« Fly Emirates ! », ma d annay amaziɣ ad iqqim iffer, ar d-yas wass-is… !

Nniɣ-as i yiwen umastan n teɣdemt n Lezzayer tamanaɣt : – Anwa asaḍuf n « code pénal » ideg yettwagdel wannay amaziɣ ?

Inna-yi-d :

– Ulac asaḍuf yuran !

– Amek ihi ttwaṭṭfen ɣef lḥebs wid/tid akk irefden annay amaziɣ di tmurt n Lezzayer, di tnekra n Hirak, akked imukan nniḍen ?

– Sbabben-asen tardayt n « atteinte à l’unité nationale ».

– Akka i tella ?

– Ih, akka…

Tanekra n lḥirak n furar 2019, i d-ibdan di temdint n Xerraṭa, akken tessaɣ i tmurt n Lezzayer di yal tamnaṭ, i teldi tabburt i unnay amaziɣ, ittrefrif di yal tikli, nnig yal tazeqqa akked iberdan. 

Tanekra tamagdayt n uɣref azzayri tufa azamul iwatan, idis n wannay n tmurt n « waggur d yitri’’, akken ad tbeddel targit ɣer tilawt, ad d-tlal Lezzayer tazzayrit.   

Annay amaziɣ iban-d d azamul n tdukli, n tegmat ur nekkis yiwen, ur naâzil yiwen uzzayri neɣ tazzayrit, akken tebɣu tili tutlayt-is neɣ ddin-is ; diɣ, d azamul isduklen akk imezdaɣ n umaḍal amaziɣ n Tefrikt n Ugafa, di tmura n Merruk, Tunes Libya, agafa n Mali (Azawaḍ), akked Niger, zger akkin ɣer Tegzirin Tiknariyin. 

Ur illi uẓar n beṭṭu neɣ usmenyif/errya deg uzamul n unnay amaziɣ, ur illi deg-s « relent identitaire » illan ass-a di tmura n Urupa neɣ USA mgal iberraniyen, neɣ ayen illan di Taferka taberkant mgal aḥric n wat tmurt, am twaɣit n imenɣi  Hutus-Tutsi di Rwanda, ur nefri.  

Icenga n tdukli n Tefrikt n Ugafa.

Tamuɣli-nni n tdukli n Tefrikt n Ugafa, tin i yezwaren si tdukli n uɣref azzayri deg ubrid n tlalit n tmurt tamagdayt, ur illi di tiṭ n wid ur nessarem ad teddukel tmurt tameqqrant, si Libya ar Merruk.

Imelyan-nni n Izzayriyen iteddun di yal tikli n talwit, di Lezzayer, Bgayet, Tizi Wezzu, Wehran, Qsenṭina, Paris, Londres, Montréal… s wannay amaziɣ akked wannay n Lezzayer dduklen, ur illi deg wul n wid d-isseqdacen tiḥila akken ad rren tamurt d ayla-nsen, d amur n waɣlan n « taârabt-tinneslemt » (une partie de la nation arabo-islamique ).

Tiḥila-nni mačči yiwen nsent : 

• Tafrikt n Ugafa ur telli, isem-is « El Maghreb el arabi », tin i yasen-d-issas ssif n iserdasen aâraben di lqern wis 7, di ṭṭrad n lfutuḥat,
• Tamurt tineslemt, ad tili ‘’bessif’’ d tamurt taârabt, tebɣa neɣ ur tebɣi, zun ulac tinneslemt, tella kan ‘’taârabt-tinneslemt’’,
• Tamurt deg tella tutlayt taârabt, d tamurt taârabt, ifka anza ɣer tsertit pangermanique (2),
• Tamurt n ‘’Camal Ifriqia » ur telli d tamurt n yidles, ur illi uɣref amaziɣ, ur telli tutlayt tamaziɣt, ur telli tira n tmaziɣt… d war aɣref, war idles.
• Imaziɣen llan, maca tinneslemt terra-ten d Aâraben, i yenna Ahmed Taleb Ibrahimi…
• …

Anwi i d icenga n Tefrikt n Ugafa, icenga n uɣref amaziɣ ?

Icenga n Tefrikt n Ugafa tamaziɣt mačči yiwen wudem-nsen si tazwara n umezruy.

Maca d ayen illan kan, si tmuɣli-nneɣ, si tlalit n Liga aârabiya (Ligue des Etats arabes) (1) akked tlalit n tdamsa tameqqrant n pétrole (pétro-dollars).

D abeddel n usalu n Liga aârabiya, tin d-ilulen akken ad tesdukel timura taârabin, i yessawḍen ɣer tsertit n temharsa taârabt (colonisation par l’arabisme). Di tazwara, tinneslemt ur telli d tagejdit, maca tbeddel abrid ɣer ‘’taârabt-tinneslemt’’, si mi teɣli tezmert n ‘’nationalisme arabe’’ n Gamal Abdel Naser.

Akka tura, d tigelda n pétro-dollars n Qatar, Emirates, Saudya, i yuɣen amkan agejdan di tsertit timnekcemt n taârabt-tinneslemt.

Sin iɣallen i semrasen/sexdamen di tsertit-nsen akken llan, ɣas ma yella umgared gar-asen, tiyita-nsen teddukel, tekkat ɣer yiwet tama :  d tasertit n Ixuniyen inselmen akked Iwehhabiyen-Isalafiyen, akked tedrimt n pétro-dollars, akken ad aɣen imdanen/iɣallen di tmura i tekcem twekka-nsen. 

I di Lezzayer amek ?

Di tnemmast n tikliwin n Lḥirak i yerzef jiniral Ahmed Gaïd Salah ɣer tmurt n Emirates. Mi d-yuɣal kan, ifka lamer i temsulta n Lezzayer akken ad ittwakkes unnay amaziɣ di tikliwin, di yal amkan. Win i ṭṭfen ad tt-id-yawi deg unekraf/ lḥebs !

Ansi d-ikka lamer-nni n ugdal/interdiction n unnay amaziɣ, ma mačči si tmurt n Emirates ?

Ass-a, di tmurt n Lezzayer si 2019, annay amaziɣ ittwagdel, maca ur illi kra n usaḍuf i t-igedlen : « d asaḍuf ur nuri » (une loi non écrite dans le code pénal).

Di tmura nniḍen, ɣɣaren-s « le fait du prince ». 

Ma d adabu azzayri i yellan ass-a di Lezzayer, ad izwir, ad ikkes asaḍuf ur nelli, ad isbedd annay amaziɣ nnig Ugraw Aɣelnaw n APN !

Maca, d ayen illan ass-a di tmurt deg ttwaqqnen yemdanen ɣef tlelli-nsen d tikta-nsen, i yefkan tabɣest/lkuraj i yemdanen am Belghit, Mokri, Djabellah, Bengrina… akken ad ddun d ixuniyen n tsertit i d-ikan si tmura nniḍen, mgal tamurt-nsent nutni.

Di tkerkas-nsen, sduklen aserǧen n umezruy akked txunit n « nekkni yakk d inselmen »… 

D tasertit iteddun ad teldi tabburt i temharsa n « grand remplacement », ma fkan afus Izzayriyen akken llan !

Aumer U Lamara

Timerna / Notes :

1. Ligue des Etats arabes, créée en mars 1945, par les Etats fondateurs : Jordanie, Liban, Syrie, Arabie Saoudite, Egypte, Irak, Yémen.

2. Tasertit pangermanique : « Aɣlan almani yella di yal tamurt anida tella tutlayt talmanit » (« la nation allemande se trouve partout où se parle l’Allemand »). D tasertit-nni i yesnekren ṭṭrad ameqqran n umaḍal wis sin / 2eme guerre mondiale.

D tasertit-nni i yesseqdac ass-a Vladymir Poutine s tutlayt tarusit, di Ukrainia, Moldavia, Georgia… (Anida tella tutlayt tarusit, d tamurt n Russia !).