Tameddurt n Dda Abdennur n At li U Yaḥya tettwassen : d tameddurt n yiseɣ d usirem, d azamul ameqqran i lǧil d-ikkren, i win d-iteddun.

Dda Abdennur illa d ameɣnas n ukabar n PPA deffir 1945, mi tella tmurt ddaw uzaglu n Fransa, syin tudert-is d asaru deg ubrid n tlelli, deg umussu n FLN armi tefra di 1962, di tnekra n FFS mgal adabu n Ben Bella, syin ikcem tallit adabu d-ilulen si 1965 deg ubrid i yumen di lfayda n tmurt-is. 

Maca, ur iqqim deg-s, asmi yefhem d adabu-nni yellan di 1962 i yellan imir, iffeɣ-d d azedgan.

Dda Abdennur illa d agrawliw n tmurt-is. 

Mi d-iffeɣ d amastan/abugaṭu deffir 1970, idda d agrawliw n izerfan n umdan di tmurt-is armi d ass aneggaru, akken tamurt ad taɣ abrid n izerfan, n tugdut, ad tili d tamurt-nni urgan imeɣnasen am netta i yekkren di 1954. Adabu n at ukakskiḍ irra-yas lxir, issekcem-it ɣer lḥebs n Berwagiyya !

I netta, amennuɣ ɣef timunent/indépendance akked win n izerfan n umdan d yiwen.

Ass-a, tameddurt n Dda Abdennur d aɣerbaz ameqqran anda zemren ad d-agmen tamussni akk wid/tid issarmen ayen ilhan i tmurt-nsen.

Asalu n izerfan i yenjer Dda Abdennur akked imeɣnasen nniḍen, ass-a yessahrew, ifka imɣi di tmurt n Lezzayer, si Wehran ar Annaba, si Lezzayer ar Tamenɣest.

Dda Abdennur ad iqqim deg umezruy, d yiwen gar wid-nni i yaɣ-immalen abrid, ad iqqim deg wakal amaziɣ d yiwen « ɣas ulac-it, illa ! ».