Tamuɣli n umeɣri . Ur lliɣ d amussnaw di tsekla , maca yelha ma fkiɣ tamuɣli-w deg wayen d-yeffɣen d amaynut deg taɣult-a .
Wagi d ungal » Tiṭ d yilleḍ » i d-yura Mass Muḥend Akli Salḥi , aselmad n tsekla n tmaziɣt di tesdawit n Tizi-Wezzu . Ungal yettnuzun deg tnedlist » Muḥemmed Uhaṛun » deg Uqbu .
Ungal yellan ass-a gar yifassen-iw , ungal ay bdiɣ s tɣuri , umi ṛuḥeɣ ddac ddac , iwakken ad as-sibenneɣ ugar , umi ttɛawadeɣ tikwal ula i wayen ɣriɣ yagi deg wakken yelha nezzeh . Ad tiɣzif tɣuri-s ilmend imi d ṣṣnef amaynut deg wayen yerzan ungal di tsekla taqbaylit .
» Tiṭ d yilleḍ » d ungal amezwaru n uselmad amaru » Muḥend Akli Salhi » , i d-iḍefṛen aṭas n yidlisen yura yagi . Ma bedreɣ-d tlata kan deg-sen acku d ayen yerzan tasekla , d wigi i d tisura swayes ara yekcem umeɣri ar umaḍal-agi meqqren atnan yidlisen-agi ihi : » amezwaru ɣef tsekla d tɣuri » , » wis sin ɣef tɣuri n tneqqist d usefru « , » wis kraḍ d asegzawal ameẓẓyan n tsekla « .
D idlisen iwulmen , i ilaqen i wid yebɣan ad ɣren taɣuri iṣeggmen , neɣ ladɣa i wid yebɣan ad d-arun » ungalen » imi taggara-yagi » yuɣal wungal d annar n userwet ideg ur yelli usizdeg .
D idlisen i izemmren ad ɛiwnen win ara yeɣren ungal-agi amezwaru ines , d ungal i d-ineǧǧren abrid ajdid , ma qurneɣ-ten ar wid kan yagi ɣriɣ nekk , ma ɣelṭeɣ init-d anda , d wamek , kunwi yellan di lḥirfa , neɣ kunwi yeɣran ungalen mazal ɣriɣ !
» Tiṭ d yilleḍ » mebla ccekk d lɣella n waṭas inadiyen s telqay di tsekla , d tɣuri n waṭas n wungalen di tlata n tutlayin yessen umaru ( Taqbaylit , tafṛansist , taɛṛabt ) . Mačči d ayen isehlen maḍi ! Mačči d asfeckukel ur nesɛi lsas ! D tira s uɣanib d-yufraren yufafen , n uswir aɛlayen , yerẓan asalu deg wayen yeɛnan amaynut di tsekla n teqbaylit d tmaziɣt s umata . D tira ara yernun ccan d wazal i tutlayt-nneɣ.
« Tiṭ d yilleḍ » ur telli d tiḥkayin-nni nwulef neqqar i yerzan tudert n kra n yimdanen kan di tmetti , d wuguren d-ttemlilin yal ass deg uxeddim neɣ di temɛict.
Maca d ayen nniḍen , d ayen iḥuzan timetti s timmad-is , d aṭan ur d-nettban yedreg ula ɣef tmuɣli n umejjay , d aṭan iḥuzan ula d amejjay , d aṭan n tmetti ineqqen deg umdan cwiṭ cwiṭ .
D aṭan iḥuzan amsawal n teḥkayt . Amsawal-awadem d tafremlit yettawin tettarra gar umejjay d yimuḍan . Tagi d llal n tewriqin i d-yettunefken i umaru . Ula d amaru ur t-yezgil waṭan , yal mara d-yejbed tawriqt , yettaf-d iman-is deg umkan uwadem mebla ma yebna fell-as .
Taḥkayt n » Tiṭ d yilleḍ » ɣezzifet d ayen kan , yettwarun deg tewriqin .
D ayen tura tin yecban ifeṭṭiwej n tmes d-yewwin tafat yid-s . D tiwriqin i d-yettwakksen deg tezmamt n tin akken yuḍnen , tiwriqen ta sdat ta , ttbeddilent ula d ini , ta ur teddi d ta , d asaru ɣezzifen iwumi ur tban taggara .
Gedha i Mass Muḥend Akli Salḥi .
Lmulud Sellam .
