɣer tira n yimeẓyanen, ger yidlisen-a a naf:

Tageldunt, aqcic ijaḥen, taɣaḍt n Mass Seguin, taɣaḍt iččan tiwiztin, tamḥargiwt, inebgi n Ṛebbi, Alluca di tmurt n tirga… Mazal tiyiḍ ɣer sdat.

Iban-d s annar n tira deg yiseggasen n 90. Tira ines simmal tettnerni ɣer sdat. Amennuɣ ines d amecwar ɣɣezzifen, werǧin yeḥbis tira simmal ɣer sdat. Iswi n umennuɣ-is d aseḥbiber ɣef nnger n tmagit n Uqbayli d Umaziɣ s umata, si tira n wungalen ɣer teẓrigin Tamagit i d-iseẓrigen ass-a idlisen s tmaziɣt. Ar tura yura ugar 12 yidlisen s tɣulin yemgaraden.

Ayyuz i Ahmed Nekkar !

TANEMMIRT

Tasbeddit Tiregwa tesnmmer-iken seg wul  ɣef  ufus n tallelt d-tefkam i yisenfaren-is.

Tanemmirt i tesqamut  yinezrafen; Tanemmirt i yemyura yettekkin ama s yeḍrisen neɣ s yedlisen d-tuznen;

Tanemmirt i wid d tid d-yefkan afus s tedrimt; Tanemmirt i tddukliwin d yemdanen akkud neddukel akken ad naẓẓ ugar ɣer sdat;

Ottawa, 03 deg ɣuct 2022.

Tasbeddit Tiregwa

.

ARTICLES SIMILAIRES

1 COMMENTAIRE

  1. Bravo à tous les lauréats et aux organisateurs. Dommage que l’article soit terni par cette image de femme voilée qui a quelques années de retard car le Minitel Rose n’existe plus.

LAISSEZ UN COMMENTAIRE

S'il vous plaît entrez votre commentaire!
S'il vous plaît entrez votre nom ici

Les plus lus

Les banques en Algérie : des banquiers ou des fonctionnaires ?

  Pendant longtemps, on a pu nier la dimension politique du jeu monétaire et bancaire. En effet quel est l’écart entre une entreprise en difficulté...

Les plus populaires

Commentaires récents