Akka, d azamul (repère, symbole) n Ifri-Uzellagen, akkin d win n imenɣi n El Badr, i d-illan gar tiɣremt n Mekka akked el Madina (1).
D sin iberdan ur nezmir ad mlilen !
Aswir n Ifri-Uzellagen n 1956 (congrès de la Soummam), ifka aẓar di tmurt n Lezzayer, si talast ar talast, mačči kan deg udrar-nni.
Ass-a, d win i d azamul ur izmir yiwen ad ikkes, acku d tagejdit n tlalit n Lezzayer tatrart (moderne) di tnemmast n tegrawla.
Abrid-nni, uran-t imeɣnasen n FLN-ALN imezwura s isekkilen n idammen : « d tanekra i tlalit n uwanek/Etat azzayri s wudem n tagduda tamagdayt/république démocratique et sociale, mačči d asbeddi n tgelda neɣ n lxalifa ineslem i ǧǧan wussan… » (2).
Tamsalt ifra-tt-id weswir-nni, ur illi deg-s wugzir : tamurt (akal n Lezzayer di tlisa-s) tezwar ddin, tezwar ‘’lumma n tirga’’ akken tebɣu tili.
Tamsalt n wass-a, d tin n taɣelnaẓri/nationalisme di tlisa n tmurt n Lezzayer, mačči d anadi n kra n tegmatt ur nelli, akkin i tmura n yijdi n tinariwin/déserts i yerran imenɣi n El Badr d tanemmast n targit-nsen.
Abrid n imeṭṭurfan inselmen, akken ad bnun lxalifa ineslem, war talast deg umaḍal, s wuzzal d idammen, abrid-nsen iban ur iffir. Di yal tamurt anda i gren tuccar-nsen, d nnger d uhuddu kan ; imedyaten gten di yal tama : Lezzayer, Libya, Irak, Surya, Tafrikt taberkant, twin towers n New York, Afɣanistan, Pakistan…, akken azekka inselmen ad rren udem-nsen, d aklan, ɣer wanda yella lmir n DAECH neɣ wayeḍ !
Di tmura n Urupa ass-a, di yal tiɣremt, imeṭṭurfan inselmen kkaten ad gren afus anda i yufan, ad ẓẓallen anda i zemren. Di Séville (Spanya), kkren ad d-rren ɣer tinneslemt, tamesgida-nni i yasen-ittwakksen di 1236 (3).
Azamul n Ifri-Uzellagen di tmurt n Lezzayer, issefk ad iqqim d agadir zdat n tḥila n imeṭṭurfan inselmen, wid ikkaten yal ass ad snegren tamurt akken ad teqqen aḍar afus, zun d tarbibt n igelliden illan akkin (Saâduyya, Qaṭar, Limarat…).
Annar n tsertit, ad yili d win n taɣelnaẓri/nationalisme, n izerfan akked tatrarit/modernité n tmurt, mačči d win ddin.
Aumer U Lamara
Timerna / Notes.
1) La bataille d’el Badr, du nom d’une vallée située entre La Mecque et Médine, est la première bataille victorieuse des Arabes musulmans. C’est la bataille de Mahomet contre le clan quraychite qui l’avait contraint à l’exil vers Médine et menacé de mort les musulmans. Elle a eu lieu le 13 mars 624.
2) « … La Révolution algérienne est un combat patriotique dont la base est incontestablement de caractère national, politique et social. Elle n’est inféodée ni au Caire, ni à Londres, ni à Moscou, ni à Washington … C’est enfin la lutte pour la renaissance d’un État Algérien sous la forme d’une république démocratique et sociale et non la restauration d’une monarchie ou d’une théocratie révolues… ». (in. Plateforme du congrès de la Soummam).
3) Cette mosquée de Séville a été reprise aux musulmans par Ferdinand III de Castille en 1236 et transformée en cathédrale en gardant l’architecture d’origine. Depuis, le culte catholique y est célébré exclusivement et sans interruption. Récemment, des intégristes musulmans tentaient de prier de force dans ce lieu de culte catholique (06/2017).
